National AIDS Authority

ចំនួនអ្នកទស្សនាគេហទំព័រ:

ឯកឧត្តមទេសរដ្ឋមន្ត្រី អៀង មូលី អញ្ជើញជាអធិបតី និងដឹកនាំកិច្ចប្រជុំពេញអង្គអាជ្ញាធរជាតិប្រយុទ្ធនឹងជំងឺអេដស៍ លើកទី២ ឆ្នាំ២០១៩

នាព្រឹកថ្ងៃអង្គារ ៩កើត ខែកត្តិក ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៥ ខែវិច្ឆិកា ឆ្នាំ២០១៩ នៅសាលប្រជុំ វិមានមិត្តភាពនៃទីស្តីការគណៈរដ្ឋមន្ត្រី អាជ្ញាធរជាតិប្រយុទ្ធនឹងជម្ងឺអេដស៍ បានរៀបចំនូវកិច្ចប្រជុំពេញអង្គលើកទី២ ឆ្នាំ២០១៩ ក្រោមអធិបតីភាពដ៏ខ្ពង់ខ្ពស់របស់ ឯកឧត្តម អៀង មូលី ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានអាជ្ញាធរជាតិប្រយុទ្ធនឹងជំងឺអេដស៍។

កិច្ចប្រជុំពេញអង្គអាជ្ញាធរជាតិប្រយុទ្ធនឹងជំងឺអេដស៍ គឺជាកិច្ចប្រជុំប្រចាំឆមាស ដែលត្រូវបានចូលរួមដោយ ឯកឧត្តម លោកជំទាវ រដ្ឋលេខាធិការ លោក លោកស្រី អភិបាលរង រាជធានី ខេត្ត ជាប្រធានគណៈកម្មាធិការប្រយុទ្ធជំងឺអេដស៍ក្រសួង ស្ថាប័ន និង រដ្ឋបាលរាជធានី-ខេត្ត និង ជាសមាជិក សមាជិកាក្រុមប្រឹក្សាគោលនយោបាយពហុវិស័យប្រយុទ្ធនឹងជំងឺអេដស៍។

កិច្ចប្រជុំមានគោលបំណង ពិនិត្យបច្ចុប្បន្នភាពនៃស្ថានភាពឆ្លងរាលដាលនៃមេរោគអេដស៍ នៅក្នុងឆមាសទី២ ឆ្នាំ២០១៩ និង ពិនិត្យមើលនូវលទ្ធផលការងារប្រយុទ្ធនឹងជំងឺអេដស៍ ដែលសម្រេចបានក្នុង ឆមាស។ កិច្ចប្រជុំពេញអង្គក៏បានពិភាក្សា សម្រេចដាក់ចេញទិសដៅគោលនយោបាយពហុវិស័យ ប្រយុទ្ធនឹងជំងឺអេដស៍ សំរាប់ឆមាសទី១សំរាប់ឆ្នាំ២០២០ខាងមុខ។
ឯកឧត្តមទេសរដ្ឋមន្រ្តី បានក្រើនរំលឹកកិច្ចប្រជុំពេញអង្គថា រាជរដ្ឋាភិបាលកម្ពុជាបានសម្រេចជាគោលការណ៍ប្រកបដោយការប្តេជ្ញាចិត្តខ្ពស់ក្នុងការលុបបំបាត់ជំងឺអេដស៍ តាមរយៈការកំណត់យ៉ាងច្បាស់លាស់នូវគោលដៅសូន្យបី គឺ “គ្មានការឆ្លងមេរោគអេដស៍ថ្មី” “គ្មានការរើសអើងចំពោះអ្នកផ្ទុកមេរោគអេដស៍” និង “គ្មានការស្លាប់ដោយសារជំងឺអេដស៍” នៅត្រឹមឆ្នាំ២០២៥។

យើងក៏បាននិងកំពុងតែធ្វើដំណើររួមគ្នាប្រកបដោយទស្សនវិស័យច្បាស់លាស់ ក្នុងក្តីសង្ឃឹមពិតប្រាកដឆ្ពោះទៅរកការលុបបំបាត់ជំងឺអេដស៍។ នេះក៏ដោយសារតែប្រទេសកម្ពុជាយើងមាននូវកត្តាចាំបាច់ដ៏មានប្រសិទ្ធភាពខ្ពស់រួចទៅហើយគឺ ការប្តេជ្ញាចិត្តគាំទ្រជានយោបាយដ៏ខ្ពង់ខ្ពស់របស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា។
បន្ទាប់ពីបានស្តាប់របាយការណ៍ បទបង្ហាញ និងក្រោយពីបានពិភាក្សាផ្លាស់ប្តូរមតិយោបល់ រួចមក កិច្ចប្រជុំពេញអង្គរបស់យើងបាន៖
ទី១ :    ការអនុម័តជាគោលការណ៍នូវរបាយការណ៍វឌ្ឍនភាព ប្រសិទ្ធភាព និងសមិទ្ធផលក្នុង ការឆ្លើយតបជាតិទូលំទូលាយ និងពហុវិស័យទៅនឹងការរាលដាលមេរោគអេដស៍ និងជំងឺអេដស៍ រយៈពេល៦ខែចុងឆ្នាំ២០១៩។
ទី២ :    ការអនុម័តជាគោលការណ៍នូវ ផែនការយុទ្ធសាស្រ្តទូលំទូលាយ និងពហុវិស័យឆ្លើយតបនឹងមេរោគអេដស៍ និងជំងឺអេដស៍ ឆ្នាំ២០១៩-២០២៣។
ទី៣ :     ការបន្តជំរុញឱ្យមានវឌ្ឍនភាព និងការបន្តការអនុវត្ត “សេចក្តីជូនដំណឹងលេខ ២១៣ សជណ.សស” ចុះថ្ងៃទី២១ ខែកុម្ភៈ ឆ្នាំ២០១៩ របស់ទីស្តីការគណៈរដ្ឋមន្ត្រីស្តីពីវិធានការទាក់ទងនឹងការឆ្លើយតបនឹងមេរោគអេដស៍និងជំងឺអេដស៍។
ទី៤ :        ការអនុម័ត សេចក្តីសម្រេចចិត្តនៃកិច្ចប្រជុំពេញអង្គអាជ្ញាធរជាតិប្រយុទ្ធនឹងជំងឺអេដស៍លើកទី២ ឆ្នាំ២០១៩ សម្រាប់បន្តអនុវត្តក្នុងការឆ្លើយតបនឹងមេរោគអេដស៍ និងជំងឺអេដស៍ ឆ្ពោះទៅសម្រេចបាននូវគោលដៅ៩៥-៩៥-៩៥ នាឆ្នាំ២០២៥។

