ឯ.ឧ. ទេសរដ្ឋមន្រ្តី អៀង មូលី អញ្ជើញចូលរួមក្នុងកិច្ចប្រជុំជាមួយ អ្នកតំណាងមូលនិធិសកល
នារសៀលថ្ងៃទី៤ មេសា ២០១៤ នៅទីស្នាក់ការកណ្តាលអាជ្ញាធរជាតិប្រយុទ្ធនឹងជំងឺ អេដស៍ ឯ.ឧ.ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍បានអញ្ជើញ ចូលរួមក្នុងកិច្ចប្រជុំជាមួយតំណាងមូលនិធិសកលអំពី គំរូថវិកាថ្មីដែលដាក់បញ្ចូលព័ត៌មានថ្មីៗ សម្រាប់កម្ពុជា ។
សមាសភាពដែលចូលរួមក្នុងកិច្ចប្រជុំនេះរួមមាន ៖ លោកស្រី Nicole Delaney និង សហការិនីពីររូបដែលជាអ្នកតំណាងមូលនិធិសកលក្រុមប្រឹក្សាពិគ្រោះយោបល់ប្រចាំប្រទេស កម្ពុជា (CCC) តំណាងក្រសួងសុខាភិបាល តំណាងអង្គការសុខភាពពិភពលោក តំណាងស្ថានទូត អាមេរិក បារាំង និងអាល្លឺម៉ង់ ព្រមទាំងអ្នកតំណាងក្រុមអ្នកទទួលជំនួយពីមូលនិធិសកល ។
របៀបវារៈនៃកិច្ចប្រជុំនេះរួមមាន ៖
១. គំរូថវិកាថ្មីដែលដាក់បញ្ចូលព័ត៌មានថ្មីៗសម្រាប់កម្ពុជា(ដោយលោកស្រី Nicole Delaney)
២. វេទិកាសំណួរ-ចម្លើយ ។
លោកស្រី Nicole Delaney បានធ្វើបទបង្ហាញអំពីគំរូថវិកាថ្មីរបស់មូលនិធិសកលដោយ ក្នុងនោះបានសង្កត់ធ្ងន់លើ ការផ្តល់ធនធានឱ្យកម្ពុជាសម្រាប់ឆ្នាំ២០១៤-២០១៧ ដែលក្នុងនោះ មានកញ្ចប់ថវិកាផ្តល់ឱ្យសម្រាប់ជំងឺអេដស៍ ៧៥,៣លានដុល្លារ របេង ១៥,៦លានដុល្លារ គ្រុនចាញ់ ៤៩,៣លានដុល្លារ និង ការពង្រឹងប្រព័ន្ធសុខាភិបាល ៨,៥លានដុល្លារ ។ ថវិកាសរុបរយៈពេល ៣ឆ្នាំនឹងមានចំនួន ១៤៨,៨លានដុល្លារ ។
លោកស្រី Nicole Delaney បានលើកឡើងពីការរក្សាទុក ១៥%នៃថវិកាសរុបខាងលើរបស់ មូលនិធិសកល ហើយប្រគល់ឱ្យមកវិញនៅពេលដែលរាជរដ្ឋាភិបាលបង្កើនថវិកាសុខាភិបាល រហូតដល់ ៥,៥លានដុល្លារ ។
ឯ.ឧ. ទេសរដ្ឋមន្រ្តីបានគូសបញ្ជាក់ថា មានការយឺតយ៉ាវក្នុងការផ្តល់ថវិកាក្នុងការបើក មូលនិធិ ។ ឧទាហរណ៍ដូចជាឆ្នាំនេះយើងខាតអស់មួយត្រីមាសរួចទៅហើយ ដោយមូលនិធិមិនទាន់អនុម័តលើគម្រោងហ្វឹកហ្វឺននៅឡើយ ។
នៅទីបញ្ចប់លោកស្រី Nicole Delaney បានលើកឡើងពីការប្រជុំមូលនិធិសកលថ្នាក់តំបន់ នៅពាក់កណ្តាលខែមិថុនា នៅទីក្រុងភ្នំពេញ ។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
.jpg)
