ឯកឧត្តមទេសរដ្ឋមន្រ្តី អៀង មូលី បានទទួលជួបពិភាក្សាការងារ ជាមួយលោកស្រី CHRISTINA LAU ប្រធានការិយាល័យសុខាភិបាល និងអប់រំ នៃទីភ្នាក់ងារអភិវឌ្ឍអន្តរជាតិសហរដ្ឋអាមេរិកប្រចាំនៅកម្ពុជា នារសៀលថ្ងៃអង្គារ ៩រោច ខែអស្សុជ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី២២ ខែតុលា ឆ្នាំ២០១៩ នៅអាជ្ញាធរជាតិប្រយុទ្ធនឹងជំងឺអេដស៍ លោកស្រី CHRISTINA LAU ប្រធានការិយាល័យសុខាភិបាល និង អប់រំ នៃទីភ្នាក់ងារអភិវឌ្ឍអន្តរជាតិ សហរដ្ឋអាមេរិក ប្រចាំព្រះរាជាណាចក្រកម្ពុជា បានអញ្ជើញជួបពិភាក្សាការងារ និងជំរាបលា ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ ខណៈលោកស្រីបញ្ចប់អណត្តិការងារនៅព្រះរាជាណាចក្រកម្ពុជា ។
លោកស្រី CHRISTINA LAU បានជំរាបលា ឯកឧត្តមទេសរដ្ឋមន្រ្តី ខណៈលោកស្រីបានបញ្ចប់បេសកកម្មនៅកម្ពុជា។ លោកស្រី បានថ្លែងអំណរគុណយ៉ាងជ្រាលជ្រៅ ជូនឯកឧត្តមទេសរដ្ឋមន្រ្តី ដែលបានគាំទ្រ និងបានផ្តល់កិច្ចសហការយ៉ាងជិតស្និត ជាមួយលោកស្រី និងទីភ្នាក់ងារអភិវឌ្ឍអន្តរជាតិសហរដ្ឋអាមេរិក នៅព្រះរាជាណាចក្រកម្ពុជា ដើម្បីចូលរួមចំណែកក្នុងការប្រយុទ្ធនឹងការចម្លងរាលដាលមេរោគអេដស៍ នឹងឆ្លើយតបទៅនឹងជំងឺអេដស៍ ក៏ដូចជាការបំពេញភារកិច្ចរបស់លោកស្រី ជាសមាជិកគណៈកម្មាធិការសម្របសម្រួលគម្រោងកម្មវិធីមូលនិធិសកលប្រយុទ្ធនឹងជំងឺអេដស៍ ជំងឺរបេង និងជំងឺគ្រុនចាញ់ នៅកម្ពុជា និងក្នុងនាមជាសហប្រធានក្រុមការងារបច្ចេកទេសប្រយុទ្ធនឹងជំងឺអេដស៍។
ឯកឧត្តមទេសរដ្ឋមន្រ្តី បានមានប្រសាសន៍ ស្នើសុំលោកស្រី និងសហការីទទួលការងារបន្តពីលោកស្រី សូមបន្តផ្តល់ជំនួយ និងគាំទ្រកម្ពុជាអោយបានខ្លាំងក្លាជាបន្តទៀត បើទោះជាកម្ពុជាបានទទួលជោគជ័យធំៗ និងមានការកោតសសើរពីអង្គការសហប្រជាជាតិ និងដៃគូអភិវឌ្ឍ នាពេលកន្លងមកនេះក្តី ពីព្រោះ មេរោគអេដស៍ និងជំងឺអេដស៍ នៅតែជាជំងឺគម្រាមកំហែងដល់សុខមាលភាព និង អាយុជីវិតប្រជាជនកម្ពុជានៅឡើយ។
ឯកឧត្តមទេសរដ្ឋមន្រ្តី ក៏បានជូនពរ លោកស្រី CHRISTINA LAU ឲ្យទទួលបានជោគជ័យបន្ថែមទៀតក្នុងភារកិច្ចថ្មីរបស់លោកស្រី។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
