National AIDS Authority

ចំនួនអ្នកទស្សនាគេហទំព័រ:

ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បាន អនុញ្ញាតជូនលោកវេជ្ជបណ្ឌិត ថូម៉ាស់ ទូឈ័រ (Thomas Teucher) ទីប្រឹក្សាបច្ចេកទេស ទីភ្នាក់ងារអភិវឌ្ឍន៍ និងសហប្រតិបត្តិការស្វ៊ីស ជួបពិភាក្សាផ្លាស់ប្តូរបទពិសោធន៍ការងារ

នៅព្រឹកថ្ងៃពុធ ៨កើត ខែមាឃ ឆ្នាំឆ្លូវ ត្រីស័ក ព.ស.២៥៦៥ ត្រូវនឹងថ្ងៃទី៩ ខែកុម្ភៈ ឆ្នាំ២០២២ ចាប់ពីម៉ោង៩ ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បាន អនុញ្ញាតជូនលោកវេជ្ជបណ្ឌិត ថូម៉ាស់ ទូឈ័រ (Thomas Teucher) ទីប្រឹក្សាបច្ចេកទេស ទីភ្នាក់ងារអភិវឌ្ឍន៍ និងសហប្រតិបត្តិការស្វ៊ីស ជួបពិភាក្សាផ្លាស់ប្តូរបទពិសោធន៍ការងារ នៅអាជ្ញាធរជាតិប្រយុទ្ធនឹងជំងឺអេដស៍។ ចូលរួមក្នុងជំនួបនេះរួមមាន ឯកឧត្តមវេជ្ជបណ្ឌិត ទា ផលា អនុប្រធានទទួលបន្ទុកបច្ចេកទេស ឯកឧត្តម ឈឹម ឃិនដារ៉េត អគ្គលេខាធិការ ឯកឧត្តមវេជ្ជបណ្ឌិត ស៊ុត ថងផាន់ នាយកខុទ្ទកាល័យ ឯកឧត្តមបណ្ឌិត ស៊ន ពិសិដ្ឋ ទីប្រឹក្សា និងជាប្រធាននាយកដ្ឋានរដ្ឋបាល និងហិរញ្ញវត្ថុ និងបណ្ឌិត ធីន គូលែន (Thin Kouland) (អមដំណើរវេជ្ជបណ្ឌិត ទូឈ័រ)។

ជំនួបពិភាក្សានេះត្រូវបានរៀបចំឡើងតាមការស្នើ សុំរបស់លោកវេជ្ជបណ្ឌិត ទូឈ័រ បន្ទាប់ពីគាត់ត្រូវបានទីភ្នាក់ងារអភិវឌ្ឍន៍និងសហប្រតិបត្តិការស្វ៊ីស ប្រគល់ភារកិច្ចជូនជាទីប្រឹក្សាបច្ចេកទេសឱ្យទទួល ខុសត្រូវការត្រួតពិនិត្យឡើងវិញលើការគាំទ្ររបស់ទីភ្នាក់ងារអភិវឌ្ឍន៍ និងសហប្រតិបត្តិការស្វ៊ីស ក្នុងដំណើរការមន្ទីរពេទ្យគន្ធបុប្ផា នៅកម្ពុជា។ ជាមួយគ្នានោះ លោកវេជ្ជបណ្ឌិតត្រូវរៀបចំគម្រោងវិនិយោគថ្មីដែលនឹងធានាចំពោះការផ្តល់ជំនួយពីស្វ៊ីសនៅក្នុងរយៈពេល៥ទៅ១០ឆ្នាំ ខាងមុខ។ ក្នុងន័យនេះ ដោយឯកឧត្តម ទេសរដ្ឋមន្រ្តីមានបទ ពិសោធន៍នៅក្នុងកិច្ចការហិរញ្ញវត្ថុសម្រាប់វិស័យសុខាភិបាលចំពោះការគាំទ្រប្រព័ន្ធប្រទេស លោកវេជ្ជបណ្ឌិត ទូឈ័រ ស្នើសុំជួបឯកឧត្តមទេសរដ្ឋមន្រ្តីនៅព្រឹកនេះដើម្បីផ្លាស់ប្តូរយោបល់ទាក់ទងនឹងអនាគតនៃការផ្តល់ការគាំទ្រហិរញ្ញវត្ថុក្នុងភាពជាដៃគូសាធារណៈឯកជន ដូចជាក្រុមមន្ទីរពេទ្យគន្ធបុប្ផាដែរ។

ជាកិច្ចចាប់ផ្តើម ឯកឧត្តមទេសរដ្ឋមន្រ្តីបានមាន ប្រសាសន៍ថ្លែងអំណរគុណចំពោះរដ្ឋាភិបាលស្វ៊ីសដែលបន្តផ្តល់ជំនួយដល់កម្ពុជា ជាពិសេស មន្ទីរពេទ្យគន្ធបុប្ផា។ ជាមួយគ្នានេះ ឯកឧត្តម ទេសរដ្ឋមន្រ្តីបានរំឭកថា លោកវេជ្ជបណ្ឌិត រីចន័រ (Richner) ជាបុគ្គលដ៏ឆ្នើម ដែលបានដឹកនាំមន្ទីរពេទ្យ គន្ធបុប្ផាឱ្យក្លាយជាមន្ទីរពេទ្យមួយក្នុង ចំណោមមន្ទីរពេទ្យដ៏ល្អបំផុតនៅកម្ពុជា។ ការបាត់ បង់លោកវេជ្ជបណ្ឌិត រីចន័រជាការបាត់បង់វរជនម្នាក់ដ៏សំខាន់សម្រាប់ប្រជាជនកម្ពុជា។ ឯកឧត្តមទេសរដ្ឋមន្រ្តីបានបន្តថា នៅក្នុងរយៈពេលចុង ក្រោយនេះ រាជរដ្ឋាភិបាលកម្ពុជាបានចូលទៅធានានិរន្តរភាពមន្ទីរពេទ្យ តាមរយៈការផ្តល់ថវិកាជាតិ ការកៀរគរថវិកាពីវិស័យឯកជន និងសាធារណជន និងការទទួលបុគ្គលិកមន្ទីរពេទ្យឱ្យបានក្របខណ្ឌមន្រ្តីរាជការស៊ីវិលថែមទៀត។

បន្ទាប់មកឯកឧត្តមទេសរដ្ឋមន្រ្តីបានគូសបញ្ជាក់ថា កម្ពុជាបានចំណាយថវិកាជាង២,៥ប៊ីលាន ដុល្លារ ក្នុងការប្រយុទ្ធប្រឆាំងនឹងកូវីដ-១៩។ បើមិនមានកូវីដទេ យើងអាចចូលរួមចំណែកបាន ច្រើន។ ដោយហេតុនេះហើយ យើងនៅតែត្រូវការ ជំនួយពីដៃគូអភិវឌ្ឍន៍។

លោកវេជ្ជបណ្ឌិត ទូឈ័រ បានជម្រាបសួរឯកឧត្តម ទេសរដ្ឋមន្រ្តីអំពីទិដ្ឋភាពធំនៅកម្ពុជា។ ក្នុងនោះ ទាក់ទងនឹងគម្រោងវិនិយោគ ការកែលម្អសេវា សុខាភិបាល និងការធានារ៉ាប់រងសុខភាពជាតិ។ ជាការឆ្លើយតប ឯកឧត្តមទេសរដ្ឋមន្រ្តីបានគូស បញ្ជាក់ថា យើងត្រូវការពង្រឹងអង្គការសង្គមស៊ីវិលឱ្យរឹងមាំ។ ដូច្នេះ ការគាំទ្រពីខាងក្រៅដល់សង្គមស៊ីវិលជាការសំខាន់ចាំបាច់។ ចំពោះការកែលម្អសេវាសុខាភិបាល យើងបានធ្វើឱ្យប្រសើរឡើង លើ ចំណុចជាច្រើនហើយ។ អ្វីដែលត្រូវការគឺការចូលរួមពីផ្នែកផ្សេងៗនៅក្នុងសង្គម។ ជាមួយ គ្នានោះ យើងត្រូវបន្តពង្រឹងប្រព័ន្ធសុខាភិបាល និងកែលម្អប្រព័ន្ធព័ត៌មានវិទ្យា។ ចំពោះការធានារ៉ាប់រងជាតិ កម្ពុជាយើងមានបេឡាជាតិរបបសន្តិសុខសង្គម និងក្រុមប្រឹក្សាជាតិគាំពារសង្គមដែលកំពុងបំពេញតួនាទីយ៉ាងសំខាន់លើកិច្ចការនេះ។

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច