National AIDS Authority

ចំនួនអ្នកទស្សនាគេហទំព័រ:

ជំនួប ឯកឧត្តមទេសរដ្ឋមន្ត្រី អៀង មូលី ជាមួយតំណាងទីភ្នាក់ងារ សហរដ្ឋអាមេរិកសម្រាប់ការអភិវឌ្ឍអន្តរជាតិ

នាព្រឹកថ្ងៃអង្គារ ៤កើត ខែកត្តិក ឆ្នាំជូត ទោស័ក ព.ស.២៥៦៤ ត្រូវនឹងថ្ងៃទី២០ ខែតុលា ឆ្នាំ២០២០ នៅអាជ្ញាធរជាតិប្រយុទ្ធនឹងជំងឺអេដស៍ ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានអនុញ្ញាតអោយក្រុមការងារអនុវត្តគម្រោងថ្មី ប្រព័ន្ធសុខាភិបាលមូលដ្ឋាន (LHSS) ដឹកនាំដោយលោកវេជ្ជ. ចក់ ចន្ថា ចូលជួបសម្តែងការគួរសម ដើម្បីណែនាំក្រុមការងារ និងពិភាក្សាអំពីការបន្ស៊ីគ្នារវាងទស្សនវិស័យរបស់អ.ជ.ប.ជ.អ ជាមួយក្របខណ្ឌសកម្មភាពនៃគម្រោង នៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ (USAID)។

គោលបំណង ៖ ដើម្បីណែនាំក្រុមការងារអនុវត្តគម្រោង និងពិភាក្សាលើទិសដៅគម្រោងការធ្វើឱ្យមានចីរភាពនៃប្រព័ន្ធសុខាភិបាលមូលដ្ឋាន (LHSS) ការគាំទ្រហិរញ្ញប្បទានដោយទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ។

ជាកិច្ចចាប់ផ្តើម ឯកឧត្តមទេសរដ្ឋមន្រ្តី មានប្រសាសន៍ស្វាគមន៍ចំពោះប្រតិភូទាំងអស់ ៖
តួនាទីភារកិច្ចរបស់អាជ្ញាធរជាតិប្រយុទ្ធនឹងជំងឺអេដស៍ គឺមានកិច្ចសហប្រតិបត្តិការយ៉ាងសកម្ម និងមានយន្តការប្រកបដោយសក្តានុពលក្នុងការអនុវត្តកាតព្វកិច្ចជាមួយនឹងក្រសួង ស្ថាប័ន ព្រមទាំងអង្គការដៃគូនានា ដើម្បីដាក់ចេញនូវវិធានការទប់ស្កាត់ ការការពារកុំឱ្យមានជំងឺអេដស៍រីករាលដាល។       ដោយផ្តោតលើចំណុចសំខាន់ៗជាច្រើន ដូចជា ស្ថានភាពនៃការរីករាលដាលមេរោគអេដស៍ ការឆ្លើយតបប្រយុទ្ធនឹងជំងឺអេដស៍        បទពិសោធន៍អនុវត្តសកម្មភាពជាអាទិភាព និងទស្សនវិស័យក្នុងកិច្ចសហប្រតិបត្តិការរឹងមាំជាមួយគ្រប់ដៃគូ។ ក្នុងនោះមានការដាក់អោយអនុវត្តនូវវិធីសាស្រ្តថ្មីៗ និងការបង្ការការឆ្លងមេរោគអេដស៍មុនពេលប្រឈមរបស់សហគមន៍ ក្នុងការបង្ការ ការព្យាបាល និងសេវ៉ាថែទាំសុខភាព។ អ.ជ.ប.ជ.អ បានធ្វើឱ្យមានវឌ្ឍនភាពយ៉ាងល្អក្នុងការពង្រឹងប្រព័ន្ធគាំពារសង្គមដោយធ្វើសមាហរណកម្មប្រកបដោយប្រសិទ្ធភាពដែលគ្របដណ្តប់ទៅលើវិស័យសាធារណៈ និងឯកជន ដោយអនុវត្តតាមផែនការយុទ្ធសាស្រ្តជាតិទូលំទូលាយ និងពហុវិស័យ ឆ្លើយតបនឹងមេរោគអេដស៍ និងជំងឺអេដស៍ រួមបញ្ចូលទាំងតួនាទីច្បាស់លាស់ក្នុងការដាក់ចេញគោលនយោបាយផងដែរ។   អ.ជ.ប.ជ.អ បានអនុវត្តវិធានការទាំង៦នៃសជណលេខ២១៣ ដោយបានចាប់ផ្តើមធ្វើនៅខេត្តកំពង់ស្ពឺ សម្រាប់យកទៅអនុវត្តនៅខេត្តផ្សេងៗទៀត។

ជាកិច្ចបន្ត ឯកឧត្តមទេសរដ្ឋមន្រ្តី បានអនុញ្ញតជូន ប្រតិភូនៃទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ(USAID) មានមតិសំណេះសំណាល ៖
១- លោកវេជ្ជ. ចក់ ចន្ថា ប្រធានក្រុម ផ្នែកពង្រឹងប្រព័ន្ធសុខាភិបាល (USAID) បានលើកឡើងនូវចំណុច    សំខាន់ៗ ដូចជា៖
•    យើងបន្តកិច្ចសហប្រតិបត្តិការ ដើម្បីបញ្ចប់ការចម្លងរាលដាលមេរោគអេដស៍ ដើម្បីឆ្ពោះទៅសម្រេច គោលដៅឆ្នាំ២០២៥។
•    គម្រោងមានបំណងពង្រឹងសមត្ថភាពថ្នាក់ខេត្ត ដើម្បីរៀបចំផែនការសកម្មភាពថ្នាក់ក្រោមជាតិ ផែនការថវិកា ការតាមដាន និងរាយការណ៍ហិរញ្ញវត្ថុ ក្នុងការឆ្លើយតបបញ្ហាសុខភាពទូទៅ រួមនឹងមេរោគអេដស៍ និងជំងឺអេដស៍។
•    កំណត់ពីបញ្ហាប្រឈម ក្នុងការផ្តល់សេវាកម្ម ដើម្បីឆ្លើយតបនឹងជំងឺអេដស៍។
•    ផ្តល់ថវិកាជូនសហគមន៍ក្នុងការចូលរួម និងរក្សានិរន្តរភាព។

២- លោក Nick Edwards ប្រធានគម្រោង LHSS នៃអង្គការ Abt Associates
•    រីករាយនឹងពង្រឹងកិច្ចសហការជាមួយ និងគាំទ្រ អ.ជ.ប.ជ.អ ដើម្បីរៀបចំផែនការសកម្មភាព និងដាក់បញ្ចូលថវិកាឆ្លើយតបនឹងមេរោគអេដស៍ និងជំងឺអេដស៍ នៅថ្នាក់ក្រោមជាតិ។
•    ពង្រឹងសមត្ថភាពដល់មន្រ្តី អ.ជ.ប.ជ.អ ដើម្បីត្រួតពិនិត្យវឌ្ឍនភាពនៃការអនុវត្តសេចក្តីជូនដំណឹងលេខ២១៣ សជណ.សស ការប្រមូលទិន្នន័យ ការក្សា និងការវិភាគទិន្នន័យ ឆ្ពោះទៅរក្សានិរន្តរភាពនៃការឆ្លើយតបនឹងមេរោគអេដស៍។
•    នឹងធ្វើការជាមួយអាជ្ញាធរជាតិប្រយុទ្ធនឹងជំងឺអេដស៍ បង្កើតឱ្យមានប្រព័ន្ធទិន្នន័យជាតិ និងវិភាគ    វឌ្ឍនភាពនៃសេចក្តីជូនដំណឹងលេខ២១៣ សជណ.សស។

៣- លោកវេជ្ជ. ស្រី មុនី ទីប្រឹក្សាជាន់ខ្ពស់ នៃគម្រោង LHSS នៃអង្គការ Abt Associates (Principal Advisor of LHSS of Abt Associates) ។
•    គម្រោងថ្មីនេះនឹងជួយពង្រឹងធនធានមនុស្ស តាមរយៈការបណ្តុះបណ្តាល សិក្ខាសាលា កិច្ចប្រជុំបច្ចេកទេស ដើម្បីចែករំលែកព័ត៌មានជាយុទ្ធសាស្ត្រ។
•    ជួយពង្រឹងប្រព័ន្ធតាមដាន និងវាយតម្លែ លើកផែនការសកម្មភាព។

   បន្ទាប់មក កិច្ចពិភាក្សាបានដំណើរការបន្តក្នុងនោះ ឯកឧត្តមទេសរដ្ឋមន្ត្រី បានមានប្រសាសន៍   សំណេះសំណាល និងផ្តល់នូវអនុសាសន៍លើចំណុចសំខាន់ៗដូចខាងក្រោម ៖
•    អ.ជ.ប.ជ.អ គាំទ្រនូវកញ្ចប់សកម្មភាពធំៗ ដែលគម្រោង LHSS បានលើកឡើង គឺស្របគ្នានឹង   ទស្សនវិស័យ និងទិសដៅការងារដែល អ.ជ.ប.ជ.អ. កំពុងដាក់ចេញ។
•    អ.ជ.ប.ជ.អ កំពុងធ្វើការដើម្បីឱ្យសហគមន៍ចូលរួមប្រកបដោយនិរន្តរភាព និងជម្រុញឱ្យមានដំណោះស្រាយគោលនយោបាយ អាចជួលអ្នកជំនួយការបច្ចេកទេស ដើម្បីបញ្ជ្រាបការងារឆ្លើយតបនឹងមេរោគអេដស៍នៅមូលដ្ឋាន។
•    អ.ជ.ប.ជ.អ បានបញ្រ្ជាបកម្មវិធីអេដស៍ទៅក្នុងផែនការសកម្មភាពការងារ ថ្នាក់ក្រោមជាតិ រាជធានី ខេត្ត ក្រុង ស្រុក ឃុំ សង្កាត់មួយចំនួនហើយ។ ស្នើគម្រោងថ្មីនេះពិនិត្យលទ្ធភាពជួយ អ.ជ.ប.ជ.អ ពង្រីកការងារនេះទៅឱ្យបានច្រើនខេត្ត ស្រុក ខណ្ឌ និងឃុំ សង្កាត់តាមដែលអាចធ្វើបាន ក្នុងរូបភាពជាការគាំទ្រសិក្ខាសាលា វគ្គបណ្តុះបណ្តាល រឺមានការគាំទ្រថ្លៃបេសកកម្មដល់មន្ត្រីយើងចុះទៅធ្វើការ បណ្តុះបណ្តាល។
•    អ.ជ.ប.ជ.អ បានលើកទឹកចិត្តជំរុញឱ្យថ្នាក់ក្រោមជាតិធ្វើបច្ចុប្បន្នភាពគណៈកម្មាធិការអេដស៍រាជធានី ខេត្ត ក្រុង ស្រុក ឱ្យដំណើរការ និងលើកទឹកចិត្តឱ្យមានការប្រជុំជាទៀងទាត់។
•    ស្នើគម្រោងនេះគាំទ្រ អ.ជ.ប.ជ.អ ក្នុងការជួយបណ្តុះបណ្តាលឃុំ សង្កាត់ ឱ្យចេះធ្វើគម្រោងសំណើថវិកា និងចេះប្រើប្រាស់ថវិកា ចេះធ្វើសេវាសង្គម ដែលមានកំណត់ក្នុងសៀវភៅក្រសួងមហាផ្ទៃ ដោយចាប់ផ្តើមពីឃុំទាំងអស់ក្នុងស្រុកបសេដ្ឋ និងយកខេត្តកំពង់ស្ពឺជាគំរូក្នុង ការអនុវត្តកម្មវិធីប្រយុទ្ធនឹងជំងឺអេដស៍។
•    ក្នុងខែកន្លងទៅនេះយើងបានរៀបចំវគ្គបណ្តុះបណ្តាលនៅកំពង់ស្ពឺ ដែលមានសមាសភាពចូលរួមពី អភិបាលខេត្ត ប្រធានមន្ទីរសុខាភិបាល ប្រធានមន្ទីរសេដ្ឋកិច្ច និងហិរញ្ញវត្ថុខេត្ត ប្រធានរតនាគារខេត្ត ប្រធានមន្ទីរពាក់ព័ន្ធ អភិបាលស្រុក មេឃុំ ក្រុមប្រឹក្សា ឃុំ ស្មៀនឃុំ ប្រធានមន្ទីរពេទ្យបង្អែក និងមណ្ឌលសុខភាព។ ការងារបែបនេះនឹងត្រូវធ្វើនៅគ្រប់ខេត្ត នាឆ្នាំថ្មីនេះ ស្របពេលដែលគម្រោង LHSS         ចាប់ផ្តើមអនុវត្ត។

នៅទីបញ្ចប់ ឯកឧត្តមទេសរដ្ឋមន្ត្រី បានថ្លែងអំណរគុណ ដល់ទីភ្នាក់ងារសហរដ្ឋអាមេរិកសម្រាប់ការអភិវឌ្ឍអន្តរជាតិ(USAID)ដើម្បីបន្តកិច្ចសហប្រតិបត្តិការក្នុងការឆ្លើយតបនឹងមេរោគអេដស៍ និងជំងឺអេដស៍ឱ្យកាន់តែប្រសើរឡើងថែមទៀត។
អង្គប្រជុំបានបញ្ចប់នៅវេលាម៉ោង១១:១៥ នាទី ប្រកបដោយបរិយាកាសរីករាយ និងស្និទ្ធស្នាលក្រៃលែង។

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច

ជំនួប ឯកឧត្តមទេសរដ្ឋមន្ត្រី អៀង មូលី ជាមួយតំណាងទីភ្នាក់ងារ សហរដ្ឋអាមេរិកសម្រាប់ការអភិវឌ្ឍអន្តរជាតិ

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច

ជំនួប ឯកឧត្តមទេសរដ្ឋមន្ត្រី អៀង មូលី ជាមួយ​តំណាងទីភ្នាក់ងារ សហរដ្ឋអាមេរិក​សម្រាប់​ការអភិវឌ្ឍ​អន្តរជាតិ

ជំនួប ឯកឧត្តមទេសរដ្ឋមន្ត្រី អៀង មូលី ជាមួយតំណាងទីភ្នាក់ងារ សហរដ្ឋអាមេរិកសម្រាប់ការអភិវឌ្ឍអន្តរជាតិ