National AIDS Authority

ចំនួនអ្នកទស្សនាគេហទំព័រ:

ព្រឹត្តិការណ៍ផ្សព្វផ្សាយអប់រំ ផ្តល់សាររំលឹកអំពីជំងឺអេដស៍ ក្នុងទិវានៃក្ដីស្រឡាញ់១៤ កុម្ភៈ ឆ្នាំ២០២១

នាព្រឹកថ្ងៃពុធ ១៣រោច ខែមាឃ ឆ្នាំជូត ទោស័ក ពុទ្ធសករាជ ២៥៦៤ ត្រូវនឹង ថ្ងៃទី១០         ខែកុម្ភៈ ឆ្នាំ២០២១ នៅទីធ្លាខាងមុខអាជ្ញាធរជាតិប្រយុទ្ធនឹងជំងឺអេដស៍ អាជ្ញាធរជាតិប្រយុទ្ធនឹងជំងឺ អេដស៍បានរៀបចំព្រឹត្តិការណ៍ផ្សព្វផ្សាយអប់រំ ផ្តល់សាររំលឹកអំពីការបង្ការការចម្លងមេរោគអេដស៍ ដែលជាសារដាស់តឿនក្រើនរំឭកដល់សាធារណជនទូទៅ ពិសេសក្រុមប្រជាពលរដ្ឋប្រឈមមុខនឹងការឆ្លងមេរោគអេដស៍ជាងគេ ក៏ដូចជាយុវវ័យ   កុំឱ្យភ្លេចខ្លួន បាត់បង់ការទទួលខុសត្រូវ ភាពម្ចាស់ការ និងជួយខ្លួនឯងកុំឱ្យឆ្លងមេរោគអេដស៍ក្នុងទិវាអន្តរជាតិនៃក្ដីស្រឡាញ់១៤ កុម្ភៈ ក្រោមអធិបតីភាពដ៏ខ្ពង់ខ្ពស់របស់     ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍។

ក្នុងឱកាសនោះ ឯកឧត្តមទេសរដ្ឋមន្ដ្រីបានអញ្ជើញទស្សនានៅតាមបណ្តាស្តង់តាំងពិពណ៌ដែលមានដូចជា ក្រុមបុរសរួមភេទជាមួយបុរស និងក្រុមស្រីស្អាត ឬ Smart Girl ជាដើម។ នៅចំពោះមុខក្រុមបុរសរួមភេទជាមួយបុរស (MSM) ឯកឧត្តម បានថ្លែងលើកទឹកចិត្តឱ្យសកម្មជនទាំងនោះខិតខំបន្តយកចិត្តទុកដាក់ ផ្តល់សារឱ្យកាន់តែទូលំទូលាយដល់ក្រុមបុរសរួមភេទជាមួយបុរស និងក្រុមបំប្លែងភេទ (TG) ដើម្បីឱ្យទប់ស្កាត់ការរីករាលដាលនៃមេរោគអេដស៍ ដោយហេតុថា ចំនួនប្រជាជន ទាំងពីរក្រុមនេះ កំពុងរងផលប៉ះពាល់ដ៏ធ្ងន់ធ្ងរនៃការរីករាលដាលនៃមេរោគអេដស៍។ ចំនួនប្រជាជន ទាំងពីរក្រុមនេះ កំពុងមានការកើនឡើងគួរឱ្យព្រួយបារម្ភ គឺកើនឡើងជាង៣ម៉ឺននាក់ មកជិត៩ម៉ឺននាក់ក្នុងរយៈពេល៤ឆ្នាំកន្លងទៅនេះ។ ឯអត្រាឆ្លងក៏មានកំរិតខ្ពស់ គឺប្រមាណ៤% បើប្រៀបធៀបនឹង អត្រាឆ្លងក្នុងចំណោមប្រជាជនទូទៅដែលមានត្រឹមតែ០.៥%។ នេះជាហានិភ័យខ្ពស់ ដែលជាការព្រួយបារម្ភរបស់យើង។ ជាការឆ្លើយតប យើងត្រូវខិតខំផ្សព្វផ្សាយឱ្យមានការប្រើប្រាស់យ៉ាងទូលំទូលាយនូវស្រោមអនាម័យ និងការធ្វើតេស្តឈាម ដែលសព្វថ្ងៃគេអាចធ្វើបានដោយខ្លួនឯង ហើយនិងប្រើវិធីបង្ការដោយលេបថ្នាំការពារជាមុនដូចជា PreP ជាដើម។
ឯកឧត្តមទេសរដ្ឋមន្ដ្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍បានថ្លែងបញ្ជាក់ចំពោះមុខបណ្តាញទូរទស្សន៍ក្នុងស្រុកថា ប្រសិនបើយើងទប់ស្កាត់ការរីករាលដាលនៃមេរោគអេដស៍ ក្នុងចំណោមបុរសរួមភេទជាមួយបុរស (MSM) និងក្រុមបំប្លែងភេទ (TG) បានយើងប្រាកដជាទទួលជោគជ័យ សម្រេចគោលដៅ ៩៥-៩៥-៩៥ នៅឆ្នាំ២០២៥ ដូចផែនការ។ ទោះជាយ៉ាងណាក៏ដោយ រហូតមកដល់ពេលនេះ ក៏ប្រទេសកម្ពុជាយើង កំពុងឈានមុខនៅក្នុងការប្រយុទ្ធនឹងជំងឺអេដស៍ក្នុងពិភពលោក។ តាមការចេញផ្សាយរបស់អង្គការUNAIDS នៅក្នុងរបាយការណ៍ឆ្នាំ២០២០ បានឱ្យ   ដឹងថា ៖
•    ក្នុងចំណោមប្រជាជនរស់នៅជាមួយមេរោគអេដស៍ (PLHIV) ដែលបានដឹងពីស្ថានភាពនៃ មេរោគអេដស៍របស់ខ្លួន បានទទួលសេវាព្យាបាលដោយថ្នាំប្រឆាំងមេរោគអេដស៍ ប្រទេស   កម្ពុជាយើងឈរក្នុងចំណោមប្រទេសដែលសម្រេចគោលដៅ៩៥ទី២ ដែលគេកំណត់គោលដៅនៅឆ្នាំ២០៣០។
•    ក្នុងចំណោមអ្នកបានទទួលសេវាព្យាបាលដែលគេឃើញថា មេរោគអេដស៍ថយចុះរហូតមើលលែងឃើញ ប្រទេសកម្ពុជាយើងស្ថិតនៅក្នុងចំណោមប្រទេសទី២ ដែលសម្រេចគោលដៅ៩៥ ទី៣ ដែលគេកំណត់ថា ត្រូវសម្រេចឱ្យបាននៅឆ្នាំ២០៣០។
•    ប្រទេសកម្ពុជាឈរមុខគេ ក្នុងចំណោមប្រទេសដែលផ្តល់សេវាបង្ការដល់ក្រុមនារីបម្រើសេវាកម្សាន្ត។
យុទ្ធនាការផ្សព្វផ្សាយអប់រំ បានផ្តល់សារអប់រំ ចែកជូនអាវយឺត ខិត្តប័ណ្ណ/ប័ណ្ណព័ត៌មានអប់រំផ្សព្វផ្យាយពីមេរោគអេដស៍និងជំងឺអេដស៍ ផ្តល់សេវាធ្វើតេស្តឈាមរកមេរោគអេដស៍ និងចែកស្រោម     អនាម័យជូនដោយឥតគិតថ្លៃទៀតផង។
យុទ្ធនាការផ្សព្វផ្សាយអប់រំនេះ បានរៀបចំឡើងដោយមានការសហការជាមួយអង្គការជាដៃគូរ រួមមាន រ៉ាក់, FHI360, AHF, PSI និងអង្គការដៃគូរជាច្រើនទៀត។

ឯកសារសម្រាប់ទាញយក

ចំណងជើង	ទំហំ	ការទាញយកឯកសារ
ព្រឹត្តិការណ៍ផ្សព្វផ្សាយអប់រំ ផ្តល់សាររំលឹកអំពីជំងឺអេដស៍ ក្នុងទិវានៃក្ដីស្រឡាញ់១៤ កុម្ភៈ ឆ្នាំ២០២១	0.86 MB

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច

ព្រឹត្តិការណ៍ផ្សព្វផ្សាយអប់រំ ផ្តល់សាររំលឹកអំពីជំងឺអេដស៍ ក្នុងទិវានៃក្ដីស្រឡាញ់១៤ កុម្ភៈ ឆ្នាំ២០២១