National AIDS Authority

ចំនួនអ្នកទស្សនាគេហទំព័រ:

កិច្ចប្រជុំប្រចាំត្រីមាសស្តីពីការពង្រឹងបណ្តាញការងារអ្នកអប់រំតាមមូលដ្ឋាន ដើម្បីជម្រុញក្រុមស្រីស្រស់ទៅទទួលសេវាសុខភាព

នាព្រឹកថ្ងៃទី ៤ ខែ មីនា ឆ្នាំ ២០១៤ នៅសណ្ឋារគារ អង្គរផារ៉ាដាយ ខេត្តសៀមរាប មានរៀបចំកិច្ចប្រជុំប្រចាំត្រីមាស ស្តីពីការពង្រឹងបណ្តាញការងារអ្នកអប់រំមូលដ្ឋាន ដើម្បីជម្រុញក្រុមស្រីស្រស់ទៅទទួលសេវាសុខភាព ក្រោមការចូលរួមពីក្រុមការងារបច្ចេកទេសថ្នាក់ជាតិបុរសស្រឡាញ់បុរស និងស្រីស្រស់ អាជ្ញាធរមូលដ្ឋាន ប៉ូលីស អង្គការធ្វើការងារផ្នែកកម្មវិធីអេដស៍ បុគ្គលិកធ្វើការងារនៅមូលដ្ឋាន និងក្រុមស្រីស្រស់មកពីសហគមន៍ដែលងាយរងគ្រោះផ្ទាល់ដោយសារមេរោគអេដស៍ និងជំងឺអេដស៍។ កិច្ចប្រជុំនេះ មានគោលបំណងសំខាន់ ដើម្បីជម្រុញការទៅទទួលសេវាសុខភាពមានដូចជាសេវាកាមរោគ សេវាពិនិត្យឈាមរកមេរោគអេដស៍ និងសេវាចាំបាច់ផ្សេងៗទៀត។ កិច្ចប្រជុំ ក៏ដើម្បីឱ្យមានការចូលរួម គាំទ្រ និងកិច្ចសហការណ៍ពីអាជ្ញាធរមូលដ្ឋាន និងប៉ូលីសផងដែរ។

ថ្លែងក្នុងឱកាសបើកកិច្ចប្រជុំ ឯកឧត្តម វេជ្ជ. តែង គន្ធី អគ្គលេខាធិការ នៃអាជ្ញាធរជាតិប្រយុទ្ធនឹងជំងឺអេដស៍ និងជាប្រធានក្រុមការងារថ្នាក់ជាតិបុរសស្រឡាញ់បុរស និងស្រីស្រស់ បានគូសបញ្ជាក់ថា បញ្ហាមេរោគអេដស៍ និងជំងឺអេដស៍នូវតែជាបញ្ហាដ៏រសើប នៅក្នុងប្រទេសកម្ពុជានៅឡើយ ដោយជំងឺអេដស៍នៅតែសម្លាប់ប្រជាជនក្នុងប្រទេសកម្ពុជា យ៉ាងស្ងៀមស្ងាត់។ ការប្រឈមភាគច្រើនកើតមានចំពោះក្រុមបុរសស្រឡាញ់បុរស ក្រុមស្រីស្រស់ ក្រុមស្ត្រីបម្រើការងារកន្លែងកម្សាន្តសប្បាយ និងក្រុមអ្នកប្រើប្រើប្រាស់គ្រឿងញៀន។ ឯកឧត្តម បានបន្ថែមទៀតថា មានចំណុច ៣សំខាន់ៗ ដែលត្រូវយកចិត្តទុកដាក់ក្នុងកិច្ចប្រជុំនេះ ទី១ បញ្ហាក្រុមស្រីស្រស់យើងត្រូវតែយកចិត្តទុកដាក់ ព្រោះក្រុមនេះ ពិតជាងាយរងគ្រោះដោយសារជំងឺអេដស៍ និងមេរោគអេដស៍។ ទី២ ការរើសអើង ដែលជាបញ្ហាដ៏ចម្បងសម្រាប់ក្រុមស្រីស្រស់ក្នុងការទៅទទួលសេវា និងទី៣ ត្រូវអប់រំ និងផ្សព្វផ្សាយឱ្យបានទូលំទូលាយដល់ក្រុមស្រីស្រស់ស្តីពីវិធានការណ៍ និងការពារខ្លួនពីមេរោគអេដស៍ និងជំងឺអេដស៍។

ឯកឧត្តម បានបន្តថារាជរដ្ឋាភិបាលកម្ពុជា បានដាក់ចេញនូវគោលនយោបាយថ្មីក្នុងការទប់ស្កាត់ការរីករាលដាលមេរោគអេដស៍នៅកម្ពុជា ។ គោលការណ៍ថ្មីនេះ មាន ៧ចំណុចសំខាន់រួមមាន៖

១. អាជ្ញាធរជាតិប្រយុទ្ធនឹងជំងឺអេដស៍ ត្រូវបន្តសហការណ៍ជាមួយបណ្តាក្រសួង ស្ថាប័នពាក់ព័ន្ធ រួមទាំងដៃគូអភិវឌ្ឍន៍ និង អង្គការសង្គមស៊ីវិល ដើម្បីជំរុញ និង លើកទឹកចិត្ត ឱ្យមានការប្រើប្រាស់ស្រោមអនាម័យ ១០០% ដើម្បីសុវត្ថិភាពក្នុងការរួមភេទ ឱ្យរួចចាកឆ្ងាយពីមេរោគអេដស៍ និង ជំងឺអេដស៍ ។

២. បញ្វូលការប្រយុទ្ធនឹងជំងឺអេដស៍ និង សុខភាពមាតា ជាចំណុចបន្ថែម នៃគោលនយោបាយភូមិ ឃុំ មានសុវត្ថិភាព ។

៣. អាជ្ញាធរជាតិប្រយុទ្ធនឹងជំងឺអេដស៍ ក្រសួងសុខាភិបាល និង ស្ថាប័នពាក់ព័ន្ធ រូមទាំងដៃគូអភិវឌ្ឍន៍ និង អង្គការសង្គមស៊ីវិល ត្រូវសហការគ្នារៀបចំផែនទីបញ្ជាក់ពីភូមិសាស្រ្ត ចំនូនអ្នករស់នៅជាមួយមេរោគអេដស៍ និង ក្រុមងាយរងគ្រោះ ដែលរួមមាននារីបម្រើសេវាកំសាន្ត បុរសស្រឡាញ់បុរស កុមារកំព្រា ដែលឪពុកម្តាយស្លាប់ ដោយសារជំងឺអេដស៍ ជនចំណាកស្រុក ដែលរស់នៅជាមួយមេរោគ អេដស៍ ចំនូន និង ទីកន្លែង មន្ទីរផ្តល់សេវាព្យាបាលជំងឺអេដស៍ ។

៤. អាជ្ញាធរជាតិប្រយុទ្ធនឹងជំងឺអេដស៍ ត្រូវចាត់វិធានការណ៍ ធ្វើឱ្យគណៈកម្មាធិការប្រយុទ្ធនឹងជំងឺ អេដស៍ប្រចាំរាជធានី-ខេត្ត ក្រុង ស្រុក ឃុំ សង្កាត់ មានសកម្មភាពឡើងវិញ ។ គណៈកម្មា ធិការអេដស៍ខេត្តនីមួយៗ ត្រូវពង្រឹងលក្ខណៈជាដៃគូ ជាមួយអង្គការសង្គមស៊ីវិល ដែលកំពុងដំណើការ នៅក្នុងខេត្តរបស់ខ្លួន ឱ្យមានប្រសិទ្ធភាពខ្ពស់ ។

៥. អាជ្ញាធរជាតិប្រយុទ្ធនឹងជំងឺអេដស៍ អាជ្ញាធរប្រឆាំងគ្រឿងញៀន ក្រសួងមហាផ្ទៃ ក្រសួងសុខាភិបាល និង បណ្តាក្រសួងពាក់ព័ន្ធ ត្រូវសហការណ៍គ្នា ដើម្បីអនុញ្ញាតឱ្យជនងាយរងគ្រោះ ដោយជំងឺ អេដស៍ ដែលជាអាទិ៍ ៖ នារីបម្រើសេវាកំសាន្ត បុរសស្រឡាញ់បុរស អ្នកញៀនគ្រឿងញៀនប្រើម្ជុល អាចទទួលបានសេវាព្យាបាលជំងឺអេដស៍ បានយ៉ាងទូលំទូលាយ។

៦. អាជ្ញាធរជាតិប្រយុទ្ធនឹងជំងឺអេដស៍ ត្រូវសហការណ៍ជាមួយក្រសួងអប់រំ យុវជន និង កីឡា អង្គការយុវជន ស្ថាប័នពាក់ព័ន្ធ ដើម្បីបង្កើនការអប់រំដល់យុវជន យុវនារី ឱ្យយល់ដឹងពីគ្រោះថ្នាក់នៃជំងឺអេដស៍ និង វិធីបង្ការ ការពារឱ្យបានទូលំទូលាយ ។

៧. អាជ្ញាធរជាតិប្រយុទ្ធនឹងជំងឺអេដស៍ មានតួនាទីដឹកនាំ សម្របសម្រួល និង តាមដានការអនុវត្តការងារឆ្លើយតបនឹងមេរោគអេដស៍ ដូចមានចែងក្នុងផែនការយុទ្ធសាស្ត្រអភិវឌ្ឍន៍ជាតិ ២០១៤-២០១៨ ស្របតាមការចង្អុលបង្ហាញរបស់រាជរដ្ឋាភិបាលកម្ពុជា តាមរយៈគណៈកម្មាធិការនិតិសម្បទា និង អភិវឌ្ឍន៍កម្ពុជា នៃក្រុមប្រឹក្សាអភិវឌ្ឍន៍កម្ពុជា ។

ក្នុងកិច្ចប្រជុំនេះ បានបង្ហាញពីរបាយការណ៍សកម្មភាពសម្រាប់ក្រុមស្រីស្រស់ របាយការសិក្សាស្រាវជ្រាវស្តីពីស្ថានភាព បុរសស្រឡាញ់បុរស និងស្រីស្រស់ និងផែនការយុទ្ធសាស្រ្តរបស់ក្រុមការងារបច្ចេកទេសសម្រាប់ឆ្នាំ ២០១៤។ ជាលទ្ធផល អ្នកចូលរួមទាំងអស់ ជាពិសេសអាជ្ញាធរមូលដ្ឋាន និងប៉ូលីស ពង្រឹកិច្ចសហការណ៍ក្នុងការអនុវត្តការងារប្រកបដោយប្រសិទ្ធភាពខ្ពស់។

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច