នៅព្រឹកថ្ងៃអង្គារ ១៤កើត ខែបុស្ស ឆ្នាំរោង ឆស័ក ព.ស.២៥៦៨ ត្រូវនឹងថ្ងៃទី១៤ ខែមករា ឆ្នាំ២០២៥ ចាប់ពីម៉ោង៩៖៣០ នៅសាលប្រជុំមន្ទីរពេទ្យបង្អែករកា មានរៀបចំកិច្ចប្រជុំស្តីពីការពិនិត្យស្ថានភាពជាក់ស្តែងនៃកាតឆ្លើយតបនឹងមេរោគអេដស៍និងជំងឺអេដស៍ ក្រោមអធិបតីភាពដ៏ខ្ពង់ខ្ពស់ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍។ កិច្ចប្រជុំនេះមានការចូលរួមពី ឯកឧត្តម លោកជំទាវ លោក អ្នកស្រី និងនាងកញ្ញា ជា ប្រធាន អនុប្រធានគណៈកម្មាធិការប្រយុទ្ធនឹងជំងឺអេដស៍ទីស្តីការគណៈរដ្ឋមន្រ្តី ក្រសួងសេដ្ឋកិច្ចនិងហិរញ្ញវត្ថុ និងក្រសួងសុខាភិបាល អនុប្រធានមន្ទីរសុខាភិបាល ប្រធានកម្មវិធីអេដស៍ខេត្ត អភិបាលស្រុកសង្កែ មេឃុំរកា នាយកអនុវិទ្យាល័យ នាយកសាលាបឋមសិក្សារកា នាយរងប៉ុស្តិ៍ឃុំរកា តំណាងអង្គការHACC អង្គការCPN+ អង្គការCCW អង្គការCRS អង្គការFoNPAM តំណាងអ្នកផ្ទុកមេរោគអេដស៍ ថ្នាក់ដឹកនាំនិងមន្រ្តីមន្ទីរពេទ្យបង្អែករកា ព្រមទាំងថ្នាក់ដឹកនាំនិងមន្រ្តីអាជ្ញាធរជាតិប្រយុទ្ធនឹងជំងឺអេដស៍។
បន្ទាប់ពីស្តាប់របាយការណ៍របស់លោកវេជ្ជបណ្ឌិត អេង សំណាង ប្រធានមន្ទីរពេទ្យបង្អែករកា ការសាកសួរពីគណៈប្រតិភូ រួមមានឯកឧត្តម សុក ផេង លោកជំទាវ កែវ ចរិយា និងឯកឧត្តម ស៊ឹម ស៊ូយេង និងការឆ្លើយបញ្ជាក់ពីលោក នាង ច័ន្ទដារ៉ា អភិបាលស្រុកសង្កែ តំណាងមន្ទីរសុខាភិបាលខេត្តបាត់ដំបង ប្រធានមន្ទីរពេទ្យបង្អែក និងមេឃុំរកា ព្រមទាំងបទបង្ហាញស្តីពីការងារឆ្លើយតបនឹងអេដស៍នៅឃុំរការយៈពេល១០ឆ្នាំមក ឯកឧត្តមទេសរដ្ឋមន្រ្តីបានណែនាំថា ឃុំរកាគឺជាគំរូនៃការឆ្លើយតបនឹងមេរោគអេដស៍នៅកម្ពុជា។ ដូច្នេះ សូមពង្រឹងការធ្វើតេស្តរកមេរោគអេដស៍ និងរៀបចំឱ្យមានកន្លែងបញ្ជាក់តេស្តនៅរកា។
ក្រោយពីបញ្ចប់កិច្ចប្រជុំ ឯកឧត្តមទេសរដ្ឋមន្រ្តីបានបន្តដឹកនាំគណៈប្រតិភូអន្តរក្រសួងទៅសួរសុខទុក្ខអ្នកផ្ទុកមេរោគអេដស៍នៅតាមផ្ទះ។ ពួកគាត់ទាំងនោះបានមកទទួលសេវាជំងឺអេដស៍និងលេបថ្នាំទៀងទាត់ ដែលធ្វើឱ្យមេរោគនៅក្នុងខ្លួនមានចំនួនតិចបំផុត ហើយមិនបានចម្លងមេរោគទៅដៃគូ ព្រមទាំងកូននោះទេ។
នៅរសៀលថ្ងៃទី១៤ដដែល ឯកឧត្តមទេសរដ្ឋមន្រ្តីបានបន្តដឹកនាំកិច្ចប្រជុំគណៈកម្មាធិការប្រយុទ្ធនឹងជំងឺអេដស៍ខេត្តបាត់ដំបង នៅមន្ទីរសុខាភិបាលខេត្ត។ កិច្ចប្រជុំនេះមានការចូលរួមពី ឯកឧត្តម លោកជំទាវ លោក អ្នកស្រី និងនាងកញ្ញាជា ប្រធាន អនុប្រធានគណៈកម្មាធិការប្រយុទ្ធនឹងជំងឺអេដស៍ទីស្តីការគណៈរដ្ឋមន្រ្តី ក្រសួងសេដ្ឋកិច្ចនិងហិរញ្ញវត្ថុ និងក្រសួងសុខាភិបាល អភិបាលរងខេត្តបាត់ដំបង អនុប្រធានមន្ទីរសុខាភិបាល ប្រធានកម្មវិធីអេដស៍ខេត្ត ប្រធានការិយាល័យសុខាភិបាលស្រុកប្រតិបត្តិបាត់ដំបង សង្កែ ថ្មគោល សំពៅលូន មោងឫស្សី តំណាងអង្គការHACC អង្គការCPN+ អង្គការCCW អង្គការCRS អង្គការFoNPAM និងថ្នាក់ដឹកនាំនិងមន្ត្រីអាជ្ញាធរជាតិប្រយុទ្ធនឹងជំងឺអេដស៍។
បន្ទាប់ពីសុន្ទរកថាស្វាគមន៍របស់ឯកឧត្តម ពិន ប្រាកដ អភិបាលរងខេត្តបាត់ដំបង ការសាកសួរអំពីការងារអេដស៍នៅក្នុងខេត្តពីគណៈប្រតិភូអន្តរក្រសួង ឯកឧត្តមទេសរដ្ឋមន្ត្រីបានណែនាំឱ្យខេត្តបាត់ដំបង រៀបចំគណៈកម្មាធិការប្រយុទ្ធនឹងជំងឺអេដស៍ឱ្យបានគ្រប់ក្រុង ស្រុក និងឃុំ សង្កាត់។ ក្នុងនោះ គណៈកម្មាធិការប្រយុទ្ធនឹងជំងឺអេដស៍ត្រូវមានសមាសភាពពី តំណាងអ្នកផ្ទុកមេរោគអេដស៍ និងប្រជាជនគន្លឹះ(ស្រ្តីបម្រើសេវាកម្សាន្ត ក្រុមបុរសរួមភេទជាមួយបុរស ក្រុមអ្នកបំប្លែងភេទ)។ទន្ទឹមនឹងនេះ ក៏ត្រូវរៀបចំផែនការថវិកា និងអនុវត្តការងារបង្ការការពារ ព្រមទាំងជំរុញធ្វើតេស្ត ដើម្បីឱ្យសម្រេចគោលដៅ៩៥-៩៥-៩៥ ដែលបច្ចុប្បន្នខេត្តបាត់ដំបងសម្រេចបាន៩១-៩៩-៩៨។