National AIDS Authority

ចំនួនអ្នកទស្សនាគេហទំព័រ:

ឯកឧត្តមទេសរដ្ឋមន្ត្រី អៀង មូលី បានអនុញ្ញាតជូនប្រតិភូការិយាល័យក្រសួងការបរទេសសហរដ្ឋអាមេរិក (SGAC ) ជួបស្វែងយល់ការងារឆ្លើយតបមេរោគអេដស៍ និងជំងឺអេដស៍ នៅព្រះរាជាណាចក្រកម្ពុជា

នៅព្រឹកថ្ងៃព្រហស្បតិ៍ ៦រោច ខែបុស្ស ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី១២ ខែមករា ឆ្នាំ២០២៣ នៅសាលប្រជុំអាជ្ញាធរជាតិប្រយុទ្ធនឹងជំងឺអេដស៍ ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានអញ្ជើញជួបពិភាក្សាការងារជាមួយប្រតិភូ ការិយាល័យក្រសួងការបរទេសសហរដ្ឋអាមេរិក (The US State Department's Office of the Global AIDS Coordinator, SGAC)។

ក្នុងឱកាសនោះ ឯកឧត្តមទេសរដ្ឋមន្ត្រី បានជម្រាបជូនប្រតិភូអំពីតួនាទីអាជ្ញាធរជាតិប្រយុទ្ធនឹងជំងឺអេដស៍ ដែលជាសេនាធិការរបស់រាជរដ្ឋាភិបាលនៃព្រះរាជាណាចក្រកម្ពុជា ក្នុងការដឹកនាំការងារបង្ការឆ្លើយតបមេរោគអេដស៍ និងជំងឺអេដស៍ ជាលក្ខណៈពហុវិស័យ។ អាជ្ញាធរជាតិប្រយុទ្ធនឹងជំងឺអេដស៍ មានរចនាសម្ព័ន្ធ នៅថ្នាក់ជាតិ មានគណៈកម្មាធិការប្រយុទ្ធនឹងជំងឺអេដស៍ក្រសួង ស្ថាប័ន នៅថ្នាក់ក្រោមជាតិមាន គណៈកម្មាធិការប្រយុទ្ធនឹងជំងឺអេដស៍រាជធានី ខេត្ត គណៈកម្មាធិការប្រយុទ្ធនឹងជំងឺអេដស៍ក្រុង ស្រុក ខណ្ឌ និងគណៈកម្មាធិការប្រយុទ្ធនឹងជំងឺអេដស៍ឃុំ សង្កាត់។

តាមរយៈផែនការយុទ្ធសាស្ត្រជាតិ ទូលំទូលាយ និងពហុវិស័យឆ្លើយតបទៅនឹងមេរោគអេដស៍ និងជំងឺអេដស៍លើកទី៥ ឆ្នាំ២០១៩-២០២៣ និងលិខិតលេខ ២១៣ សជណ.សស ចុះថ្ងៃទី២១ ខែកុម្ភៈ ឆ្នាំ២០១៩ អំពីការដាក់វិធានការទាក់ទងនឹងការឆ្លើយតបទៅនឹងមេរោគអេដស៍ និងជំងឺអេដស៍ របស់ទីស្តីការគណៈរដ្ឋមន្រ្តី អាជ្ញាធរជាតិប្រយុទ្ធនឹងជំងឺអេដស៍បាន និងកំពុងដឹកនាំការងារឆ្លើយតបមេរោគអេដស៍ និងជំងឺអេដស៍យ៉ាងសកម្មដោយអនុវត្តនូវគោលការណ៍បីមួយ៖ ផែនការយុទ្ធសាស្ត្រតែមួយ ស្ថាប័នដឹកនាំសម្របសម្រួលតែមួយ និងប្រព័ន្ធតាមដាន ត្រួតពិនិត្យ វាយតម្លៃតែមួយ។

ថ្មីៗនេះ ក្នុងឆន្ទៈមោះមុតឆ្ពោះទៅបញ្ចប់អេដស៍ជាការគំរាមកំហែងដល់សុខភាពសាធារណៈនៅឆ្នាំ២០២៥ សម្តេចតេជោ នាយករដ្ឋមន្ត្រី បានសម្រេចជូនអាជ្ញាធរជាតិប្រយុទ្ធនឹងជំងឺអេដស៍ រៀបចំ គោលនយោបាយលុបបំបាត់ជំងឺអេដស៍នៅឆ្នាំ២០២៥ និងចីរភាពកម្មវិធីអេដស៍សម្រាប់ឆ្នាំ២០២៣-២០២៨ ដោយមានសមាសភាពពីចូលរួមពីក្រសួង ស្ថាប័នពាក់ព័ន្ធ និងអង្គការ UNAIDS ប្រចាំប្រទេសកម្ពុជា ជាទីប្រឹក្សា។

ប្រទេសកម្ពុជា ក្រោមមគ្គុសទេសភាពដ៏ខ្ពង់ខ្ពស់ របស់ សម្តេចតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា និងការចូលរួមពីគ្រប់ស្ថាប័នថ្នាក់ជាតិ ថ្នាក់ក្រោមជាតិ ដៃគូអង្គការពាក់ព័ន្ធ និងអ្នករងគ្រោះ ប្រទេសកម្ពុជាបានទទួលជោគជ័យយ៉ាងត្រចះត្រចង់ក្នុងការងារឆ្លើយតបមេរោគអេដស៍ និងជំងឺអេដស៍ តាមរយៈការទទួលស្គាល់ពីអង្គការសហប្រជាជាតិ។ ក្នុងឆ្នាំ២០២១ ប្រទេសកម្ពុជា សម្រេចបាន គោលដៅទី១ ៨៤% គោលដៅទី២ ១០០% និងគោលដៅទី៣ ៩៧% នៃគោលដៅ ៩៥ ៩៥ ៩៥ ដែលបានកំណត់សម្រេចឱ្យបានក្នុងឆ្នាំ២០២៥។

ឯកឧត្តមទេសរដ្ឋមន្ត្រី បានបញ្ជាក់បន្ថែមថា អ្វីដែលកម្ពុជាកំពុងប្រឹងប្រែង គឺការធ្វើឱ្យសម្រេចបានគោលដៅទី១ ដែលពេលនេះ ទើបសម្រេចបាន៨៤% នៅឆ្ងាយពីគោលដៅដែលបានកំណត់។ ជាយុទ្ធសាស្ត្រ គឺជំរុញការស្វែងរកអ្នកដែលមិនទាន់ដឹងខ្លួន និងមកធ្វើតេស្តរកមេរោគអេដស៍ចំនួនប្រមាណ១០.០០០នាក់។ កិច្ចការនេះ ទាមទារឱ្យយើងប្រឹងប្រែងរួមគ្នាបន្តទៀត ក្នុងការការងារបង្ការ ការផ្សព្វផ្សាយឱ្យបានទូលំទូលាយតាមគ្រប់មធ្យោបាយ ដើម្បីឱ្យពួកគេយល់ និងអញ្ជើញទៅធ្វើតេស្តរកមេរោគអេដស៍ និងទទួលបានការព្យាបាល ថែទាំទាន់ពេលវេលា។ កិច្ចការដែលជាអាទិភាពមួយទៀត គឺការកាត់បន្ថយការឆ្លងថ្មីនៃមេរោគអេដស៍ ដែលកំពុងកើនឡើងក្នុងចំណោមប្រជាជនគន្លឹះវ័យក្មេង (Young Key Populations) ដែលរួមមាន ក្រុមបុរសរួមភេទជាមួយបុរស ក្រុមស្ត្រីបំប្លែងភេទ ក្រុមស្តី្របម្រើក្នុងសេវាកំសាន្ត ក្រុមប្រើប្រាស់គ្រឿងញៀន។

រាជរដ្ឋាភិបាល បានបង្កើនថវិកាជារៀងរាល់ឆ្នាំដើម្បីឆ្លើយតបទៅនឹងការធ្លាក់ចុះនៃថវិកាជំនួយពីខាងក្រៅ លើការងារឆ្លើយតបមេរោគអេដស៍ និងជំងឺអេដស៍។ ចាប់ពីឆ្នាំ២០២៣-២០២៥ រាជរដ្ឋាភិបាលបានអនុម័តផ្តល់ថវិកាបន្ថែមចំនួន៥លានដុល្លារអាមេរិកក្នុងមួយឆ្នាំ សម្រាប់ការងារអេដស៍ នៅក្នុងប្រទេសកម្ពុជា។ បន្ថែមលើនេះ រាជរដ្ឋាភិបាល តាមរយៈក្រសួងសេដ្ឋកិច្ច និងហិរញ្ញវត្ថុ បានវិភាជន៍ថវិកាដល់ខេត្តចំនួន១៥ សម្រាប់ការងារឆ្លើយតបមេរោគអេដស៍ និងជំងឺអេដស៍ នៅមូលដ្ឋានផ្ទាល់៕

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច