National AIDS Authority

ចំនួនអ្នកទស្សនាគេហទំព័រ:

គណបក្សប្រជាជនកម្ពុជាស្រុកបរសេដ្ឋ ប្រារព្ធមិទ្ទិញអបអរសាទរខួបអនុស្សាវរីយ៍ លើកទី៤១ ទិវាកំណើតរណសិរ្សសាមគ្គី អភិវឌ្ឍន៍មាតុភូមិកម្ពុជា ២ ធ្នូ ១៩៧៨-២ ធ្នូ ២០១៩ ក្រោមអធិបតីភាពរបស់ ឯកឧត្តមទេសរដ្ឋមន្រ្តី អៀង មូលី ប្រធានក្រុមការងារថ្នាក់កណ្ដាល

នៅព្រឹកថ្ងៃអាទិត្យ ១២កើត ខែមិគសិរ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី៨ ខែធ្នូ ឆ្នាំ ២០១៩ នៅទីស្នាក់ការគណបក្សប្រជាជនកម្ពុជាស្រុកបរសេដ្ឋ ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និងជាប្រធានក្រុម ការងារថ្នាក់កណ្ដាលចុះជួយស្រុកបរសេដ្ឋ បានអញ្ជើញជាអធិបតីក្នុងមិទ្ទិញអបអរសាទរខួបអនុស្សាវរីយ៍ លើកទី៤១ ទិវាកំណើតរណសិរ្សសាមគ្គី អភិវឌ្ឍន៍មាតុភូមិកម្ពុជា (២ ធ្នូ ១៩៧៨-២ ធ្នូ ២០១៩)។ មិទ្ទិញនេះ មានការចូលរួមពីឯកឧត្តម លោកជំទាវ និងអស់លោក លោកស្រី នាងកញ្ញាជា ប្រធាន អនុប្រធាន សមាជិកក្រុមការងារចុះជួយស្រុក ឃុំ ក្រុមប្រឹក្សាស្រុក គណៈកម្មាធិការបក្សស្រុក មេឃុំ ប្រធានបក្សឃុំ ស្មៀនឃុំ ប៉ុស្តិ៍រដ្ឋបាលឃុំ លោកគ្រូ អ្នកគ្រូ កងកម្លាំងប្រដាប់អាវុធ យុវជនកាយរិទ្ធិ យុវជនសហភាពសហព័ន្ធយុវជនកម្ពុជា និងយុវជនកាកបាទក្រហមកម្ពុជា ចំនួន២២០នាក់។

បន្ទាប់ពីលោកប្រធានស្តីទីគណបក្សស្រុកអានសុន្ទរកថាសម្តេចអគ្គមហាពញាចក្រី ហេង សំរិន ប្រធានរដ្ឋសភា ប្រធានកិត្តិយសគណបក្សប្រជាជនកម្ពុជា និងប្រធានក្រុមប្រឹក្សាជាតិរណសិរ្សសាមគ្គី អភិវឌ្ឍន៍មាតុភូមិកម្ពុជា និងយុវជនឡើងប្តេជ្ញាចិត្តមក ឯកឧត្តមទេសរដ្ឋមន្ត្រីបានមានប្រសាសន៍ថា មានថ្ងៃ២ធ្នូ ទើបមាន៧មករា និងទើបមាន២៣ តុលា ១៩៩១។ គុណសម្បត្តិមេដឹកនាំ២ធ្នូគឺលែងគិតពីស្លាប់ ដោយយកជីវិតធ្វើជាដើមទុន។ ឯកឧត្តមបានបន្តថា សម័យប៉ុល ពត មានតែបបរទេ ការរស់នៅវេទនាណាស់ និងគ្មានសិទ្ធិសេរីភាពអ្វីទាំងអស់។ បើមានទោសត្រូវយកទៅសម្លាប់ចោលទៀត។ កុំនិយាយដល់ការតស៊ូគឺរឹតតែពិបាកថែមទៀត ដោយយើងគ្មានស្បៀង និងកម្លាំង។ តែយើងមានភ័ព្វសំណាងដោយមានសម្តេចទាំង៣រូបដែលបានប្តូរផ្តាច់ដឹកនាចលនាតស៊ូរំដោះជាតិ។

បើស្តាប់ពួក ប៉ុល ពត គឺមួយម៉ាត់ណាក៏ស្នេហា ជាតិដូចពួកអតីតបក្សសង្រ្គោះជាតិបច្ចុប្បន្នដូច្នោះដែរ។ តែអ្វីដែលគេបានធ្វើគឺគេចង់រំលាយសង្គមចាស់។ អ្នកដែលស្រែកថាស្នេហាជាតិណាស់ តែបែរជាធ្វើអ្វីៗបំផ្លាញជាតិ និងដើម្បីតែអំណាចប៉ុណ្ណោះ។ យើងឃើញហើយ ពួកប្រឆាំងដើរប្រាប់អឺរ៉ុបថាឱ្យផ្តាច់ EBA (Everything But Arms) ខ្មែរយើង គឺគេចង់បំផ្លាញឆ្នាំងបាយពលរដ្ឋខ្មែរ។ រឿង EBA បានបង្ហាញពីចរិតក្បត់ជាតិរបស់ពួកប្រឆាំង ដែលចង់ឱ្យប្រទេសធំៗគាបសង្កត់កម្ពុជា។

ឯកឧត្តមទេសរដ្ឋមន្ត្រីបានបញ្ជាក់ថា រាជរដ្ឋាភិបាលបានទប់ស្កាត់និងធ្វើឱ្យការអនុវត្តផែនការរដ្ឋប្រហារ៩វិច្ឆិការបស់ សម រង្ស៊ី និងបក្សពួកទទួលបរាជ័យទាំងស្រុង។ ពួកគេអត់មានសមត្ថភាពដឹកនាំ អត់មានអ្នកគាំទ្រ និងបរាជ័យរកអ្វីមកនិយាយមិនកើត។ ឥឡូវដល់រឿង កឹម សុខា ម្តង។ ខ្លួនឯងស្រែកថា បានទទួលការណែនាំឱ្យធ្វើការផ្តួលរំលំរបប។ ប៉ុន្តែ បែរជាចោទថារាជរដ្ឋាភិបាលដាក់ទោសដើម្បីបំបិទសិទ្ធិសេរីភាព និងបំផ្លាញលទ្ធិប្រជាធិបតេយ្យទៅវិញ។

ឯកឧត្តមបានបន្តថា កិច្ចព្រមព្រៀងទីក្រុងប៉ារីស បានធ្វើឱ្យយើងទទួលបានរដ្ឋធម្មនុញ្ញ លទ្ធិប្រជាធិបតេយ្យសេរីពហុបក្ស និងមានការបោះឆ្នោតទៀងទាត់រៀងរាល់ ៥ឆ្នាំម្តង។ តែក្រោយការបោះឆ្នោតឆ្នាំ១៩៩៣ យើងមិនបានសុខសន្តិភាពទាំងស្រុងទេ។ ដោយខ្មែរក្រហមមិនបានចូលរួមក្នុងការបោះឆ្នោត ហើយនៅបន្តធ្វើសង្គ្រាមដើម្បីទាមទារចែកអំណាច។ ពួកខ្មែរក្រហមមិនជឿលើការបោះឆ្នោតទេ។ ប៉ុន្តែនៅទីបំផុត គឺនៅថ្ងៃទី២៩ ខែធ្នូ ឆ្នាំ១៩៩៨ យើងបានសន្តិភាពពេញបរិបូណ៌ និងជារៀងរហូតមក។ ពេលនោះ ពួកមេដឹកនាំខ្មែរក្រហមបានមកចុះចូលជាមួយរាជរដ្ឋាភិបាល។ ដោយសារមានសុខសន្តិភាព ទើបយើងមានការអភិវឌ្ឍ។ អនាគតទៅមានតែការអភិវឌ្ឍទេ ដែលធ្វើឱ្យកម្រិតជីវភាពយើងល្អប្រសើរ។ បើនិយាយពីស្រុកបរសេដ្ឋ តាមរបាយការណ៍របស់លោកប្រធានស្តីទីបក្សស្រុក យើងមានកម្មករដល់ទៅជាង ៣ម៉ឺននាក់។ ហើយយើងមានបង្កើតរោងចក្រ៣ ដែលរោងចក្រមួយនោះអាចមានកម្មករប្រមាណ៦ពាន់នាក់។ ដូច្នេះ ក្នុងមួយខែ ប្រាក់ខែកម្មករចូលស្រុកបរសេដ្ឋមានរាប់លានដុល្លារ។

នៅទីបញ្ចប់ ឯកឧត្តមទេសរដ្ឋមន្ត្រីបានណែនាំថា យើងត្រូវបន្តគាំទ្រគណបក្សប្រជាជនកម្ពុជា។ មានតែគណបក្សប្រជាជនទេដែលការពារជាតិ និងមានសមត្ថភាពដឹកនាំ។ យើងត្រូវបន្តការគាំទ្រចំពោះគណបក្ស ដោយការពារ និងបម្រើប្រជាជន ព្រមទាំងផ្តល់សេវាសាធារណៈ។ យើងត្រូវជៀសវាងការធ្វើឱ្យខូចប្រយោជន៍ប្រជាជន និងបង្កការលំបាកដល់ប្រជាជន ដោយព្យាយាមបន្តធ្វើអំពើល្អ។ មន្ត្រីត្រូវរៀបចំខ្លួនជាខ្ញុំបម្រើរបស់រាស្រ្ត។ បើយើងបម្រើសេវាល្អ នោះគណបក្សប្រជាជនកម្ពុជានឹងបន្តកាន់អំណាចយូរអង្វែងទៅទៀត។

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច