National AIDS Authority

ចំនួនអ្នកទស្សនាគេហទំព័រ:

ឯកឧត្តមទេសរដ្ឋមន្រ្តី អៀង មូលី ៖ ជោគជ័យក្នុងការប្រយុទ្ធនឹងជំងឺអេដស៍គឺដោយសារការចូលរួមពីយើងទាំងអស់គ្នា

នៅព្រឹកថ្ងៃពុធ ១៣រោច ខែកត្ដិក ឆ្នាំច សំរឹទ្ធិសក ព.ស.២៥៦២ ត្រូវនឹងថ្ងៃទី៥ ខែធ្នូ ឆ្នាំ២០១៨ នៅទីស្តីការគណៈរដ្ឋមន្រ្តី អាជ្ញាធរជាតិប្រយុទ្ធនឹងជំងឺអេដស៍បានរៀបចំសន្និបាតបូកសរុបការងារឆ្នាំ២០១៨ និងលើកទិសដៅសកម្មភាពឆ្នាំ២០១៩ ក្រោមអធិបតីភាពឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ ដោយមានវត្តមានអញ្ជើញចូលរួមពីឯកឧត្តម លោកជំទាវ លោក លោកស្រី រដ្ឋលេខាធិការ អនុរដ្ឋលេខាធិការ អភិបាលរងរាជធានី ខេត្ត ជាប្រធានគណៈកម្មាធិការប្រយុទ្ធនឹងជំងឺអេដស៍ក្រសួង ស្ថាប័ន រាជធានី ខេត្ត និងជាប្រធានលេខាធិការដ្ឋានប្រយុទ្ធនឹងជំងឺអេដស៍ក្រសួង ស្ថាប័ន រាជធានី ខេត្ត ជាតំណាងអង្គការសហប្រជាជាតិ អង្គការសង្គមស៊ីវិល ភ្ញៀវជាតិ និងអន្តរជាតិ សរុបប្រមាណ១៧០នាក់។
បន្ទាប់ពីស្តាប់របាយការណ៍ និងគោលបំណងនៃសន្និបាតដែលថ្លែងដោយឯកឧត្តមវេជ្ជ. តែង គន្ធី អគ្គលេខាធិការអាជ្ញាធរជាតិប្រយុទ្ធនឹងជំងឺអេដស៍មក ឯកឧត្តមទេសរដ្ឋមន្រ្តីបានមានប្រសាសន៍បើក     សន្និបាតដោយបញ្ជាក់ថា ជោគជ័យក្នុងការប្រយុទ្ធនឹងជំងឺអេដស៍គឺកើតឡើងដោយសារការចូលរួមពីគ្រប់ ក្រសួងស្ថាប័នថ្នាក់ជាតិ និងរដ្ឋបាលថ្នាក់ក្រោមជាតិ ម្ចាស់ជំនួយ ដៃគូអភិវឌ្ឍន៍ អង្គការសង្គមស៊ីវិល អ្នក ពាក់ព័ន្ធ និងការឆ្លើយតបជាលក្ខណៈពហុវិស័យ។ ឯកឧត្តមបានបន្តថា កាលពីម្សិលមិញ កិច្ចប្រជុំពេញអង្គអាជ្ញាធរជាតិប្រយុទ្ធនឹងជំងឺអេដស៍ លើកទី២ ឆ្នាំ២០១៨ បានពិភាក្សា និងអនុម័តរួចទៅហើយនូវសេចក្តីសម្រេចចំនួន៨ចំណុច ដែលអាចប្រើប្រាស់ជាទស្សនទានក្នុងការរៀបចំផែនការសកម្មភាពទូលំទូលាយ និងពហុវិស័យឆ្លើយតបទៅនឹងការរាលដាលមេរោគអេដស៍ និងជំងឺអេដស៍ ក្នុងឆ្នាំ២០១៩ខាងមុខ។ សេចក្តីសម្រេចចំនួន៨ចំណុចរួមមាន ៖
១.    អាជ្ញាធរជាតិប្រយុទ្ធនឹងជំងឺអេដស៍ ក្រសួង ស្ថាប័នពាក់ព័ន្ធនានា និងដៃគូអភិវឌ្ឍន៍រៀបចំបញ្ចប់ និងដាក់ឱ្យអនុវត្តផែនការយុទ្ធសាស្រ្តជាតិទូលំទូលាយ និងពហុវិស័យឆ្លើយតបទៅនឹងមេរោគអេដស៍ និងជំងឺអេដស៍លើកទី៥ ឆ្នាំ២០១៩-២០២៣ និងយុទ្ធសាស្ត្រជាតិធានាចីរភាព សម្រាប់ឆ្លើយតបការងារប្រយុទ្ធនឹងជំងឺអេដស៍ នៅក្នុងព្រះរាជាណាចក្រកម្ពុជា។
២.    អាជ្ញាធរជាតិប្រយុទ្ធនឹងជំងឺអេដស៍ បញ្ចូលសកម្មភាពដែលបានលើកឡើងនៅក្នុងផែនទីចង្អុលផ្លូវនៃការឆ្លើយតបដោយចីរភាពទៅក្នុងផែនការយុទ្ធសាស្រ្តជាតិទូលំទូលាយ និង ពហុវិស័យឆ្លើយតបទៅនឹងមេរោគអេដស៍ និងជំងឺអេដស៍ លើកទី៥ ឆ្នាំ២០១៩-២០២៣។
៣.    អាជ្ញាធរជាតិប្រយុទ្ធនឹងជំងឺអេដស៍ ត្រូវសហការជាមួយក្រសួងមហាផ្ទៃ និងក្រសួងសេដ្ឋកិច្ច និងហិរញ្ញវត្ថុ ដើម្បីផ្តល់ថវិកាអនុវត្តការបញ្រ្ជាបការងារប្រយុទ្ធនឹងមេរោគអេដស៍ ជំងឺអេដស៍ទៅក្នុងផែនការអភិវឌ្ឍរយៈពេល៥ឆ្នាំ និងកម្មវិធីវិនិយោគ៣ឆ្នាំរំកិលឃុំ សង្កាត់ ។
៤.    ក្រសួងសុខាភិបាល និងក្រសួងផែនការត្រូវកំណត់ថាអ្នកផ្ទុកមេរោគអេដស៍ជាក្រុមប្រជាជនងាយរងគ្រោះដែលត្រូវទទួលបានអត្តសញ្ញាណគ្រួសារក្រីក្រ និងមូលនិធិសមធម៌ដែលធានាដល់ការទទួលបានសេវាថែទាំសុខភាព និងការគាំពារសង្គម។
៥.    ក្រសួងសុខាភិបាល និងក្រសួងសេដ្ឋកិច្ចនិងហិរញ្ញវត្ថុ ត្រូវកែសម្រួល និងរៀបចំវិធាន និងនីតិវិធីក្នុងការផ្តល់ថវិកាដើម្បីឱ្យស្រុកប្រតិបត្តិ មន្ទីរពេទ្យបង្អែក និងមណ្ឌលសុខភាពមានថវិកាផ្ទាល់សម្រាប់ការងារឆ្លើយតបមេរោគអេដស៍ និងជំងឺអេដស៍។
៦.     ទីស្តីការគណៈរដ្ឋមន្ត្រី ក្រសួងមហាផ្ទៃ ក្រសួងសេដ្ឋកិច្ចនិងហិរញ្ញវត្ថុ ក្រសួងសុខាភិបាល និងអាជ្ញាធរជាតិប្រយុទ្ធនឹងជំងឺអេដស៍ ត្រូវទទួលស្គាល់តួនាទីសំខាន់របស់អង្គការសង្គមស៊ីវិលក្នុងការឆ្លើយតបនឹងមេរោគអេដស៍ ជំងឺអេដស៍ និងបន្តគាំទ្រឱ្យមានការចូលរួមបន្តទៀតតាមរយ:ការផ្តល់មូលនិធិពីរាជរដ្ឋាភិបាល តាមលទ្ធភាពថវិកាជាតិ។
៧.    ឧត្តមក្រុមប្រឹក្សាសេដ្ឋកិច្ចជាតិត្រូវសិក្សាលំហថវិកា ដើម្បីធានាការអនុវត្តការប្តេជ្ញាចិត្តរបស់រាជរដ្ឋាភិបាលក្នុងការបញ្ចប់បញ្ហាអេដស៍នៅក្នុងឆ្នាំ២០២៥។
៨.    ក្រសួងសុខាភិបាលត្រូវបន្តពង្រឹងធនធានមនុស្ស ការធ្វើលទ្ធកម្ម ការផ្គត់ផ្គង់ឱសថបរិក្ខារ និងប្រព័ន្ធព័ត៌មាន ដើម្បីបញ្ជ្រាបការឆ្លើយតបការរាលដាលមេរោគអេដស៍ និងជំងឺអេដស៍ឱ្យកាន់តែមានប្រសិទ្ធភាព និងធានាចីរភាព។

នៅថ្ងៃនេះ យើងស្តាប់បទបង្ហាញអំពី ៖ ១) របាយការណ៍វឌ្ឍនភាព និងសមិទ្ធផលនៃការអនុវត្តគម្រោងផែនការសកម្មភាពទូលំទូលាយ និងពហុវិស័យឆ្លើយតបទៅនឹងការរាលដាលមេរោគអេដស៍ និងជំងឺអេដស៍ប្រចាំឆ្នាំ២០១៨ ២) ទិសដៅជាគោលការណ៍ក្នុងការរៀបចំ គម្រោងផែនការយុទ្ធសាស្រ្ត៥ឆ្នាំ (២០១៩-២០២៣) និង៣) ការចូលរួមបង្ហាញនូវមេរៀនជាបទពិសោធន៍ដោយឡែក និងជាក់ស្តែងដែលបានចងក្រងដោយសមាជិកសមាជិកាអាជ្ញាធរជាតិប្រយុទ្ធនឹងជំងឺអេដស៍ទាំងនៅថ្នាក់ជាតិ និងថ្នាក់ក្រោមជាតិ ដែលក្នុងនោះមានបទបង្ហាញពី ក្រសួងបរិស្ថាន ក្រសួងទេសចរណ៍ ក្រសួងអប់រំ យុវជន និងកីឡា និងបទបង្ហាញពីខេត្តបាត់ដំបង ខេត្តព្រះសីហនុ និងរាជធានីភ្នំពេញ រួមជាមួយនឹងបទបង្ហាញពីអង្គការមិនមែនរដ្ឋាភិបាលតំណាងដោយអង្គការ AHF ផងដែរ។
ក្រោយពីអង្គសន្និបាតស្តាប់នូវបទបង្ហាញរួចមក ឯកឧត្តមទេសរដ្ឋមន្រ្តីបានស្នើឱ្យតំណាងគណៈ កម្មាធិការប្រយុទ្ធនឹងជំងឺអេដស៍ក្រសួង ស្ថាប័ន លើកជាសំណួរ ឬមានយោបល់។ ក្នុងនោះមានការលើក ឡើងអំពីការឆ្នៃប្រឌិតក្នុងការបញ្រ្ជាបការយល់ដឹងនៅក្នុងការងារប្រយុទ្ធនឹងជំងឺអេដស៍ តាមរយៈ ការជួបប្រជុំដោយមិនបាច់ចំណាយថវិកាច្រើន ការផ្សព្វផ្សាយតាមទំព័រអ៊ីនធឺណេត តាមបណ្តាញទំនាក់ទំនងសង្គម ផ្ទាំងផ្សព្វផ្សាយនៅតាមដងផ្លូវ ជាពិសេសច្រកចេញតាមផ្លូវជាតិជាដើម។
មុននឹងបញ្ចប់ ឯកឧត្តមទេសរដ្ឋមន្រ្តីបានជំរុញឱ្យគណៈកម្មាធិការប្រយុទ្ធនឹងជំងឺអេដស៍ក្រសួង ស្ថាប័ន រាជធានី ខេត្ត លើកសំណើថវិកាទៅក្រសួងស្ថាប័នផ្ទាល់ក្នុងការឆ្លើយតបនឹងមេរោគអេដស៍ ជំងឺអេដស៍ ដើម្បីធានានិរន្តរភាពក្នុងការឆ្លើយតបនឹងមេរោគអេដស៍នៅកម្ពុជា។ ឯកឧត្តមទេសរដ្ឋមន្រ្តីបាន     សម្តែងនូវការអបអរសាទរ និងកោតសរសើរចំពោះគណៈកម្មាធិការប្រយុទ្ធនឹងជំងឺអេដស៍នៅតាមក្រសួងដែលបានទទួលថវិកាយកមកអនុវត្តកម្មវិធីរួចហើយ និងស្នើឱ្យគណៈកម្មាធិការដែលមិនទាន់បានទទួលថវិកា ឬមិនទាន់បានលើកសំណើ បន្ត និងចាប់ផ្តើមលើកសំណើ។

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច

ឯកឧត្តមទេសរដ្ឋមន្រ្តី អៀង មូលី ៖ ជោគជ័យក្នុងការប្រយុទ្ធនឹងជំងឺអេដស៍គឺដោយសារការចូលរួមពីយើងទាំងអស់គ្នា