National AIDS Authority

ចំនួនអ្នកទស្សនាគេហទំព័រ:

កិច្ចប្រជុំថ្នាក់ដឹកនាំប្រចាំខែមករា ឆ្នាំ ២០២២ ក្រោមអធិបតីភាពដ៏ខ្ពង់ខ្ពស់ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍

នៅព្រឹកថ្ងៃអង្គារ ១៥រោច ខែបុស្ស ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី០១ ខែកុម្ភៈ ឆ្នាំ២០២២ អាជ្ញាធរជាតិប្រយុទ្ធនឹងជំងឺអេដស៍ រៀបចំកិច្ចប្រជុំថ្នាក់ដឹកនាំប្រចាំខែមករា ក្រោមអធិបតីភាពដ៏ខ្ពង់ខ្ពស់ ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍។ កិច្ចប្រជុំនេះមានការចូលរួមពី ឯកឧត្តម លោកជំទាវ ជាអនុប្រធាន អគ្គលេខាធិការ នាយក-នាយករងខុទ្ទកាល័យ អគ្គលេខាធិការរង ទីប្រឹក្សា ជំនួយការ ប្រធាននាយកដ្ឋាន នៅក្នុងសាលប្រជុំ “ខ” ដោយឡែកចំពោះ លោក អ្នកស្រី អ្នកនាងកញ្ញា អនុប្រធាននាយកដ្ឋាន ប្រធានការិយាល័យ និងអនុការិយាល័យ និងមន្រ្តីនៃអ.ជ.ប.ជ.អ ចូលរួមតាមបណ្តាញវីដេអូ កម្មវិធី Zoom។
គោលបំណងនៃកិច្ចប្រជុំ:
-    ដើម្បីរាយការណ៍ពីបច្ចុប្បន្នភាពនៃសកម្មភាពរបស់ថ្នាក់ដឹកនាំ និងអគ្គលេខាធិការដ្ឋាននៃអាជ្ញាធរជាតិប្រយុទ្ធនឹងជំងឺអេដស៍។
-    ដើម្បីបានដឹងពីស្ថានភាពរាលដាល និងគោលដៅនៃការឆ្លើយតបនឹងមេរោគអេដស៍ និងបទអន្តរាគមន៍។
-    ដើម្បីបានដឹងពីសមិទ្ធផលដែលសម្រេចបាន និងឧបសគ្គដែលកើតមានឡើងក្នុងការអនុវត្តផែនការសកម្មភាព និងលើកផែនការសកម្មភាពអនុវត្តសម្រាប់ខែបន្ទាប់។
ជាកិច្ចចាប់ផ្តើម ឯកឧត្តមទេសរដ្ឋមន្រ្តី មានប្រសាសន៍ស្វាគមន៍ ដល់មន្រ្តីរាជការទាំងអស់ដែលបានចូលរួម និងបានជម្រាបជូនពីដំណើរការនៃកិច្ចប្រជុំតាមរបៀបវារៈដូចខាងក្រោម ៖
១) បទបង្ហាញរបាយការណ៍សង្ខេបស្តីពីលទ្ធផលសកម្មភាពការងារប្រចាំខែមករា និងទិសដៅការងារខែកុម្ភៈ ឆ្នាំ២០២២ ដោយឯកឧត្តម ឈឹម ឃិនដារ៉េត។
២) បទបង្ហាញស្តីពីទិសដៅខាងមុខនៃអាជ្ញាធរជាតិប្រយុទ្ធនឹងជំងឺអេដស៍ និងចរន្តជាតិឆ្លើយតបនឹងមេរោគ   អេដស៍ និងជំងឺអេដស៍ ដោយឯកឧត្តម រស់ សីលវ៉ាត់ និងឯកឧត្តម ទា ផលា អនុប្រធានទទួលបន្ទុក        បច្ចេកទេស។
