កិច្ចប្រជុំថ្នាក់ដឹកនាំ ប្រចាំខែកញ្ញា របស់អាជ្ញាធរអេដស៍
អាជ្ញាធរជាតិប្រយុទ្ធនឹងជម្ងឺអេដស៍បានបើកកិច្ចប្រជុំថ្នាក់ដឹកនាំប្រចាំខែកញ្ញា កាលពីព្រឹកថ្ងៃអង្គារ ទី៣០ ខែកញ្ញា ឆ្នាំ២០១៤ ។ កិច្ចប្រជុំនេះធ្វើឡើងក្រោមអធិបតីភាពរបស់ឯកឧត្តមទេសរដ្ឋមន្ត្រី អៀង មូលី ទទួលបន្ទុកបេសកកម្មពិសេសនៃរាជរដ្ឋាភិបាលកម្ពុជា និងជាប្រធានអាជ្ញាធរជាតិប្រយុទ្ធនឹងជម្ងឺអេដស៍ នៅទីស្នាក់ការនៃអាជ្ញាធរជាតិប្រយុទ្ធនឹងជម្ងឺអេដស៍ ក្នុងរាជធានីភ្នំពេញ ។ អញ្ជើញចូលរួមក្នុងកិច្ចប្រជុំនេះ រួមមានឯកឧត្តម លោកជំទាវអនុប្រធាន ឯកឧត្តមទីប្រឹក្សាអាជ្ញាធរ ឯកឧត្តមអគ្គលេខាធិការ ឯកឧត្តមអគ្គលេខាធិការរង និងប្រធាននាយកដ្ឋានទាំងអស់របស់អាជ្ញាធរជាតិប្រយុទ្ធនឹងជម្ងឺអេដស៍ ។
កិច្ចប្រជុំបានផ្តោតលើរបