National AIDS Authority

ចំនួនអ្នកទស្សនាគេហទំព័រ:

ឯកឧត្តមទេសរដ្ឋមន្ត្រី អៀង មូលី អញ្ជើញជាអធិបតី ដឹកនាំកិច្ចប្រជុំពិគ្រោះយោបល់ជាន់ខ្ពស់ស្តីពីគម្រោង ផ្តួចផ្តើមទីក្រុងពន្លឿនការឆ្លើយតបនឹងជំងឺអេដស៍ តាមបណ្តាញវីដេអូ

នៅព្រឹកថ្ងៃចន្ទ ១៤រោច ខែស្រាពណ៍ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី៦ ខែកញ្ញា ឆ្នាំ២០២១ ចាប់ពីម៉ោង៩៖០០ ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានអញ្ជើញជាអធិបតីដ៏ខ្ពង់ខ្ពស់ដឹកនាំកិច្ចប្រជុំពិគ្រោះយោបល់ជាន់ខ្ពស់ស្តីពីគម្រោងផ្តួចផ្តើមទីក្រុងពន្លឿនការឆ្លើយតបនឹងជំងឺអេដស៍ តាមបណ្តាញវីដេអូ កម្មវិធី Microsoft Teams។

កិច្ចប្រជុំនេះមានការចូលរួមពី ឯកឧត្តម លោកជំទាវ អភិបាលរង និងជាប្រធានគណៈកម្មាធិការប្រយុទ្ធ នឹងជំងឺអេដស៍ រាជធានីភ្នំពេញ ខេត្តបាត់ដំបង បន្ទាយមានជ័យ និងសៀមរាប អ្នកស្រីវេជ្ជបណ្ឌិត ឃិន ចូ (Whin Thin Khin Cho) នាយិកាបណ្តោះ អាសន្នអង្គការUNAIDSប្រចាំកម្ពុជា ឯកឧត្តម វេជ្ជបណ្ឌិត ទា ផលា អនុប្រធានបច្ចេកទេស និង ថ្នាក់ដឹកនាំអាជ្ញាធរជាតិប្រយុទ្ធនឹងជំងឺអេដស៍ តំណាងដៃគូអភិវឌ្ឍន៍ និងតំណាងមន្ទីរជុំវិញ រាជធានី ខេត្តទីក្រុងពន្លឿនការឆ្លើយតបនឹងជំងឺ អេដស៍ទាំង៤ ដូចជា សុខាភិបាល សេដ្ឋកិច្ច និង ហិរញ្ញវត្ថុ រតនាគារ ទីចាត់ការផែនការនិងវិនិយោគ ព្រមទាំងលេខាធិការដ្ឋានអេដស៍ និងកម្មវិធីអេដស៍ សរុបចំនួន៤៤នាក់/គណនី។

មានប្រសាសន៍បើកកិច្ចប្រជុំ ឯកឧត្តមទេសរដ្ឋមន្រ្តី បានរំឭកថា “កម្ពុជាគឺជាប្រទេសមួយក្នុងចំណោម ប្រទេស៧នៅលើពិភពលោក ដែលសម្រេចបាន គោលដៅ៩០-៩០-៩០ ក្នុងឆ្នាំ២០១៧។ បច្ចុប្បន្ន គោលដៅ៩៥-៩៥-៩៥របស់យើងត្រូវបានធ្វើ បច្ចុប្បន្នភាពជាផ្លូវការ នៅថ្ងៃទី២ ខែសីហា ឆ្នាំ ២០២១ ដែលមាន ៖ ១) គោលដៅ៩៥ដំបូងរបស់ យើងគឺសម្រេចបាន៨៤% មានន័យថា ៨៤%នៃ អ្នកផ្ទុកមេរោគអេដស៍ដឹងពីស្ថានភាពរបស់ពួកគេ ២) គោលដៅ៩៥ទីពីររបស់យើងគឺសម្រេចបាន ៩៩% មានន័យថា ៩៩%នៃអ្នកដែលដឹងពីស្ថាន ភាពមេរោគអេដស៍របស់ខ្លួនកំពុងទទួលការព្យាបាល និង ៣) គោលដៅ៩៥ទីបីរបស់យើងគឺសម្រេចបាន ៩៧% មានន័យថា ៩៧%នៃអ្នកដែលកំពុងទទួល ការព្យាបាលត្រូវបានពិនិត្យឃើញថាមានចំនួន មេរោគតិចបំផុតក្នុងឈាម។ ជាមួយនឹងវឌ្ឍនភាព ដែលប្រកបដោយការលើកទឹកចិត្តទាំងនេះ សម្តេច តេជោ ហ៊ុន សែន នាយករដ្ឋមន្រ្តីបានអំពាវនាវឱ្យ មានការចូលរួមជាចលនាជាតិមួយ ដើម្បីបញ្ចប់ជំងឺ អេដស៍នៅឆ្នាំ២០២៥ ដែលមានរយៈពេល៥ឆ្នាំមុន ការប្តេជ្ញាចិត្តជាសកល។”

ឯកឧត្តមទេសរដ្ឋមន្រ្តីបានបន្តថា នៅក្នុងការផ្លាស់ប្តូរ របស់យើងពីភាពពឹងផ្អែក ទៅជាការឆ្លើយតបប្រកប ដោយនិរន្តរភាពចំពោះការឆ្លើយតបនឹងការឆ្លងរាលដាលជំងឺអេដស៍ យើងជួបប្រទះនូវបញ្ហាប្រឈម មួយចំនួន ៖ ១) ផ្អែកលើលំហាត់គំរូមួយ ប្រទេស កម្ពុជានឹងមិនដើរលើគន្លងផ្លូវ ដើម្បីកាត់បន្ថយការ ឆ្លងថ្មីរហូតដល់គោលដៅឆ្នាំ២០២៥ឡើយ ២) ការ ផ្តល់មូលនិធិមិនគ្រប់គ្រាន់សម្រាប់ការបង្ការមេរោគអេដស៍ នៅក្នុងជំនួយនាពេលបច្ចុប្បន្ននេះ រារាំង ដល់ការពង្រីកអន្តរាគមន៍ប្រកបដោយភាពច្នៃប្រឌិត ដែលផ្តោតលើប្រជាជនគន្លឹះវ័យក្មេង ៣) ផល ប៉ះពាល់លើកម្មវិធីអេដស៍កាន់តែធ្ងន់ឡើង ដោយ សារការកើនឡើងនៃការឆ្លងរាលដាលក្នុងសហគមន៍នៃកូវីដ-១៩ នៅរាជធានីភ្នំពេញ និងក្រុងតាម បណ្តាខេត្តសំខាន់ៗ ជាពិសេស ចាប់ពីខែកុម្ភៈ ឆ្នាំ២០២១។ ជំងឺឆ្លងរាតត្បាតសកលកូវីដ-១៩ បានបង្កើតឱ្យមានស្ថានភាពកាន់តែអាក្រក់បន្ថែមទៀត និងរុញការឆ្លើយតបនឹងជំងឺអេដស៍របស់ យើងឱ្យធ្លាក់ពីគន្លងផ្លូវ ពង្រីកវិសមភាព និងបង្កឱ្យ មានគ្រោះថ្នាក់នៃការវិនិយោគក្នុងវិស័យសុខាភិបាល និងប្រព័ន្ធសម្រាប់សុខាភិបាល និងត្រៀម បង្ការជំងឺឆ្លងរាតត្បាត។

មុននឹងបញ្ចប់ ឯកឧត្តមទេសរដ្ឋមន្រ្តីបានថ្លែងថា នៅក្នុងបរិបទដែលម្ចាស់ជំនួយកំពុងបន្តកាត់បន្ថយការគាំទ្ររបស់ខ្លួន នេះជាពេលដែលយើងទាំងអស់ គ្នាត្រូវកែប្រែគោលនយោបាយ និងទំនាក់ទំនង ស្ថាប័ន ដើម្បីផ្លាស់ប្តូរឥរិយាបថ និងការប្រើប្រាស់ ធនធាន ដើម្បីដោះស្រាយបញ្ហាដែលរាំងស្ទះ ទៅតាមបែបបទមួយឱ្យកាន់តែមាននិរន្តរភាព។

នៅទីបញ្ចប់ ឯកឧត្តមទេសរដ្ឋមន្រ្តីបានស្នើឱ្យ មានការចែករំលែកនូវ ឧទាហរណ៍ល្អៗនៃភាពជា អ្នកដឹកនាំមូលដ្ឋាន នៅរាជធានីភ្នំពេញ ខេត្ត បាត់ដំបង សៀមរាប និងបន្ទាយមានជ័យ ដើម្បី ធ្វើការរួមគ្នាតាមរយៈកិច្ចសហប្រតិបត្តិការ ពង្រឹងការ ចូលរួមជាពហុវិស័យ និងការចូលរួមពីសហគមន៍ ប្រកប ដោយអត្ថន័យ ដើម្បីពន្លឿនសកម្មភាពនៅ ថ្នាក់ក្រោមជាតិជាបន្ទាន់ ឆ្ពោះទៅរកការបង្ការ ការព្យាបាល ការថែទាំ និងការគាំទ្រដ៏ទូលំទូលាយ ដោយការបង្កើនការវិនិយោគ ដើម្បីធានាថាគ្មាន នរណាម្នាក់ត្រូវបានទុកចោលឡើយ។

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច