ឯកឧត្តមទេសរដ្ឋមន្ត្រី ប្រធាន អៀង មូលី អញ្ជើញជាអធិបតី ក្នុងកិច្ចប្រជុំប្រចាំខែរបស់អាជ្ញាធរអេដស៍
កិច្ចប្រជុំថ្នាក់ដឹកនាំប្រចាំខែរបស់អាជ្ញាធរជាតិប្រយុទ្ធនឹងជម្ងឺអេដស៍ បានត្រូវប្រារព្ធធ្វើឡើងក្រោមអធិបតីភាពរបស់ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរនេះ ដើម្បីស្តាប់របាយការណ៍ប្រចាំខែ មករា របស់អគ្គលេខាធិការដ្ឋាន និង ដើម្បីពិភាក្សាអំពីផែនការធ្វើវិបស្សនា ។
កិច្ចប្រជុំ ដែលបានប្រព្រឹត្តទៅកាលពីថ្ងៃទី២៩ ខែមករា នេះ បានត្រូវចូលចួលដោយឯកឧត្តមអនុប្រធាន ឯកឧត្តមទីប្រឹក្សា ឯកឧត្តមអគ្គនាយក ឯកឧត្តមអគ្គនាយករង ព្រមទាំងឯកឧត្តម លោក លោកស្រី ប្រធាននាយកដ្ឋានជំនាញរបស់អាជ្ញាធរជាតិប្រយុទ្ធនឹងជម្ងឺអេដស៍ ។
អង្គប្រជុំបានផ្តោតជាសំខាន់ទៅលើផែនការធ្វើវិបស្សនា ដែលនឹងប្រព្រឹត្តទៅនៅដើមខែកុម្ភៈនេះ ។ ឯកឧត្តមប្រធានអង្គប្រជុំ បានគូសបញ្ជាក់ថា ការធ្វើ វិបស្សនានេះ គឺមានគោលបំណងដើម្បីបង្កើនការយល់ដឹង និង កសាងទំនាក់ទំនងអោយកាន់តែប្រសើរក្នុងចំណោមបុគ្គលិក និង ថ្នាក់ដឹកនាំនៃអាជ្ញាធរជាតិប្រយុទ្ធនឹងជម្ងឺអេសដ៍ ព្រមទាំងដៃគូសំខាន់ៗដែលកំពុងធ្វើការលើវិស័យអេដស៍នៅក្នុងប្រទេសកម្ពុជា ដើម្បីអោយឈានទៅសម្រេចអោយបាននូវ គោលនយោបាយទាំង៧ចំណុច និងគោលដៅសូន្យ៣ ដែលដាក់ចេញដោយរាជរដ្ឋាភិបាលកម្ពុជា និងអង្គការសហប្រជាជាតិនៅឆ្នាំ២០២០ ។
កិច្ចប្រជុំថ្នាក់ដឹកនាំនេះ បានសម្រេចជាឯកច្ឆ័ន្ទជ្រើសរើសយកខេត្តព្រះសីហនុ ជាកន្លែងសម្រាប់ធ្វើវិបស្សនា ។ ក្រៅពីនេះ កិច្ចប្រជុំក៏បានធ្វើការពិភាក្សា អំពីរបាយការណ៍យុទ្ធសាស្ត្រថ្មី និងបញ្ហាមួយចំនួនទៀតរួមមានការកសាងសមត្ថភាពក្នុងចំណោមបុគ្គលិកអាជ្ញាធរ ប្រយោជន៍ដើម្បីធ្វើការកែលំអរគេហ ទំព័ររបស់អាជ្ញាធរជាតិ រួមទាំងការពិភាក្សាអំពីផែនការរៀបចំការផលិតដំណឹង និង បទយកការណ៍ស្តីពីបញ្ហាអេដស៍ និង ជីវភាពប្រចាំថ្ងៃនៃអ្នកផ្ទុកមេរោគ អេដស៍ សម្រាប់កម្មវិធីវិទ្យុសហគមន៍ នៅថ្នាក់មូលដ្ឋាន ៕
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