៣) មតិសំណេះសំណាលរបស់ឯកឧត្តម ទេសរដ្ឋមន្ដ្រី
៤) កិច្ចការផ្សេងៗ។
បន្ទាប់មក ឯកឧត្តមទេសរដ្ឋមន្រ្តី បានអនុញ្ញាតជូន ឯកឧត្តម អគ្គលេខាធិការ ធ្វើបទបង្ហាញ។
ដោយមានការ អនុញ្ញាតពី ឯកឧត្តមទេសរដ្ឋមន្រ្តី ឯកឧត្តម ឈឹម ឃិនដារ៉េត អគ្គលេខាធិការ បានធ្វើបទ
បង្ហាញស្តីពី ៖
I-    បទបង្ហាញរបាយការណ៍ស្តីពីលទ្ធផលសកម្មភាព ការងាររបស់ថ្នាក់ដឹកនាំ និងអគ្គលេខាធិការដ្ឋាន
១- សកម្មភាពការងារដែលសម្រេចបាន ៖
•    សិក្ខាសាលាពិគ្រោះយោបល់ស្តីពីការពិនិត្យឡើងវិញផែនការយុទ្ធសាស្ត្រជាតិទូលំទូលាយ និងពហុវិស័យឆ្លើយតបនឹងមេរោគអេដស៍ និងជំងឺអេដស៍លើកទី៥ (២០១៩-២០២៣)។
•    បានធ្វើវិបស្សនាអាជ្ញាធរជាតិប្រយុទ្ធនឹងជំងឺអេដស៍ឆ្នាំ២០២២។
•    បានប្រជុំក្រុមប្រឹក្សាបច្ចេកទេសអាជ្ញាធរជាតិប្រយុទ្ធនឹងជំងឺអេដស៍លើកទី១ ឆ្នាំ២០២២ ។
•    បន្តចុះបណ្តុះបណ្តាលការត្រួតពិនិត្យ ការអនុវត្តសជណ២១៣ តាមរាជធានី ខេត្តគោលដៅ។
•    ក្រសួងសេដ្ឋកិច្ច និងហិរញ្ញវត្ថុ បានផ្តល់ថវិកាចំនួន៨០លានរៀលដល់ រាជធានី និងខេត្តទាំង៣ រួចហើយក្នុងការអនុវត្តគម្រោងទីក្រុងពន្លឿនឆ្លើយតបនឹងជំងឺអេដស៍ (Fast Track City)។
•    បន្តធ្វើការងារជាមួយក្រសួងមហាផ្ទៃ ដើម្បីជំរុញគណៈកម្មាធិការប្រយុទ្ធនឹងជំងឺអេដស៍ថ្នាក់ក្រោមជាតិ។
២- បញ្ហាប្រឈម ៖
ស្ថានភាពជំងឺកូវីដ១៩ នៅតែបន្តផលប៉ះពាល់ការងារឆ្លើយតបមេរោគអេដស៍ និងជំងឺអេដស៍។
      ៣- ទិសដៅអនុវត្តបន្ត
•    ពិនិត្យកែសម្រួលសេចក្តីសម្រេចលេខ១៣៦ស្តីពីការតែងតាំងសមាសភាពក្រុមប្រឹក្សាបច្ចេកទេសអាជ្ញាធរជាតិប្រយុទ្ធនឹងជំងឺអេដស៍។
•    រៀបចំក្រុមប្រឹក្សាបច្ចេកទេសសម្រាប់តាមដានការអនុវត្តផែនការយុទ្ធសាស្ត្រជាតិ។
•    បន្តចុះបណ្តុះបណ្តាលការត្រួតពិនិត្យការអនុវត្តសជណ២១៣ តាមបណ្តារាជធានី ខេត្តគោលដៅ
•    បន្តធ្វើការងារជាមួយក្រសួងមហាផ្ទៃ ដើម្បីជំរុញដល់ការបង្កើតគណៈកម្មាធិការប្រយុទ្ធនឹងជំងឺអេដស៍នៅថ្នាក់ក្រោមជាតិ។
•    រៀបចំធាតុចូលសម្រាប់របាយការណ៍របស់ការិយាល័យឧត្តមស្នងការ ទទួលបន្ទុកសិទ្ធិមនុស្សក្នុងបរិបទ ជំងឺHIV/AIDS របស់ក្រសួងការបរទេស និងសហប្រតិបត្តិការអន្តរជាតិ។
•    ត្រៀមរៀបចំផ្សព្វផ្សាយការយល់ដឹងអំពីការទប់ស្កាត់ការរាលដាលមេរោគអេដស៍ និងជំងឺអេដស៍ក្នុងទិវានៃសេចក្តីស្រឡាញ់។
•    រៀបចំកិច្ចប្រជុំក្រុមប្រឹក្សាបច្ចេកទេសអាជ្ញាធរជាតិប្រយុទ្ធនឹងជំងឺអេដស៍ លើកទី២។
II- បទបង្ហាញ ស្តីពីទិសដៅការងារខាងមុខនៃអាជ្ញាធរជាតិប្រយុទ្ធនឹងជំងឺអេដស៍ និងចរន្តជាតិឆ្លើយតបនឹងមេរោគអេដស៍ និងជំងឺអេដស៍បទបង្ហាញដោយឯកឧត្តម រស់ សីលវ៉ាត់ ៖
•    ឯកឧត្តមបានសង្ខេបជូនថ្នាក់ដឹកនាំ និងអង្គប្រជុំអំពីទិសដៅនៃការអនុវត្តផែនការយុទ្ធសាស្រ្តជាតិទូលំទូលាយ និងពហុវិស័យឆ្លើយតបទៅនឹងមេរោគអេដស៍ និងជំងឺអេដស៍លើកទី៥ (NSPV) ក្រោយពេលធ្វើការពិនិត្យឡើងវិញ មានដូចជាៈ
•    ទស្សនៈវិស័យរបស់ប្រទេសកម្ពុជា គឺគ្មានមេរោគអេដស៍ និងជំងឺអេដស៍ ហើយប្រជាពលរដ្ឋមានសុខភាព កាន់តែប្រសើរឡើង។
•    គោលបំណងយុទ្ធសាស្ត្រទាំង៤ ទី១) ផ្តល់សេវាបង្ការ ថែទាំ និងព្យាបាលយ៉ាងទូលំទូលាយ តាមរយៈការឆ្លើយតបជាពហុវិស័យ ទី២)ធ្វើសមាហរណកម្មមេរោគអេដស៍ក្នុងប្រព័ន្ធសុខាភិបាល និងក្រសួងពាក់ព័ន្ធឱ្យបានទូលំទូលាយ ទី៣) ពង្រីកការការពារសង្គម និងការទទួលបានសេវាសង្គមតាមផ្លូវច្បាប់សម្រាប់អ្នកផ្ទុកមេរោគអេដស៍ និងក្រុមប្រជាជនគន្លឹះ ទី៤)បង្កើនការផ្តល់ហិរញ្ញប្បទានរបស់រាជរដ្ឋាភិបាលឱ្យបាន៥០%នៅឆ្នាំ២០២៣ ។
•    មានយុទ្ធសាស្រ្តចំនួន៥ ដែលបានភ្ជាប់ទៅនឹងគោលបំណងទាំង៤ខាងលើ។
•    កញ្ចប់អន្តរាគមន៍អាទិភាពក្នុងយុទ្ធសាស្ត្រនីមួយៗ ដែលឯកឧត្តមបានជម្រាបថានឹងត្រូវក្លាយជាផែនទីបង្ហាញផ្លូវសម្រាប់ថ្នាក់ដឹកនាំអាជ្ញាធរជាតិ និងអគ្គលេខាធិការដ្ឋាន ប្រើប្រាស់ក្នុងការសម្របសម្រួល ក៏ដូចជាក្នុងការត្រួតពិនិត្យតាមដាន និងវាយតម្លៃ លើការអនុវត្តការងារឆ្លើយតបនឹងមេរោគអេដស៍ ដើម្បីឈានទៅសម្រេចគោលដៅនៃការបិទបញ្ចប់ការរាលដាលមេរោគអេដស៍នាឆ្នាំ២០២៥។
បទបង្ហាញដោយ ឯកឧត្តម ទា ផលា ៖
ឯកឧត្តមបានបង្ហាញនូវៈ
•    យុទ្ធសាស្ត្រថ្មីរបស់មូលនិធិសកលដែលទើបត្រូវបានអនុម័ត គឺការជម្រុញអោយ ដាក់មនុស្ស និងសហ    គមន៍ (ងាយរងគ្រោះ) ជាចំណុចស្នូលកណ្តាលក្នុងការដឹកនាំការឆ្លើយតបនឹងជំងឺអេដស៍ ជំងឺរបេង និងជំងឺគ្រុនចាញ់ ព្រមទាំងក្នុងការពង្រឹងប្រព័ន្ធសម្រាប់សមធម៌ក្នុងការទទួលសេវាសុខភាព និងពង្រឹងភាពត្រៀមលក្ខណៈបានក្នុងការឆ្លើយតបនឹងការរាលដាលជំងឺ ដែលមានលក្ខណៈពិសេសស៊ីសង្វាក់គ្នានឹងទស្សនវិស័យរបស់អ.ជ.ប.ជ.អ. ដូចជា ទី១)- ពង្រឹងភាពជាអ្នកដឹកនាំ និងភាពជាម្ចាស់ការ (Leadership and ownership) ទី២)- ពង្រឹងភាពជាដៃគូ (Partnership) ទី៣)- ការវិនិយោគ (Investment) ដោយដាក់មនុស្ស និងសហគមន៍ នៅចំណុចកណ្តាលនៃការឆ្លើយតបនឹងជំងឺអេដស៍។
•    ផែនការឆ្នាំ២០២២របស់ទីភ្នាក់ងារអភិវឌ្ឍន៍អន្តរជាតិអាមេរិកសម្រាប់ការងារសុខភាពកម្ពុជា ដែលគាំទ្រចក្ខុវិស័យយុទ្ធសាស្ត្ររបស់កម្ពុជា ក្នុងការលុបបំបាត់មេរោគអេដស៍នៅឆ្នាំ ២០២៥ ដោយពង្រឹងការរៀបចំជាគោលនយោបាយ ការអនុវត្ត និងរៀបចំប្រព័ន្ធសុខាភិបាលប្រកបដោយសមធម៌ និងនិរន្តរភាព លើកកម្ពស់យុត្តិធម៌ កាត់បន្ថយវិសមភាព និងដោះស្រាយគ្រប់វិស័យជូនប្រជាជន ព្រមទាំងគោរព និងការពារសិទ្ធិមនុស្ស និងសមភាពយេនឌ័រ។លើកកម្ពស់ភាពជាម្ចាស់ និងគណនេយ្យភាពនៃបណ្តាញ និងដៃគូពាក់ព័ន្ធនៃភ្នាក់ងាររាជរដ្ឋាភិបាល សង្គមស៊ីវិល និងវិស័យឯកជន។
•    បច្ចុប្បន្នភាពនៃការរាលដាលមេរោគអេដស៍ ដោយផ្តោតលើនិន្នាការប្រឈមពីរសំខាន់ដែលយើងត្រូវរកគ្រប់អន្តរាគមន៍ដើម្បីធ្វើការគ្រប់គ្រងអោយជាប់ គឺចំនួនអ្នកឆ្លងថ្មីប្រមាណ១១០០នាក់ក្នុង១ឆ្នាំ និងចំនួនអ្នកមិនទាន់ដឹងស្ថានភាពរបស់ខ្លួនប្រមាណ១២០០០នាក់។ ក្នុងនោះក្រុមប្រជាជនប្រឈមមុខខ្ពស់ពិសេសបុរសស្រលាញ់បុរស នៅតែជាចំនុចស្នូលនៃការឆ្លងរាលដាល ដែលត្រូវការអន្តរាគមន៍ដ៏មានប្រសិទ្ធភាពសម្រាប់ឆ្លើយតបពិសេស ប្រឹប (PrEP) HIVST, Condom, NSP, BCC, PNTT។
និងតម្រូវការរំកិល អន្តរាគមន៍ពីលក្ខណៈធ្វើកម្មវិធីសុទ្ធសាធទៅកាន់ការរៀបចំកសាងប្រព័ន្ធសុខាភិបាលដែលនឹងគាំទ្រនិរន្តរភាពនៃកម្មវិធី តាមរយៈ
ក). ការរៀបចំ ស្ថាប័ន GDJ និង TAB ដែលអាចគាំទ្រ ការសម្រេចចិត្តត្រឹមត្រូវរបស់ PAB ក្នុងនោះត្រូវ ទី១) ពង្រឹងសមាជិកភាព តួនាទី និងការទទួលខុសត្រូវ ទី២) មានគោលការណ៍ ការណែនាំនៃអន្តរកម្ម បញ្ជីអ្នកចូលរួម របាយការណ៍កិច្ចប្រជុំ ទី៣) ភារកិច្ច និងលទ្ធផលដែលស្ថាប័នជាសមាជិកត្រូវចូលរួមទាក់ទងនឹងយុទ្ធសាស្ត្រនីមួយៗ។
ខ). ការពង្រឹងតួនាទី និងគណនេយ្យភាពរបស់អ្នកពាក់ព័ន្ធ នៅថ្នាក់ជាតិ និងថ្នាក់ក្រោមជាតិ ទាំងស្ថាប័នរដ្ឋ អង្គការសង្គមស៊ីវិល និងវិស័យឯកជន ដើម្បីធានានូវការទទួលខុសត្រូវក្នុងការអនុវត្តផែនការយុទ្ធសាស្រ្តជាតិទូលំទូលាយ និងពហុវិស័យឆ្លើយតបទៅនឹងមេរោគអេដស៍ និងជំងឺអេដស៍លើកទី៥ (NSPV)។ គ). ពង្រឹងគោលការណ៍ដឹកនាំការឆ្លើយតបការរាលដាល ដោយយកប្រជាពលរដ្ឋអ្នកទទួលផលជាធំជាស្នូលកណ្តាល និងបង្កើនកិច្ចសន្ទនារវាងអ្នកធ្វើគោលនយោបាយ ជាមួយអ្នកផ្តល់សេវា និងពលរដ្ឋអ្នកទទួលផល ក្នុងគ្រប់ការពិនិត្យលើបញ្ហានិងការដាក់ចេញនូវដំណោះស្រាយសម្រាប់បញ្ហា។
លោកជំទាវ ស៊ីម ខេងខាំ
•    ស្នើសុំរៀបចំប្រារព្ធទិវានារីអន្តរជាតិ៨មីនា ខួបលើកទី ១១១ នៅអាជ្ញាធរជាតិប្រយុទ្ធនឹងជំងឺអេដស៍ ក្រោមប្រធានបទ សមភាពយេនឌ័រថ្ងៃនេះ ដើម្បីចីរភាពនាពេលអនាគត។
•    សម្តេចតេជោ បានអនុញ្ញាតឱ្យក្រុមប្រឹក្សាជាតិកម្ពុជាដើម្បីស្រ្តី ទៅរាយការណ៍ស្តីពីលទ្ធផលបូកសរុបការងារប្រចាំឆ្នាំ នាថ្ងៃទី២១ខែកុម្ភៈ ឆ្នាំ២០២២។
III- មតិសំណេះសំណាលរបស់ឯកឧត្តមទេសរដ្ឋមន្ដ្រី
   បន្ទាប់មក កិច្ចប្រជុំបានដំណើរការបន្តនៅក្នុងរបៀបវារៈទី៣ ក្នុងនោះឯកឧត្តមទេសរដ្ឋមន្ត្រី បានមានប្រសាសន៍សំណេះសំណាល និងផ្តល់នូវអនុសាសន៍លើចំណុចសំខាន់ៗដូចខាងក្រោម ៖
១-     ដើម្បីសម្រេចគោលដៅ អគ្គលេខាធិការត្រូវធ្វើការទៅតាមមុខសញ្ញាយុទ្ធសាស្រ្តជាតិ នៅឆ្នាំ២០២២។
២- ការរៀបចំប្រកិច្ចជុំត្រូវតាមលំដាប់លំដោយគ្នា ឱ្យស៊ីសង្វាក់គ្នា ដូចជាការប្រជុំក្រុមប្រឹក្សាបច្ចេកទេសរួច អគ្គលេខាធិការរាយការណ៍ជូនអង្គប្រជុំថ្នាក់ដឹកនាំ អ.ជ.ប.ជ.អ។ អង្គប្រជុំថ្នាក់ដឹកនាំផ្តល់ព័ត៌មានត្រឡប់ ដើម្បីឱ្យអគ្គលេខាធិការកែសម្រួលឡើងវិញ ហើយចាត់វិធានការឱ្យមានប្រសិទ្ធភាព។
៣- ពង្រឹងសកម្មភាពការងារបុរសរួមភេទជាមួយបុរស (MSM) ពីព្រោះ MSM ជាមុខសញ្ញានៃការរីករាលដាលឡើងវិញនៃជំងឺអេដស៍។
៤- ថ្នាក់ដឹកនាំត្រូវពិនិត្យមើលឡើងវិញលើរបាយការណ៍ និងតួលេខរបស់ UNAID ឆ្នាំ២០២១ និងសេចក្តីថ្លែងការណ៍នយោបាយឆ្លើយតបនឹងមេរោគអេដស៍ និងជំងឺអេដស៍ (Political Declaration on HIV and AIDS។
៥- កែសម្រួលផែនការយុទ្ធសាស្រ្តជាតិទូលំទូលាយ និងពហុវិស័យឆ្លើយតបទៅនឹងមេរោគអេដស៍ និងជំងឺអេដស៍លើកទី៦(NSP6) ប្រមូលទិន្នន័យឱ្យបានច្រើនជាទីបំផុត និងដាក់ធាតុចូលឱ្យបានច្រើនចាប់ពីពេលឥឡូវ។
៦- ត្រូវប្រជុំពិភាក្សាគ្នាពីយុទ្ធសាស្រ្តណាមួយដែលមានបញ្ហាស្មុគស្មាញជាងគេ និងចាំចាច់បំផុត យកមកធ្វើផែនការសកម្មភាព ហើយដឹកនាំស្ថាប័ន និងដែគូនានា ក្នុងការតម្រង់មុខសញ្ញាដើម្បីអនុវត្ត។
៧- ការប្រជុំថ្នាក់ដឹកនាំ NAA ត្រូវប្រជុំយ៉ាងតិច ៣ថ្ងៃក្រោយ ប្រជុំក្រុមប្រឹក្សាបច្ចេកទេស (Technical Advisory Board) ត្រូវប្រមូលរបាយការណ៍វឌ្ឍនភាពពីក្រុមការងារតាមយុទ្ធសាស្ត្រ។
៨- អគ្គលេខាធិការត្រូវជំរុញការងារជាមួយក្រសួង ស្ថាប័ននានា ដែលមានការទទួលខុសត្រូវទូទាំងប្រទេស មានភារកិច្ចត្រួតពិនិត្យ សម្របសម្រួល និងណែនាំអនុវត្តសកម្មភាពតាមយុទ្ធសា្រស្រ្តនីមួយៗ ដោយមានសូចនាករច្បាស់លាស់ ។
៩- ត្រូវរុករកអ្នកដែលបាត់ចំនួន១២,000ករណី ដោយសហការជាមួយ NCHADS, UNAIDS និងស្ថាប័នពាក់ព័ន្ធទាំងអស់។
១០- ការធ្វើតេស្តរុករកមេរោគអេដស៍លើអនិតិជន អាចធ្វើបាន អាស្រ័យលើគ្រូពេទ្យផ្តល់ការអប់រំដល់ក្រុមគ្រួសារឱ្យយល់ច្បាស់ពីសារប្រយោជន៍នៃការធ្វើរោគវិនិច្ឆ័យ ដើម្បីជួយសង្រ្គោះកុមារ ដោយមានការព្យាបាលបានត្រឹមត្រូវ មានវិធានការការពារខ្លួន និងតាមដានសុខភាព។
១១- ជៀសវាងការផ្សព្វផ្សាយព័ត៌មានសម្ងាត់ដែលធ្វើឱ្យប៉ះពាល់ដល់កិត្តិយស និងសេចក្តីថ្លៃថ្នូររបស់អ្នកផ្ទុកមេរោគអេដស៍។
១២- ឯកឧត្តមទេសរដ្ឋមន្ត្រី បានអនុញ្ញាតឱ្យមានការរៀបចំប្រារព្ធទិវានារីអន្តរជាតិ៨មីនា នៅ អ.ជ.ប.ជ.អ និងឱ្យមានការរៀបចំវត្ថុអនុស្សាវរីយ៍ជូនដល់ស្រ្តីៗផងដែរ។
១៣- មុនប្រជុំក្រុមប្រឹក្សាបច្ចេកទេស អគ្គលេខាធិការដ្ឋាន ត្រូវរៀបចំអញ្ជើញដៃគូនានាឱ្យចូលរួម មានរបៀបវារៈ មានអ្នកទទួលខុសត្រូវ ដោយតម្រង់ទិសដៅលើយុទ្ធសាស្រ្តសំខាន់ៗ។
១៤- ត្រូវតម្រង់ទិសមូលនិធិសកល (GF) ឱ្យគាត់មកជួយពង្រឹងប្រព័ន្ធជាតិ (country system) ដែលជាយុទ្ធសាស្រ្តជាតិរបស់ អ.ជ.ប.ជ.អ។ ចំពោះគណៈកម្មាធិការសម្របសម្រួលថ្នាក់ប្រទេស (Country Coordination Committee) ឱ្យឯកឧត្តម ហែម វណ្ណឌី ចេញសេចក្តីសម្រេចតែងតាំងសមាជិកចូលមកក្នុងក្រុមប្រឹក្សាបច្ចេកទេស អ.ជ.ប.ជ.អ។
១៥- ឯកឧត្តម ហោ ប៊ុនឡេង ត្រូវជួយអគ្គលេខាធិការ ដើម្បីពង្រឹងសមត្ថភាពស្តីពីការត្រួតពិនិត្យតាមដាន និងវាយតម្លៃ (M&E) ។
        ជាទីបញ្ចប់ ឯកឧត្តមទេសរដ្ឋមន្ត្រី បានលើកទឹកចិត្ត និងណែនាំឱ្យមន្រ្តីទាំងអស់ បន្តកិច្ចខិតខំប្រឹងប្រែងទាំងអស់គ្នា ដោយយកចិត្តទុកដាក់ក្នុងការអនុវត្តការងារឱ្យចំទិសដៅ និងពហុវិស័យឆ្លើយតបទៅនឹងមេរោគអេដស៍ និងជំងឺអេដស៍ តាមយន្តការយុទ្ធសាស្រ្តនីមួយៗឱ្យកាន់តែប្រសើរឡើង។
អង្គប្រជុំបានបញ្ចប់នៅវេលាម៉ោង១១:២៥នាទី ប្រកបដោយបរិយាកាសរីករាយ និងស្និទ្ធស្នាលក្រៃលែង។

ឯកសារសម្រាប់ទាញយក

ចំណងជើង	ទំហំ	ការទាញយកឯកសារ
របាយការណ៍កិច្ចប្រជុំថ្នាក់ដឹកនាំប្រចាំខែមករា ឆ្នាំ២០២២ ក្រោមអធិបតីភាពដ៏ខ្ពង់ខ្ពស់ឯកឧត្តមទេសរដ្ឋមន្រ្តី អៀង មូលី	2.83 MB

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច