ឯ.ឧ. ទេសរដ្ឋមន្រ្តី អៀង មូលី អញ្ជើញជាអធិបតីក្នុងកិច្ចប្រជុំលើកទី៦៥ នៃគណៈកម្មាធិការសម្របសម្រួលប្រចាំប្រទេសរបស់មូលនិធិសកល
នាវេលាម៉ោង ២រសៀល ថ្ងៃទី៨ ខែមេសា ឆ្នាំ២០១៤ នៅទីស្នាក់ការកណ្តាលអាជ្ញាធរជាតិ ប្រយុទ្ធនឹងជំងឺអេដស៍ មានរៀបចំកិច្ចប្រជុំលើកទី៦៥ នៃគណៈកម្មាធិការសម្របសម្រួលប្រចាំ ប្រទេសកម្ពុជារបស់មូលនិធិសកល ក្រោមអធិបតីភាពរបស់ ឯ.ឧ. ទេសរដ្ឋមន្រ្តី អៀង មូលី ប្រធាន អាជ្ញាធរជាតិប្រយុទ្ធនឹងជំងឺអេដស៍ និង ជាប្រធានគណៈកម្មាធិការសម្របសម្រួលប្រចាំកម្ពុជា ។
សមាសភាព ចូលរួមក្នុងកិច្ចប្រជុំនេះរួមមាន ៖ ឯកឧត្តម លោកជំទាវ រដ្ឋលេខាធិការ អនុរដ្ឋលេខាធិការដែលជាតំណាងមកពីក្រសួងពាក់ព័ន្ធនៃរាជរដ្ឋាភិបាលកម្ពុជា តំណាងអង្គការ សហប្រជាជាតិមកពី WHO, UNAIDS, UNOPS និង ដៃគូអភិវឌ្ឍន៍ដែលមាន តំណាងស្ថានទូតបារាំង អាល្លឺម៉ង់ និងសហរដ្ឋអាម៉រិក សង្គមស៊ីវិលដែលមានអង្គការក្រៅរដ្ឋាភិបាលពាក់ព័ន្ធនឹងការប្រយុទ្ធនឹងជំងឺអេដស៍ របេង និង គ្រុនចាញ់ តំណាងអ្នកផ្ទុកមេរោគ សំខាន់ៗ តំណាងសហគមន៍សាសនា និង វិស័យឯកជនដែលមានសភាពាណិជ្ជកម្ម និងគ្រឹះស្ថាន ឧត្តមសិក្សាឯកជន ។
អង្គប្រជុំបានជ្រើសរើសវេជ្ជបណ្ឌិត ដុងអ៊ីល អាន់ (Dong-Il AHN) អ្នកតំណាងអង្គការ សុខភាពពិភពលោកឱ្យធ្វើជាអនុប្រធានគណៈកម្មាធិការសម្របសម្រួលប្រចាំប្រទេស ។ បន្ទាប់ មកអង្គប្រជុំបានពិនិត្យលើគំរូហិរញ្ញប្បទានថ្មីរបស់មូលនិធិសកល ដែលបានសម្រេចផ្តល់ជំនួយជា ទឹកប្រាក់ចំនួន ១៤៨,៨លានដុល្លារអាម៉េរិក សម្រាប់រយៈពេលបីឆ្នាំគឺពីឆ្នាំ២០១៤ដល់ឆ្នាំ២០១៧ ។ ក្នុងនោះកញ្ចប់ថវិកាផ្តល់ឱ្យសម្រាប់រយៈពេលបីឆ្នាំលើជំងឺអេដស៍មានចំនួន ៧៥,៣លានដុល្លារ របេង ១៥,៦ លានដុល្លារ គ្រុនចាញ់ ៤៩,៣លានដុល្លារ និង ការពង្រឹងប្រព័ន្ធសុខាភិបាល ៨,៥ លានដុល្លារ ។
ជាមួយគ្នានោះ អង្គប្រជុំគណៈកម្មាធិការសម្របសម្រួលប្រចាំប្រទេស ក៏បានពិនិត្យមើល លើសមាជិកភាពថ្មីដែលតំណាងពី អ្នករងគ្រោះដោយជំងឺគ្រុនចាញ់ ដែលទើបត្រូវបានជ្រើសរើស ថ្មី ។
អង្គប្រជុំគណៈកម្មាធិការសម្របសម្រួលប្រចាំប្រទេស ក៏បានស្តាប់របាយការណ៍នៃគណៈ កម្មាធិការត្រួតពិនិត្យស្តីពីសកម្មភាពការងារឆ្នាំ២០១៤និងសកម្មភាពចុះធ្វើការនៅតាមមូលដ្ឋាន។
នៅទីបញ្ចប់ឯ.ឧ. ទេសរដ្ឋមន្រ្តីប្រធានអង្គប្រជុំបានថ្លែងអំណរគុណចំពោះមូលនិធិសកល ដែលបន្តផ្តល់ជំនួយដល់កម្ពុជាក្នុងការប្រឆាំងជំងឺអេដស៍ របេង គ្រុនចាញ់ និងជួយពង្រឹងសមត្ថ ភាពវិស័យសុខាភិបាលនៅកម្ពុជា ។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