ជាមួយលទ្ធផលទទួលបានគួរជាទីមោទនៈនាពេលកន្លងមកនេះ កិច្ចប្រជុំពេញអង្គបានចូលរួមអបអរសាទរចំពោះក្រសួងសេដ្ឋកិច្ច និងហិរញ្ញវត្ថុ ក្រសួងមហាផ្ទៃ ក្រសួងសុខាភិបាល ក្រសួងផែនការ និងក្រសួង ស្ថាបន័ពាក់ពន្ធ័ទាំងអស់ ដែលបានចូលរួមជំរុញឱ្យមានកិច្ចប្រជុំសម្របសម្រួលនានា និងចូលរួមចំណែកប្រតិបត្តិ តាមសេចក្តីណែនាំរបស់រាជរដ្ឋាភិបាល ដែលបានចែងក្នុង“សេចក្តីជូនដំណឹងលេខ២១៣ សជណ.សស”ចុះថ្ងៃទី២១ ខែកុម្ភៈ ឆ្នាំ២០១៩របស់ទីស្តីការគណៈរដ្ឋមន្ត្រីស្តីពីវិធានការទាក់ទងនឹងការឆ្លើយតបនឹងមេរោគអេដស៍ និងជំងឺអេដស៍។ មកទល់ពេលនេះ យើងទទួលបាននូវលទ្ធផលគួរជាទីមោទនៈ។
ឯកឧត្តមទេសរដ្ឋមន្រ្តី បានថ្លែងការកោតសសើរ និងលើកទឹកចិត្តក្រសួងសេដ្ឋកិច្ច និងហិរញ្ញវត្ថុឱ្យបន្តជួយបង្កើន និងសម្របសម្រួលដល់ការប្រើប្រាស់ថវិកាជាតិ ក្នុងការងារប្រយុទ្ធនឹងជំងឺអេដស៍ និង ជ្រោមជ្រែងជួយគណៈកម្មាធិការប្រយុទ្ធនឹងជំងឺអេដស៍ រាជធានី-ខេត្ត ឱ្យបន្តជំរុញនិងចូលរួមសហការជាមួយរដ្ឋបាលថ្នាក់ក្រោមជាតិ ជាពិសេសអាជ្ញាធរឃុំ សង្កាត់ ក្នុងការអនុវត្ត “សេចក្តីជូនដំណឹងលេខ ២១៣ សជណ.សស សំរាប់អនុវត្តនៅរដ្ឋបាលថ្នាក់ក្រោមជាតិ។

ឯកឧត្តមទេសរដ្ឋមន្រ្តី ប្រធានអាជ្ញាធរជាតិប្រយុទ្ធនឹងជំងឺអេដស៍ បានបន្តអំពាវនាវ ស្នើសុំបងប្អូនជនរួមជាតិគ្រប់ស្រទាប់ ការពារខ្លួន ទទួលខុសត្រូវខ្លួនឯងជាចំបង កុំអោយឆ្លងមេរោគអេដស៍ និង កាត់ផ្តាច់ការចម្លងមេរោគអេដស៍ ទៅសមាជិកក្រុមគ្រួសារ ឬអ្នកដែលខ្លួនមានសម្ព័ន្ធភាពផ្លូវភេទ ដោយប្រើប្រាស់ស្រោមអនាម័យអោយបានជាប់លាប់ និងត្រឹមត្រូវ ទៅធ្វើពិនិត្យឈាមរកមេរោគអេដស៍បើសិនសង្ស័យថាបានប្រឈមឆ្លងមេរោគ។ កុំបាក់ទឹកចិត្ត ប្រសិនលទ្ធផលពិនិត្យឈាមវិជ្ជមាន បញ្ជាក់ថា ខ្លួនបានជ្រុលឆ្លងមេរោគអេដស៍ សូមឆាប់ទៅទទួលសេវាព្យាបាលភ្លាមៗ តាមការណែនាំ របស់គ្រូពេទ្យ ។

ជាចុងក្រោយ ឯកឧត្តម ក៏បានស្នើសុំ ក្រសួង ស្ថាប័ន ផ្នែកពាក់ព័ន្ធទាំងអស់ បុគ្គលគ្រប់ៗរូប បន្តចូលរួមជា “ចរន្តជាតិមួយ” ក្នុងការទប់ស្កាត់ការរីករាលដាលមេរោគអេដស៍ និងជំងឺអេដស៍ តាមអនុសាសន៍ដ៏ខ្ពង់ខ្ពស់បំផុតរបស់ សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា។

ព័ត៌មានផ្សព្វផ្សាយនៅទូរទស្សន៍ ទទក

ព័ត៌មានផ្សព្វផ្សាយនៅទូរទស្សន៍ BTV NEWS

ព័ត៌មានផ្សព្វផ្សាយនៅទូរទស្សន៍ អប្សរា

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច