ឯ.ឧ. ទេសរដ្ឋមន្រ្តី អៀង មូលី អញ្ជើញជាអធិបតីក្នុងកិច្ចប្រជុំស្ថាប័នពាក់ព័ន្ធ នៃក្រុមប្រឹក្សាគោលនយោបាយស្តីពីការផ្ទៀងផ្ទាត់របាយការណ៍វឌ្ឍនភាពជាសកល នៃការឆ្លើយតបជាពហុវិស័យទៅនឹងការរាលដាលមេរោគអេដស៍ និង ជំងឺអេដស៍ នៅប្រទេសកម្ពុជា ឆ្នាំ២០១៤
នាព្រឹកថ្ងៃទី២៤ មីនា ២០១៤ នៅទីស្នាក់ការកណ្តាលអាជ្ញាធរជាតិប្រយុទ្ធនឹងជំងឺអេដស៍ ឯ.ឧ.ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍បានអញ្ជើញជាអធិបតីក្នុង កិច្ចប្រជុំ ស្ថាប័នពាក់ព័ន្ធនៃក្រុមប្រឹក្សាគោលនយោបាយស្តីពីការផ្ទៀងផ្ទាត់របាយការណ៍វឌ្ឍនភាព ជាសកលនៃការឆ្លើយតបជាពហុវិស័យទៅនឹងការរាលដាលមេរោគអេដស៍ និង ជំងឺអេដស៍នៅ ប្រទេសកម្ពុជា ឆ្នាំ២០១៤។
ឯ.ឧ. ប្រធានបានមានប្រសាសន៍ថា ចាប់តំាងពីឆ្នាំ២០០០មក ពិភពលោកបានផ្តើមកំណត់ គោលដៅសហស្សវត្សរ៍ ដែលក្នុងនោះប្រទេសកម្ពុជាយើងបានផ្ញើជូនអង្គការសហប្រជាជាតិនូវ របាយការណ៍វឌ្ឍនភាពនៃការឆ្លើយតបទៅនឹងការរាលដាលមេរោគអេដស៍/ជំងឺអេដស៍ ដូចគ្នានេះ នៅរៀងរាល់ពីរឆ្នាំម្តង ដែលមកទល់ពេលនេះ មានចំនួនប្រាំលើករួចមកហើយ ។ របាយការណ៍ចុង ក្រោយគឺបានផ្ញើទៅកាលខែមីនា ឆ្នាំ២០១២ ។
ឯ.ឧ. ប្រធានបានបន្តថានាយកដ្ឋានតាមដាន និង វាយតម្លៃ នៃអាជ្ញាធរជាតិប្រយុទ្ធនឹងជំងឺ អេដស៍នឹងធ្វើបទបង្ហាញអំពីវឌ្ឍនភាព នៃគោលដៅទាំងដប់លើសូចនាករទាំង៣២ ដែលប្រទេស កម្ពុជាយើងបានប្តេជ្ញាចិត្តទទួលយក គោលដៅបីសូន្យ ពីអង្គការសហប្រជាជាតិមកអនុវត្តតាំងពី ឆ្នាំ២០១១ មកម្ល៉េះ ។ ដើម្បីឈានទៅសម្រេចគោលដៅបីសូន្យដែលគ្មានការឆ្លងថ្មី គ្មានការរើស អើង និង គ្មានការស្លាប់ ក្រុមការងារផែនការយុទ្ធសាស្រ្តជាតិ ៥ក្រុមនឹងត្រូវបង្កើតឡើងដោយយក គោលនយោបាយទាំង ៧ចំណុចរបស់រាជរដ្ឋាភិបាលក្រោមការដឹកនាំប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្រ្តីនៃព្រះរាជាណាចក្រកម្ពុជា ធ្វើជា ផែនទីបង្ហាញផ្លូវសម្រាប់កម្មវិធីឆ្លើយតបនឹងមេរោគអេដស៍ និង ជំងឺអេដស៍តាមក្រុមគោលដៅ និង តាមដែនទទួលខុសត្រូវរបស់ខ្លួន ។
ឯ.ឧ.ទេសរដ្ឋមន្រ្តីបានផ្តល់ជាអនុសាសន៍ឱ្យអង្គប្រជុំត្រួតពិនិត្យព័ត៌មាន និង ទិន្នន័យដែល ពាក់ព័ន្ធ ហើយធ្វើការវិភាគវាយតម្លៃ និងទាញការសន្និដ្ឋានដោយមានការថ្លឹងថ្លែង និងប្រកបដោយ សុភវិនិច្ឆ័យ ពីព្រោះថា ការឯកភាពគ្នាជាសម្លេងជាតិតែមួយគឺជាចំណុចខ្លាំងដែលគ្មានអ្វីអាច ប្រៀបស្មើបាន ។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
