National AIDS Authority

ចំនួនអ្នកទស្សនាគេហទំព័រ:

អាជ្ញាធរជាតិប្រយុទ្ធនឹងជំងឺអេដស៍ រៀបចំកិច្ចប្រជុំថ្នាក់ដឹកនាំប្រចាំខែឧសភាឆ្នាំ២០២១ ក្រោមអធិបតីភាពដ៏ខ្ពង់ខ្ពស់ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរ

នៅព្រឹកថ្ងៃចន្ទ ៦រោច ខែជេស្ឋ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០១ ខែមិថុនា ឆ្នាំ២០២១ ចាប់ពីម៉ោង ៩:០០នាទីព្រឹក អាជ្ញាធរជាតិប្រយុទ្ធនឹងជំងឺអេដស៍ បានរៀបចំកិច្ចប្រជុំថ្នាក់ដឹកនាំប្រចាំខែឧសភា ឆ្នាំ២០២១ ក្រោមអធិបតីភាពដ៏ខ្ពង់ខ្ពស់ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍។ កិច្ចប្រជុំនេះមានការចូលរួមពី ឯកឧត្តម លោកជំទាវ ជាអនុប្រធាន ទីប្រឹក្សា ជំនួយការ អគ្គលេខាធិការ-រង លោក លោកស្រី អ្នកនាងកញ្ញា ជាប្រធាននាយកដ្ឋាន អនុប្រធាននាយកដ្ឋាន ប្រធានការិយាល័យ និងអនុប្រធានការិយាល័យ ចូលរួមតាមបណ្តាញវីដេអូ កម្មវិធី Zoom សរុបចំនួន៥០នាក់/គណនី។

គោលបំណងនៃកិច្ចប្រជុំដើម្បី:
-    ធ្វើបច្ចុប្បន្នភាពនៃសកម្មភាពរបស់ថ្នាក់ដឹកនាំ និងអគ្គលេខាធិការដ្ឋាននៃអាជ្ញាធរជាតិប្រយុទ្ធនឹងជំងឺអេដស៍។
-    ស្ថានភាពរាលដាល និងគោលដៅនៃការឆ្លើយតបនឹងមេរោគអេដស៍ និងបទអន្តរាគមន៍។
-    សមិទ្ធផលដែលសម្រេចបាន និងឧបសគ្គ ក្នុងការអនុវត្តផែនការសកម្មភាព និងផែនការបន្ត។

ជាកិច្ចចាប់ផ្តើម ឯកឧត្តមទេសរដ្ឋមន្រ្តី និងជាប្រធានអង្គប្រជុំ មានប្រសាសន៍ស្វាគមន៍ ដល់មន្រ្តីរាជការទាំងអស់ដែលបានចូលរួម និងបានជម្រាបជូនពីដំណើរការនៃកិច្ចប្រជុំ តាមរបៀបវារៈដូចខាងក្រោម ៖
១- បទបង្ហាញរបាយការណ៍ស្តីពីលទ្ធផលសកម្មភាព ការងាររបស់ថ្នាក់ដឹកនាំ និងអគ្គលេខាធិការដ្ឋាន ប្រចាំខែឧសភា ឆ្នាំ២០២១ ដោយឯកឧត្តម ឈឹម ឃិនដារ៉េត។
២- បទបង្ហាញ ស្តីពីការឆ្ពោះទៅកាន់ការចូលរួមក្នុងកិច្ចប្រជុំអង្គការសហប្រជាជាតិស្តីអំពីជំងឺអេដស៍ឆ្នាំ២០២១
៣- មតិសំណេះសំណាលរបស់ឯកឧត្តម ទេសរដ្ឋមន្ដ្រី
៤- កិច្ចការផ្សេងៗ។

