តួអង្គសំខាន់ៗក្នុងវិស័យអេដស៍នៅប្រទេសកម្ពុជាជួបជុំគ្នា មុនការចេញធ្វើវិបស្សនា
ក្រុមអ្នកធ្វើការលើវិស័យអេដស៍នៅប្រទេសកម្ពុជា បានជួបប្រជុំគ្នា ដើម្បីចែករំលែកនូវបទពិសោធន៍ និងផែនការការងារឆ្នាំ២០១៤ នៅទីស្នាក់ការកណ្តាល នៃអាជ្ញាធរជាតិប្រយុទ្ធនឹងជម្ងឺអេដស៍ (NAA) កាលពីថ្ងៃទី១៧ ខែកុម្ភៈ ឆ្នាំ២០១៤ ។
ការជួបជុំគ្នានេះ បានធ្វើឡើងក្រោមអធិបតីភាពរបស់ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិ NAA ហើយការចែករំលែកបទពិសោធន៍ និងផែនការងារឆ្នាំ២០១៤នេះ បានត្រូវធ្វើឡើងតែប៉ុន្មានម៉ោងមុនការចេញដំណើរទៅកាន់ក្រុងព្រះសីហនុ ដោយក្រុមមន្ត្រីថ្នាក់ដឹកនាំ និងបុគ្គលិករបស់ អាជ្ញាធរអេដស៍ ។
ជាកិច្ចចាប់ផ្តើម ឯកឧត្តមទេសរដ្ឋមន្ត្រី អៀង មូលី បានសំដែងនូវការស្វាគមន៍យ៉ាងកក់ក្តៅចំពោះវត្តមានរបស់តំណាងដៃគូអភិវឌ្ឍន៍លើវិស័យអេដស៍ ដែលក្នុងនោះរួមមាន UNAIDS, ក្រុមប្រឹក្សាអភិវឌ្ឍន៍កម្ពុជា (CDC), អង្គការ NCHADS, អង្គការ KHANA និងអ្នកចូលរួមនៅក្នុងពិធីជួបប្រជុំគ្នានេះ ។
ឯកឧត្តមទេសរដ្ឋមន្ត្រី បានគូសបញ្ជាក់អំពីគោលបំណងនៃការជួបប្រជុំគ្នា និងការធ្វើវិបស្សនានេះ ថានឹងនាំមកនូវសាមគ្គីភាព និងឯកភាពគ្នា ក្នុងចំណោមអ្នកធ្វើការលើវិស័យអេដស៍នៅប្រទេសកម្ពជា និងការទទួលបាននូវចំណេះដឹងថ្មីៗដែលឆ្លើយតបទៅនឹងបំរែបំរួលនៃការចម្លងមេរោគអេដស៍ ។
បន្ទាប់ពីប្រសាសន៍ស្វាគមន៍របស់ឯកឧត្តមទេសរដ្ឋមន្ត្រី ប្រធានអាជ្ញាធរបានបញ្ចប់ បទបង្ហាញចំនួនបួន បានត្រូវធ្វើឡើងដោយតំណាងដៃគូអភិវឌ្ឍន៍សំខាន់ៗ ដែលក្នុងនោះរួមមាន បទបង្ហាញដែលធ្វើឡើងដោយលោកស្រី វ៉ានឺដា មកពីក្រុមប្រឹក្សាអភិវឌ្ឍន៍កម្ពុជា (CDC), បទបង្ហាញរបស់លោកស្រី ម៉ារី អូឌីល តំណាងអង្គការសហប្រជាជាតិទទួលបន្ទុកផ្នែកការងារអេដស៍ (UNAIDS) នៅប្រទេសកម្ពុជា, បទបង្ហាញរបស់លោកវេជ្ជបណ្ឌិត លី ពេញស្រ៊ុន មកពី អង្គការ NCHADS, និងបទបង្ហាញរបស់លោកជួប សុខចំរើន មកពីអង្គការ KHANA ។
ឯកឧត្តមទេសរដ្ឋមន្ត្រី ប្រធានអាជ្ញាធរជាតិប្រយុទ្ធនឹងជម្ងឺអេដស៍ អៀង មូលី រំពឹងថា បទបង្ហាញរបស់តំណាងដៃគូអភិវឌ្ឍន៍ទាំង៤ នឹងនាំមកនូវប្រយោជន៍ដល់ក្រុមអ្នកធ្វើវិបស្សនានៃអាជ្ញាធរជាតិ ដើម្បីអោយស្ថាប័នរដ្ឋមួយនេះ អាចច្បិចយកចំណុចសំខាន់ៗ ទៅធ្វើការពិភាក្សាគ្នា ក្នុងគោលបំណងរៀបចំគម្រោងផែនការការងាររបស់ខ្លួន សម្រាប់ឆ្នាំក្រោយៗទៀត ។
ការជួបប្រជុំគ្នានោះ បានត្រូវចូលរួមដោយឯកឧត្តម លោកជំទាវ លោក លោកស្រី នាងកញ្ញា ថ្នាក់ដឹកនាំ និងមន្រ្តីសំខាន់ៗ នៃអាជ្ញាធរជាតិប្រយុទ្ធនឹងជម្ងឺអេដស៍ ៕
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
