National AIDS Authority

ចំនួនអ្នកទស្សនាគេហទំព័រ:

ពិធីបដិសណ្ឋារកិច្ចទស្សនកិច្ចផ្លូវការរបស់លោកជំទាវ Winnie Byanyima អគ្គលេខាធិការរងអង្គការសហប្រជាជាតិ និងជានាយិកាប្រតិបត្តិអង្គការ UNAIDS

នៅល្ងាចថ្ងៃចន្ទ ១រោច ខែពិសាខ ឆ្នាំម្សាញ់ សប្តស័ក ព.ស.២៥៦៩ ត្រូវនឹងថ្ងៃទី១២ ខែឧសភា ឆ្នាំ២០២៥ ចាប់ពីម៉ោង៤ នៅសណ្ឋាគារ Raffles Le Royal ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និងលោកជំទាវ បានរៀបចំពិធីបដិសណ្ឋារកិច្ចទស្សនកិច្ចផ្លូវការរបស់លោកជំទាវ Winnie Byanyima អគ្គលេខាធិការរងអង្គការសហប្រជាជាតិ និងជានាយិកាប្រតិបត្តិអង្គការUNAIDS។ ពិធីនេះមានការអញ្ជើញចូលរួមពីថ្នាក់ដឹកនាំជាន់ខ្ពស់រាជរដ្ឋាភិបាល ជា ទេសរដ្ឋមន្រ្តី និងរដ្ឋមន្រ្តី ឯកអគ្គរាជទូត ឯកអគ្គរដ្ឋទូតនិងតំណាងប្រចាំកម្ពុជា ប្រធាន អនុប្រធាន និងតំណាងគណៈកម្មាធិការប្រយុទ្ធនឹងជំងឺអេដស៍ក្រសួង ស្ថាប័ន និងរាជធានី ខេត្ត អង្គការអន្តរជាតិ អង្គការសង្គមស៊ីវិលជាតិ និងអន្តរជាតិ អ្នកជំងឺអេដស៍ និងក្រុមប្រជាជនគន្លឹះ ប្រមាណ១៣០នាក់។

នៅក្នុងប្រសាសន៍ស្វាគមន៍ ឯកឧត្តមទេសរដ្ឋមន្រ្តីបានបញ្ជាក់ថា ពិធីបដិសណ្ឋារកិច្ចនេះរៀបចំឡើងដើម្បីអបអរសាទរភាពជាដៃគូដ៏ល្អ ដែលនាំមកនូវវឌ្ឍនភាពដ៏ប្រពៃរវាងព្រះរាជាណាចក្រកម្ពុជា និងអង្គការយូអិនអេដស៍។ ឯកឧត្តមទេសរដ្ឋមន្រ្តីបានថ្លែងអំណរគុណដ៏ជ្រាលជ្រៅចំពោះ ឯកឧត្តមទេសរដ្ឋមន្ត្រីនិងរដ្ឋមន្ត្រី ព្រមទាំងថ្នាក់ដឹកនាំក្រសួង ស្ថាប័ន រាជធានី ខេត្ត ដែលបានចូលរួម ជាការឆ្លុះបញ្ចាំងឱ្យឃើញនូវការនាំមុខចូលរួមប្រយុទ្ធឥតរុញរារបស់រាជរដ្ឋាភិបាលទាំងស្រុង ដើម្បីទប់ស្កាត់ការរីករាលដាលនៃមេរោគអេដស៍ និងដើម្បីលើកកម្ពស់សាមគ្គីភាពសុខភាពក្នុងពិភពលោក។

ឯកឧត្តមទេសរដ្ឋមន្រ្តីបានសង្កត់ធ្ងន់ថា ជោគជ័យនៃការឆ្លើយតបនឹងមេរោគអេដស៍និងជំងឺអេដស៍មិនអាចទទួលបាននោះទេ ប្រសិនបើគ្មានការប្តេជ្ញាចិត្តដ៏មោះមុតរបស់រាជរដ្ឋាភិបាល ក្រោមការដឹកនាំរបស់សម្ដេចអគ្គមហាសេនាបតីតេជោ ហ៊ុន សែន អតីតនាយករដ្ឋមន្ត្រី ប្រធានព្រឹទ្ធសភា ក្នុងកាលកន្លងមក និងសម្ដេចមហាបវរធិបតី ហ៊ុន ម៉ាណែត នាយករដ្ឋមន្រ្តីនៃព្រះរាជាណាចក្រកម្ពុជាក្នុងពេលបច្ចុប្បន្ន និងការខិតខំប្រឹងប្រែងបំពេញភារកិច្ចមិនខ្លាចនឿយហត់របស់មន្ត្រីសុខាភិបាល សង្គមស៊ីវិល និងជាពិសេស បើគ្មានការគាំទ្រដ៏ថ្លៃថ្លារបស់ដៃគូអភិវឌ្ឍនានា ដូចជាអង្គការយូអិនអេដស៍ នៅទីនេះស្រាប់។

ទន្ទឹមនឹងនេះ ឯកឧត្តមទេសរដ្ឋមន្រ្តីបានបន្តថា ទស្សនកិច្ចរបស់លោកជំទាវ Winnie Byanyima នៅព្រះរាជាណាចក្រកម្ពុជា បានបញ្ជាក់សារជាថ្មីនូវចំណងកិច្ចសហការដ៏ជិតស្និទ្ធរវាងព្រះរាជាណាចក្រកម្ពុជា និងអង្គការយូអិនអេដស៍ ចំណងដែលកើតចេញអំពីទំនុកចិត្តទៅវិញទៅមករវាងគ្នានឹងគ្នា គុណតម្លៃដូចគ្នា និងចក្ខុវិស័យមួយដែលមិនទុកនរណាម្នាក់ចោលនោះឡើយ។ ការិយាល័យរបស់យូអិនអេដស៍ ប្រចាំប្រទេសកម្ពុជាបានផ្ដល់នូវជំនាញផ្នែកទិន្នន័យ គោលនយោបាយ ការស្វែងរកការគាំទ្រសាធារណៈ និងភាពជាដៃគូ ដែលបានជួយជំរុញឱ្យកម្មវិធីអេដស៍នៅកម្ពុជាបានទទួលលទ្ធផលល្អដ៏ត្រចះត្រចង់។ ឯកឧត្តមទេសរដ្ឋមន្រ្តីបានបន្តថា ទោះជាមានវឌ្ឍនភាពដូចខាងលើក៏ដោយ ការប្រយុទ្ធប្រឆាំងនឹងមេរោគអេដស៍នៅមិនទាន់ឈានជើងដល់ទីបញ្ចប់នៅឡើយទេ។ ក្រុមយុវវ័យរបស់កម្ពុជាមួយចំនួនអាយុពី១៥ទៅ២៤ឆ្នាំ ជាពិសេស ក្រុមប្រុសរួមភេទជាមួយប្រុស នៅមិនទាន់បានទទួលការបញ្ជ្រាបការយល់ដឹងអំពីមេរោគអេដស៍និងជំងឺអេដស៍ ដូច្នេះពួកគេមិនធ្លាប់បានទទួលសេវាបង្ការការពារ រួមទាំងការធ្វើតេស្តរកមេរោគអេដស៍ជាដើមនៅឡើយ។

បន្ទាប់ពីការបង្ហាញខ្សែវីដេអូខ្លី និងចំណាប់អារម្មណ៍របស់សកម្មជនការងារអេដស៍មក លោកជំទាវ Winnie Byanyima ក៏បានឡើងមានចំណាប់អារម្មណ៍ ដោយបានថ្លែងការកោតសរសើរ និងអបអរសាទរចំពោះជោគជ័យនៃការប្រយុទ្ធនឹងមេរោគអេដស៍និងជំងឺអេដស៍នៅកម្ពុជា។ លោកជំទាវបានគូសបញ្ជាក់ថា កម្ពុជាបាននាំយកនូវទស្សនវិស័យយ៉ាងសំខាន់ក្នុងការឆ្លើយតបនឹងជំងឺអេដស៍។ ទន្ទឹមនឹងនេះ ពិភពលោកបានចាត់ទុកកម្មវិធីអេដស៍នៅកម្ពុជា ថាជាកម្មវិធីដែលជោគជ័យមួយនៅក្នុងតំបន់អាស៊ីប៉ាស៊ីហ្វ៊ិក ជាពិសេសយន្តការក្នុងការឆ្លើយតបជាពហុវិស័យ។ លោកជំទាវបានសរសើរថា កម្ពុជាបើកចំហចំពោះគំនិតច្នៃប្រឌិតថ្មី ព្រមទាំងស្វាគមន៍ចំពោះការប្តេជ្ញាចិត្តក្នុងការពង្រីកសេវាថែទាំសុខភាព។ បន្ថែមលើនេះ កម្ពុជាជាប្រទេសដំបូងគេដែលបានរៀបចំផែនទីបង្ហាញផ្លូវទៅកាន់ចីរភាពក្នុងការឆ្លើយតបនឹងមេរោគអេដស៍និងជំងឺអេដស៍ផងដែរ។

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច