ព្រះរាជាណាចក្រកម្ពុជា
Kingdom of Cambodia

ជាតិ​ សាសនា ព្រះមហាក្សត្រ
Nation Religion King

Contact us now:
info@naaa.gov.kh
+855 (0)23 885 129
+855 (0)23 885 279

ភាសាខ្មែរ   English

ឯកឧត្តមទេសរដ្ឋមន្រ្តី អៀង មូលី អញ្ជើញជាអធិបតី បើកកិច្ចប្រជុំមណ្ឌលតំណាងអាសុី ប៉ាស៊ីហ្វិក ខាងលិច នៃ ក្រុមប្រឹក្សាភិបាលមូលនិធិសាកល

នាព្រឹកថ្ងៃ១១កើត ខែពិសាខ ឆ្នាំច សំរឹទ្ធិស័ក ព.ស.២៥៦១ ត្រូវនឹងថ្ងៃទី២៥ ខែមេសា ឆ្នាំ២០១៨ ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និងប្រធាន​គណៈកម្មាធិការ​សម្រប​សម្រួល​មូលនិធិសកល បានអញ្ជើញជា​អធិបតីបើក កិច្ចប្រជុំលើកទី២ នៃយន្តការ​សម្របសម្រួល​មូលនិធិសកល​សម្រាប់មណ្ឌល​តំណាង​តំបន់អាស៊ីប៉ាស៊ីហ្វិក​ខាងលិច នៅសណ្ឋាគារ​អង្គរសិនជូរី ខេត្តសៀមរាប ដោយ​មាន​ការ​ចូលរួម​ពីថ្នាក់ដឹកនាំ​អាជ្ញាធរជាតិប្រយុទ្ធនឹងជំងឺអេដស៍ តំណាងរដ្ឋបាល​ខេត្តសៀមរាប ប្រតិភូយន្តការ​សម្របសម្រួល​មូលនិធិសកល​មកពីប្រទេសនានា​រួមមាន ៖ ១)កម្ពុជា ២)កោះឃុក ៣)ហ្វ៊ីជី ៤)មីក្រូណេស៊ី ៥)គិរីបាទី ៦)ឡាវ ៧)ម៉ាឡេស៊ី ៨)ណូរូ ៩)ប៉ាពូអាស៊ីនូវែលហ្គីណេ ១០)ហ្វីលីពីន ១១)សាម័រ ១២)សិង្ហបុរី ១៣)កោះសូឡូម៉ុង ១៤)វ៉ានូទូ និង១៥)វៀតណាម។ មន្រ្តីពីមូលនិធិសកល និងអង្គការ​សុខភាព​ពិភពលោក​ក៏បាន​ចូលរួម​ក្នុង​កិច្ចប្រជុំ​នេះដែរ។

កិច្ចប្រជុំនេះធ្វើឡើងក្នុងគោលបំណង៣សំខាន់ៗដូចតទៅ ៖

១)   ធ្វើជាវេទិកាដើម្បីពិនិត្យឡើងវិញ ធ្វើបច្ចុប្បន្នភាព និងចែករំលែកព័ត៌មាន​ទាំងឡាយ​ដែលអាច​ឱ្យការចូលរួម​របស់ថ្នាក់ដឹកនាំ និងសមាជិកមណ្ឌលតំណាង​ក្នុងក្រុមប្រឹក្សាភិបាល​របស់​មូលនិធិសកល​ប្រកបដោយ​ការ​យល់ដឹង និងមាន​សារៈសំខាន់។
២)   ស្វែងរកចំណុចដែលមានបញ្ហា និងការឆ្លើយតបបានទូលំទូលាយដែលអាចដាក់ជូនសម័យ​ប្រជុំលើកទី៣៩ នៃក្រុមប្រឹក្សាភិបាល​របស់​មូលនិធិសកល។
៣)   ពង្រឹងសហគមន៍មណ្ឌលតំណាងតំបន់ ដោយគោរពតាមនីតិវិធី ឬបទបញ្ជាដែលបានព្រមព្រៀងគ្នា រាប់ទាំងការប្រជុំសមាជិក​ជាមួយដៃគូ​ដោយ​ទៀងទាត់ តាមរបៀបដែល​អាចធ្វើបាន និងកែលម្អជានិច្ច។

ជាមួយគ្នានោះ កិច្ចប្រជុំក៏នឹងអនុម័តសមាសភាពថ្នាក់ដឹកនាំថ្មីនៃមណ្ឌលតំណាងតំបន់អាស៊ី  ប៉ាស៊ីហ្វិកផងដែរ។

បន្ទាប់ពីចំណាប់អារម្មណ៍ស្វាគមន៍របស់លោកស្រី យូ សុភា អភិបាលរងខេត្តសៀមរាប ឯកឧត្តមទេសរដ្ឋមន្រ្តីបានថ្លែងបើកកិច្ចប្រជុំ ដោយគូសបញ្ជាក់អំពីជោគជ័យ​នៅក្នុងការ​រក្សាសន្តិភាព ការកាត់បន្ថយ​ភាពក្រីក្រ ការពង្រឹង​សុខុមាលភាព​សង្គម និងជាពិសេស​ជោគជ័យក្នុងការ ប្រយុទ្ធនឹងជំងឺអេដស៍ដែលកម្ពុជា​ធ្វើឱ្យសម្រេចបាន។ ឯកឧត្តមមានប្រសាសន៍ថា កម្ពុជាជាប្រទេសមួយ​ក្នុងចំណោម​ប្រទេស៧​នៅក្នុងពិភពលោករួមមាន បុតស្វាណា ដាណឺម៉ាក អ៊ីស្លង់ សិង្ហបុរី ស៊ុយអ៊ែត និងអង់គ្លេស ដែលបានជោគជ័យ​ជាងគេក្នុងការប្រយុទ្ធនឹងជំងឺអេដស៍។ ប្រទេសទាំង៧នេះត្រូវបានអង្គការយូអិនអេដស៍ទទួលស្គាល់ថា បានសម្រេចរួចហើយគោលដៅ៩០-៩០-៩០។

ឯកឧត្តមទេសរដ្ឋមន្រ្តីបានបន្តថា ជោគជ័យក្នុងការប្រយុទ្ធនឹងជំងឺអេដស៍ របេង និងគ្រុនចាញ់ ព្រមទាំងឋានៈជាប្រទេសមានចំណូលមធ្យមកម្រិតទាប នៅក្នុងដំណាក់កាលកាត់បន្ថយជំនួយបានធ្វើឱ្យកម្ពុជាមានការលំបាកក្នុងការលុបបំបាត់ជំងឺទាំងនោះ។ នៅពេលមូលនិធិអន្តរ ជាតិបានបន្តធ្លាក់ចុះ រាជរដ្ឋាភិបាលកម្ពុជា​បានចូលមក​ទទួលខុសត្រូវ​ជំនួស។ រយៈពេល៣ឆ្នាំ កន្លងទៅ រាជរដ្ឋាភិបាលបានរួមចំណែក​ថវិកាចំនួន៤លានដុល្លារ​ក្នុងមួយឆ្នាំៗ និងចោះក្រវិល ថវិកាប្រមាណ៥លានដុល្លារ ជាថវិកាបដិភាគក្នុងការ​ប្រយុទ្ធនឹងជំងឺអេដស៍ទៅក្នុង​កម្មវិធី​មូលនិធិសកល ដើម្បីទិញ​ឱសថ​ប្រឆាំង​មេរោគអេដស៍ ជួលមន្រ្តីជាប់កិច្ចសន្យា និងផ្តល់ថវិកាទ្រទ្រង់​កម្មវិធីនៅថ្នាក់ក្រោមជាតិ។

មុននឹងប្រកាសបើកកិច្ចប្រជុំ ឯកឧត្តមទេសរដ្ឋមន្រ្តីបានជូនពរដល់អ្នកចូលរួម និងប្រតិភូឱ្យទទួលបានភាពសប្បាយរីករាយ​ក្នុងការស្នាក់នៅ​សៀមរាបអង្គរ ព្រមទាំងជួបប្រទះ​នូវពុទ្ធពរទាំង៤ប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ។

Building 16, Street 271 L 150, Sangkat Teuklaak II Khan Toul Kok Phnom Penh, Cambodia
Email : info@naaa.gov.kh | Tel: 023 88 51 29 Fax: 023 88 52 79