បន្ទាប់មក ឯកឧត្តមទេសរដ្ឋមន្រ្តី បានអនុញ្ញាតជូន ឯកឧត្តម ឈឹម ឃិនដារ៉េត អគ្គលេខាធិការធ្វើ        របាយការណ៍ស្តីពីលទ្ធផលសកម្មភាពការងាររបស់ថ្នាក់ដឹកនាំ និងអគ្គលេខាធិការដ្ឋាននៃអាជ្ញាធរជាតិប្រយុទ្ធនឹងជំងឺអេដស៍ប្រចាំខែឧសភា ឆ្នាំ២០២១ និងលើកទិសដៅសម្រាប់ខែមិថុនា។

ដោយមានការអនុញ្ញាតពី ឯកឧត្តមទេសរដ្ឋមន្រ្តី ឯកឧត្តម ឈឹម ឃិនដារ៉េត អគ្គលេខាធិការ បានធ្វើបទបង្ហាញដោយផ្តោតលើចំណុចសំខាន់ៗស្តីពីលទ្ធផលសកម្មភាពការងារដូចខាងក្រោម ៖

I- បទបង្ហាញរបាយការណ៍ស្តីពីលទ្ធផលសកម្មភាព ការងាររបស់ថ្នាក់ដឹកនាំ និងអគ្គលេខាធិការដ្ឋាន
១- សកម្មភាពការងារដែលសម្រេចបាន ៖
•    បានបើកវគ្គបណ្តុះបណ្តាល ស្តីពីវិធីសាស្ត្ររៀបចំផែនការ វិធីសាស្រ្តគ្រប់គ្រងទិន្នន័យ និងវិធីសាស្រ្តរៀបចំព័ត៌មាន។
•    ជាវាគ្មិនស្តីពីការចូលរួមអបអរសប្តាហ៍មោទនភាពអ្នកស្រឡាញ់ភេទដូចគ្នា និងទិវាអន្តរជាតិប្រឆាំងនឹងការរើសអើងចំពោះអ្នកស្រឡាញ់ភេទដូចគ្នា។
•    រៀបចំកិច្ចប្រជុំក្រុមប្រឹក្សាបច្ចេកទេសលើកទី៥
២- បញ្ហាប្រឈម ៖
•    ស្ថានភាពជំងឺកូវីដ-១៩ នៅតែបន្តផលប៉ះពាល់ដល់ការអនុវត្តសកម្មភាពឆ្លើយតបនឹងមេរោគអេដស៍ និងជំងឺ អេដស៍។
•    មិនអាចផ្តល់សេវាអប់រំដោយផ្ទាល់បាន។
•    មិនអាចចុះទៅជំរុញការងារ FTC នៅតាមខេត្តគោលដៅបាន។
៣- ជំហានសម្រាប់ខែបន្ទាប់ ៖
•    ត្រៀមចូលរួមកិច្ចប្រជុំជាន់ខ្ពស់ ស្តីពីមេរោគអេដស៍ និងជំងឺអេដស៍។
•    រៀបចំកិច្ចប្រជុំក្រុមប្រឹក្សាបច្ចេកទេសលើកទី៦។
•    ត្រៀមរៀបចំកិច្ចប្រជុំពេញអង្គអាជ្ញាធរជាតិប្រយុទ្ធនឹងជំងឺអេដស៍លើកទី១ នាថ្ងៃទី៣០ខែមិថុនា ឆ្នាំ២០២១។
•    រៀបចំកិច្ចប្រជុំក្រុមប្រឹក្សាបច្ចេកទេសលើកទី៥។
•    បន្តវគ្គបណ្តុះបណ្តាលបង្កើនសមត្ថភាពការងារដល់មន្ត្រីអគ្គលេខាធិការដ្ឋាន អ.ជ.ប.ជ.អ។

II- បទបង្ហាញ ស្តីពីការឆ្ពោះទៅកាន់ការចូលរួមក្នុងកិច្ចប្រជុំអង្គការសហប្រជាជាតិស្តីអំពីជំងឺអេដស៍ឆ្នាំ២០២១ ដោយឯកឧត្តម វេជ្ជបណ្ឌិត ទា ផលា អនុប្រធានទទួលបន្ទុកបច្ចេកទេស។
•    កិច្ចប្រជុំជាន់ខ្ពស់នៃមហាសន្និបាតអង្គការសហប្រជាជាតិស្តីពីជំងឺអេដស៍ នឹងកោះប្រជុំចាប់ពីថ្ងៃទី៨ ដល់ថ្ងៃទី១០ ខែមិថុនា ឆ្នាំ២០២១ នៅទីក្រុងញូវយ៉ក សហរដ្ឋអាមេរិក តាមបណ្តាញវីដេអូ។
•    ឯកសារ២០២១ Political Declaration on HIV and AIDS បានចែងដូចគ្នានឹងឯកសារនៅឆ្នាំ២០១៦ ដែរអំពីយុទ្ធសាស្ត្រកាត់បន្ថយគ្រោះថ្នាក់ (Harm Reduction) នៃការឆ្លងមេរោគអេដស៍ក្នុងចំណោមក្រុមប្រជាជនប្រឈមមុខខ្ពស់ ដូចជា អ្នកប្រើគ្រឿងញៀន អ្នករកស៊ីផ្លូវភេទ និងអ្នកស្រលាញ់ភេទដូចគ្នា។
•    របៀបវរៈនៃកិច្ចប្រជុំជាន់ខ្ពស់ មាន៥ចំណុចសំខាន់ៗ ៖
    ការដោះស្រាយវិសមភាពដើម្បីបញ្ចប់ជំងឺអេដស៍៖ ១០ឆ្នាំ ទៅដល់ឆ្នាំ២០៣០។
    ដាក់មនុស្ស និងសហគមន៍ នៅចំណុចកណ្តាលនៃការឆ្លើយតបនឹងជំងឺអេដស៍។
    ធនធាន និងថវិកា សម្រាប់ការឆ្លើយតបនឹងជំងឺអេដស៍ប្រកបដោយប្រសិទ្ធភាព។
    ការលើកកម្ពស់សមភាពយេនឌ័រ និងការផ្តល់អំណាចដល់ស្រ្តី និងក្មេងស្រី ក្នុងការឆ្លើយតបនឹងជំងឺអេដស៍។
    ដោះស្រាយផលប៉ះពាល់នៃជំងឺកូវីត១៩ លើការឆ្លើយតបនឹងជំងឺអេដស៍ និងការកសាងត្រឡប់មកវិញល្អប្រសើរត្រៀមខ្លួនចំពោះរាគត្បាត។
•    ជំងឺកូវីដ-១៩ នៅតែជាបញ្ហា ដែលយើងមិនទាន់អាចចុះបេសកកម្មបាន ជាហេតុបណ្តាលឱ្យមានផលប៉ះពាល់សកម្មភាពសម្រាប់ត្រីមាសទី៣ និងត្រីមាសទី៤។
•    សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តី នៃព្រះរាជាណាចក្រកម្ពុជា អំពាវនាវដល់ជនរួមជាតិទាំងអស់ឱ្យចូលរួមជាមួយរាជរដា្ឋភិបាលក្នុងចរន្តជាតិតែមួយឆោ្ពះទៅការបញ្ចប់ជំងឺអេដស៍នៅឆ្នាំ២០២៥
•    ស្របតាមគោលការណ៍ដែល “មិនទុកនរណាម្នាក់ចោល” យើងប្តេជ្ញាអនុវត្តអភិក្រមដែលផ្តោតលើការយកប្រជាពលរដ្ឋជាគោល។
•    គោលនយោបាយ និងកំណែទម្រង់សំខាន់ៗរបស់រាជរដ្ឋាភិបាល ដូចជាការធានាវិសាលភាពគ្របដណ្តប់សុខភាពសកល ការគាំពារសង្គម និងកិច្ចខិតខំប្រឹងប្រែងដទៃទៀតដែលសំដៅសម្រេចគោលដៅអភិវឌ្ឍប្រកប ដោយចីរភាពនៅកម្ពុជា។
•    លើកគម្រោងថវិកា៨០លាន រៀលក្នុងខេត្តនីមួយៗដែលផ្តល់ជូន គម្រោងទីក្រុងពន្លឿនការឆ្លើយតប (Fast Track City “PNP, BBG, BMC SRP”) ដើម្បីអនុវត្ត សជណ ២១៣ នៅថ្នាក់ ក្រោមជាតិ។

III)- មតិសំណេះសំណាលរបស់ឯកឧត្តមទេសរដ្ឋមន្ដ្រី
   បន្ទាប់មក កិច្ចប្រជុំបានដំណើរការបន្តនៅក្នុងរបៀបវារៈទី៣ ក្នុងនោះឯកឧត្តមទេសរដ្ឋមន្ត្រី បានមានប្រសាសន៍សំណេះសំណាល និងផ្តល់នូវអនុសាសន៍លើចំណុចសំខាន់ៗដូចខាងក្រោម ៖
១- ករណីក្រុមបុរសរួមភេទជាមួយបុរស ដែលមានហានិភ័យខ្ពស់នៃការឆ្លងជំងឺអេដស៍ អាជ្ញាធរជាតិប្រយុទ្ធនឹងជំងឺអេដស៍ ត្រូវគិតគូជួបពិភាក្សាគ្នា និងសិក្សាជាមួយដៃគូគ្រប់លំដាប់ថ្នាក់ ដើម្បីរកវិធីដោះស្រាយ និងទប់ស្កាត់ការឆ្លងមេរោគអេដស៍ និងជំងឺអេដស៍។
២- ឯកឧត្តម លោកជំទាវដែលទទួលបន្ទុកក្រសួង និងខេត្ត ត្រូវណែនាំដល់ថ្នាក់ក្រសួង និងខេត្តឱ្យបន្តអនុវត្ត ស.ជ.ណ.លេខ២១៣ ដើម្បីឆ្ពោះទៅទប់ស្កាត់ការចម្លងថ្មី និងត្រូវរៀបចំផែនការសកម្មភាពអាទិភាពឱ្យស្របគ្នានឹងគោលការណ៍នយោបាយយុទ្ធសាស្រ្តនីមួយៗ ដើម្បីឈានទៅរកភាពជោគជ័យនៃការប្រយុទ្ធនឹងជំងឺអេដស៍។
៣- ចំពោះកញ្ចប់ផែនការសកម្មភាពថវិកា៨០លានរៀល សម្រាប់ខេត្ត គម្រោងទីក្រុងពន្លឿនការឆ្លើយតប ( Fast Track City) រាជធានីភ្នំពេញ ខេត្តបាត់ដំបង សៀមរាប និងបន្ទាយមានជ័យ គឺគោលដៅរបស់អាជ្ញាធរជាតិប្រយុទ្ធនឹងជំងឺអេដស៍     ផ្តល់ជូនទៅគណៈកម្មាធិការប្រយុទ្ធនឹងជំងឹអេដស៍ខេត្ត ដើម្បីមានថវិកាសម្រាប់ធ្វើការងារប្រយុទ្ធនឹងជំងឹអេដស៍។
៣- ក្រសួងនីមួយៗត្រូវធ្វើការងារជំងឺអេដស៍ទៅតាមតួនាទីរបស់ខ្លួន ដូចជាសកម្មភាពរបស់ក្រសួងការបរទេស បានរៀបចំគណៈប្រតិភូ សម្រាប់កិច្ចប្រជុំនៅអង្គការសហប្រជាជាតិ បញ្ជូលខ្លឹមសារនៃសេចក្តីថ្លែងការរបស់កម្ពុជាក្នុងសម័យប្រជុំជាដើម។
៤- កិច្ចប្រជុំជាន់ខ្ពស់នៃមហាសន្និបាតអង្គការសហប្រជាជាតិស្តីពីជំងឺអេដស៍ គឺជាកិច្ចប្រជុំបន្តពីកិច្ចប្រជុំឆ្នាំ២០១៦ ដែលមានគណៈប្រតិភូកម្ពុជាជាច្រើនរូបបានអញ្ជើញទៅចូលរួម ហើយរៀបចំរាល់៥ឆ្នាំម្តងរហូតដល់ឆ្នាំ២០៣០។
៥- ក្នុងអង្គប្រជុំ មានសេចក្តីថ្លែងការណ៍ជាច្រើនចំណុចណាស់ ចំណុចខ្លះធ្វើឱ្យមានការរសើប ដូចជាសិទ្ធមនុស្ស និងការរើសអើង។ ឆ្លើយតបតាមមតិរបស់អង្គការសិទ្ធមនុស្ស សេចក្តីថ្លែងការណ៍នយោបាយមាន៣ចំណុច ទី១). ចង់ឱ្យប្រទេសទាំងអស់កុំឱ្យដាក់ទោសលើអ្នកប្រើគ្រឿងញៀន ទី២). កុំឱ្យដាក់ទោសលើស្រ្តីបម្រើសេវាកម្សាន្ត ទី៣). កុំឱ្យដាក់ទោសចំពោះការរៀបអាពាហ៌ពិពាហ៌រវាងមនុស្សដែលមានភេទដូចគ្នា។    មានប្រទេសខ្លះដែលមានច្បាប់តឹងតែងមិនគាំទ្រនូវសេចក្តីថ្លែងការណ៍ គោលនយោបាយរបស់អង្គការសហប្រជាជាតិដែលបានដាក់នោះទេ ហើយប្រទេសខ្លះបានទាមទារឱ្យប្រទេសកម្ពុជាគាំទ្រគាត់។
៦- គោលជំហររបស់ប្រទេសកម្ពុជា គឺគាំទ្រកម្មវិធីកាត់បន្ថយគ្រោះថ្នាក់ (Harm Reduction) ក្នុងការប្រយុទ្ធទប់ស្កាត់ការរីករាលដាលមេរោគអេដស៍/ជំងឺអេដស៍ ៖
   ទី១)- កម្ពុជាកំពុងតែអនុវត្តកម្មវិធីកាត់បន្ថយគ្រោះថ្នាក់ (Harm Reduction) មានដូចជា៖
•    កម្មវិធីចែកម្ជុលសឺរ៉ាំង ដែលបានអនុញ្ញាតឱ្យអង្គការក្រៅរដ្ឋាភិបាលជាអ្នកចែកចាយដល់អ្នកចាក់គ្រឿងញៀន ដើម្បីទប់ស្កាតការរីករាលដាលមេរោគអេដស៍ កាន់តែខ្លាំងថែមទៀត។
•    កម្មវិធីប្រើប្រាស់ស្រោមអនាម័យ១០០% ដល់ប្រជាជនគន្លឹះ។ កម្មវិធីនេះ ត្រូវបានសម្តេចតេជោ ប្រកាសឱ្យប្រើប្រាស់តាំងពីឆ្នាំ១៩៩៩។
ទី២)- កម្ពុជាមិនដាក់ទោសអ្នកប្រើប្រាស់គ្រឿងញៀន ដែលប្រើក្នុងចំនួនបន្តិចបន្តួច ព្រមទទួលយកការព្យាបាល និងស្តារនីតិសម្បទារ (មាត្រា ១០៥ និង ១០៦ នៃច្បាប់ស្តីពីការត្រួតពិនិត្យគ្រឿងញៀន)។
ទី៣)- កម្ពុជាពុំមានច្បាប់ណាដែលផ្តន្ទាទោស អ្នកស្រឡាញ់ភេទដូចគ្នា ឬអ្នករួមភេទជាមួយអ្នកមានភេទដូចគ្នា (SMS) និងអ្នកបំប្លែងភេទ (TG) ឡើយ។
ទី៤)- ច្បាប់ស្តីពីការបង្ក្រាបអំពើជួញដូរមនុស្ស និងអំពើធ្វើអាជីវកម្មផ្លូវភេទ មិនបានចែងអំពីទោសទណ្ឌលើអំពើពេស្យាចារទេ បើគ្មានអំពើអូសទាញក្នុងទីសាធារណៈ រឺសញ្ចារកម្ម (មាត្រា ២៣, ២៤, ២៥ និង២៦)។
ទី៥)- កម្ពុជាមិនផ្តន្ទាទោសអ្នកជំងឺអេដស៍ទេ ប្រសិនការឆ្លងនោះកើតឡើងដោយអចេតនា (មាត្រា១៨ នៃច្បាប់ស្តី    ពីការបង្ការ និងទប់ស្កាត់ការរីករាលដាលមេរោគអេដស៍/ជំងឺអេដស៍។
៧- កិច្ចប្រជុំថ្ងៃទី០៣ ០៦ ២០២១ ដើម្បីធ្វើបច្ចុបន្បន្នភាព សម្រាប់សមាជិកគណៈប្រតិភូឱ្យបានដឹងពីដំណើរការនៃមហាសន្និបាតអង្គការសហប្រជាជាតិស្តីពីជំងឺអេដស៍ សូមឯកឧត្តម ទា ផលា ធ្វើបទបង្ហាញអំពីកម្មវិធីអេដស៍ វឌ្ឍនភាព បញ្ហាប្រឈម យុទ្ធសាស្រ្តជាតិលើកទី៥ និងស.ជ.ណ២១៣។
៨- ការឧបត្ថម្ភដល់ក្រុមគ្រួសារ ឬបុគ្គលដែលមានអ្នកផ្ទុកមេរោគអេដស៍ មិនត្រូវរក្សាការសម្ងាត់ចំពោះអ្នកផ្តល់សេវា ឬគ្រូពេទ្យព្យាបាលនោះទេ។ ការរក្សាការសម្ងាត់ គឺធ្វើតែចំពោះមនុស្សទូទៅនៃស្ថានភាពសង្គម ឬភូមិសាស្រ្ត បើសង្គមមានការប្រកាន់ ឬមានការរើសអើងខ្លាំង។
៩- កម្ពុជាបានឱ្យតំណាងក្រសួងសេដ្ឋកិច្ច និងហិរញ្ញវត្ថុ ធ្វើជាប្រធានគណៈកម្មាធិការសម្រួលមូលនិធិសកលប្រចាំ      កម្ពុជា (CCC) ដើម្បីក្តាប់ឱ្យបាននូវសេចក្តីត្រូវការនៃកម្មវិធីជំងឺអេដស៍ និងដឹងពីបញ្ហាសុខភាពសាធារណៈ ដឹងពីបញ្ហាប្រឈម និងសំណូមពរ ដើម្បីរកវិធីគាំពារដល់សង្គម។

   ជាទីបញ្ចប់ ឯកឧត្តមទេសរដ្ឋមន្ត្រី បានកោតសរសើរ ដល់ថ្នាក់ដឹកនាំទាំងអស់ ដែលមានការទំនាក់ទំនងគ្នាបានល្អ រវាងថ្នាក់ដឹកនាំបច្ចេកទេស និងអគ្គលេខាធិការដ្ឋាន ដោយមានការឯកភាពគ្នាជាធ្លុងមួយ និងបន្តកិច្ចខិតខំប្រឹងប្រែងទាំងអស់គ្នា ដោយយកចិត្តទុកដាក់ក្នុងការអនុវត្តការងារឱ្យបានកាន់តែប្រសើរឡើង។
អង្គប្រជុំបានបញ្ចប់នៅវេលាម៉ោង១១: ១៧នាទី ប្រកបដោយបរិយាកាសរីករាយ និងស្និទ្ធស្នាលក្រៃលែង។

ឯកសារសម្រាប់ទាញយក

ចំណងជើង	ទំហំ	ការទាញយកឯកសារ
របាយការណ៍ប្រជុំរួមប្រចាំខែឧសភា ឆ្នាំ២០២១ របស់ថ្នាក់ដឹកនាំអាជ្ញាធរជាតិប្រយុទ្ធនឹងជំងឺអេដស៍	2.31 MB

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច