គណៈប្រតិភូកម្ពុជាដែលចូលរួមក្នុងកិច្ចប្រជុំជាន់ខ្ពស់ស្តីពីមេរោគអេដស៍/ជំងឺអេដស៍យប់នេះ
អាកាប៉េ ភ្នំពេញ ថ្ងៃទី៨ ខែមិថុនា ឆ្នាំ២០២១
កិច្ចប្រជុំជាន់ខ្ពស់របស់អង្គការសហប្រជាជាតិស្តីពីមេរោគអេដស៍/ជំងឺអេដស៍នឹងចាប់ផ្តើមនៅយប់នេះ នៅទីស្នាក់ការកណ្តាលរបស់អង្គការសហប្រជាជាតិ នាទីក្រុងញូវយ៉ក។
គណៈប្រតិភូកម្ពុជាដែលដឹកនាំដោយទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍នឹងចូលរួមក្នុងពិធីបើកកិច្ចប្រជុំនៅពេលយប់នេះ តាមបណ្តាញវីដេអូ នេះបើតាមការលើកឡើងរបស់ ឯកឧត្តម ស៊ុត ថងផាន់ នាយកខុទ្ទកាល័យ[អ.ជ.ប.ជ.អ]ឯកឧត្តមទេសរដ្ឋមន្ត្រី។
ឯកឧត្តមនាយកខុទ្ទកាល័យបានចង្អុលបង្ហាញថា ក្រៅពីកិច្ចប្រជុំពេញអង្គ គណៈប្រតិភូកម្ពុជាចំនួន១០រូបនឹងចូលរួមក្នុងវេទិកាចំនួន៥ ដែលរួមមាន [១] ការដោះស្រាយវិសមភាពក្នុងការបញ្ចប់ជំងឺអេដស៍ ៖ ១០ឆ្នាំឆ្ពោះទៅ២០៣០ [២] ការដាក់ប្រជាជននិងសហគមន៍ជាស្នូលនៃការឆ្លើយតបនឹងជំងឺអេដស៍ [៣] ធនធាននិងថវិកាសម្រាប់ការឆ្លើយតបនឹងជំងឺអេដស៍ប្រកបដោយប្រសិទ្ធភាព [៤] ការលើកកម្ពស់សមភាពយេនឌ័រនិងការផ្តល់អានុភាពដល់ស្ត្រីនិងក្មេងស្រីក្នុងការឆ្លើយតបនឹងជំងឺអេដស៍ និង [៥] ការដោះស្រាយផលប៉ះពាល់នៃជំងឺឆ្លងរាតត្បាតសកលចំពោះការឆ្លើយតបនឹងជំងឺអេដស៍ និងការកសាងឡើងវិញឱ្យបានប្រសើរសម្រាប់ការត្រៀមនឹងជំងឺឆ្លងរាតត្បាតសកល។
ជាមួយគ្នានេះ គណៈប្រតិភូកម្ពុជាក៏នឹងចូលរួមក្នុងព្រឹត្តិការណ៍មួយស្តីពីតថភាពនៃជីវិត ៖ យុវជន ភេទ និងមេរោគអេដស៍ដែលនឹងប្រមូលផ្តុំដោយសកម្មជនយុវជន អ្នកនយោបាយ និងអ្នកជំនាញនានា ដើម្បីពិភាក្សាអំពីសុខភាពផ្លូវភេទ និងបន្តពូជព្រមទាំងសិទ្ធិរបស់យុវវ័យនិងយុវជន។ល។
មន្ត្រីជាន់ខ្ពស់មកពីអាជ្ញាធរជាតិប្រយុទ្ធនឹងជំងឺអេដស៍ ក្រសួងសេដ្ឋកិច្ចនិងហិរញ្ញវត្ថុ និងក្រសួងសុខាភិបាលសមាជិកព្រឹទ្ធសភា អភិបាលរងរាជធានីភ្នំពេញ និងសមាជិកនៃអង្គការមិនមែនរដ្ឋាភិបាលដែលធ្វើការងារអេដស៍គឺជាសមាសភាពដែលជាសមាជិកនៃគណៈប្រតិភូនេះ។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
