
នៅយប់ថ្ងៃអង្គារ ៦រោច ខែមិគសិរ ឆ្នាំកុរ ឯកស័ក ព.ស.២៥៦៣ ត្រូវនឹងថ្ងៃទី១៧ ខែធ្នូ ឆ្នាំ ២០១៩ នៅស្ថានទូតសហរដ្ឋអាមេរិក ប្រចាំកម្ពុជា ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានចូលរួមពិធីស្វាគមន៍ឯកឧត្តមឯកអគ្គរដ្ឋទូតថ្មីសហរដ្ឋអាមេរិក W. Patrick Murphy ដែលរៀបចំដោយអង្គការUSAID ក្នុងនាមដៃគូអភិវឌ្ឍន៍។ ពិធីនេះក៏មានការចូលរួមពី តំណាងក្រសួងស្ថាប័ននៃរាជរដ្ឋាភិបាលកម្ពុជា អង្គការសង្គមស៊ីវិល អង្គការ សហប្រជាជាតិ និងតំណាងស្ថានទូតនានាផងដែរ។
ឯកឧត្តមឯកអគ្គរដ្ឋទូតថ្មីបានថ្លែងកោតសរសើរកម្ពុជាដែលមានការរីកចម្រើនគ្រប់វិស័យ និងបានសន្យាថាខិតខំរួមដៃជួយជំរុញឱ្យកម្ពុជាបន្តទទួលបាននូវវឌ្ឍនភាពតទៅទៀត នោះគឺ វឌ្ឍនភាពក្នុងចីរភាព ដោយគោរពអធិបតេយ្យភាពកម្ពុជា។ ឯកឧត្តមទេសរដ្ឋមន្ត្រីជូនពរឯកឧត្តមឯកអគ្គរដ្ឋទូត សូមឱ្យបេសកកម្មរបស់ឯកឧត្តមបានទទួលជោគជ័យ ដើម្បីផលប្រយោជន៍នៃប្រទេសយើងទាំងពីរ។