
នៅថ្ងៃពុធ ២រោច ខែផល្គុន ឆ្នាំខាល ចត្វាស័ក ព.ស.២៥៦៦ ត្រូវនឹងថ្ងៃទី ០៨ ខែមីនា ឆ្នាំ២០២៣ ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និងជាប្រធានក្រុមការងារថ្នាក់ជាតិចុះមូលដ្ឋានស្រុកបសេដ្ឋ បានអញ្ជើញជាអធិបតីដ៏ខ្ពង់ខ្ពស់ក្នុងឱកាសអបអរសាទរទិវាអន្តរជាតិនារី៨មីនា លើកទី១១២ ឆ្នាំ២០២៣ ក្រោមប្រធានបទ «ស្ត្រីរួមគ្នា រក្សាសុខសន្តិភាព ដើម្បីកិច្ចអភិវឌ្ឍក្នុងយុគសម័យឌីជីថល»។
ក្នុងឱកាសដ៏ប្រសើរនេះ ឯកឧត្តមទេសរដ្ឋមន្រ្តីបានរំលេចពីតម្លៃនៃការចូលរួមរបស់ស្ត្រី ដែលមិនអាចកាត់ថ្លៃបានក្នុងការចូលរួមថែរក្សាសុខសន្តិភាព ដែលបានផ្តល់ឱកាសដល់ប្រជាពលរដ្ឋយើងទូទាំងប្រទេសកម្ពុជា មានសេចក្តីសុខ មានជីវភាពកាន់តែប្រសើរឡើង ក្រោមម្លប់សន្តិភាពនៃភាពសុខសាន្ត ដែលមនុស្សគ្រប់រូបត្រូវរួមកម្លាំងគ្នារក្សាការពារសន្តិភាពឱ្យនៅគង់វង្ស ដើម្បីកម្ពុជាមានឱកាសគ្រប់គ្រាន់បន្តអភិវឌ្ឍលើគ្រប់វិស័យក្នុងយុគសម័យឌីជីថល។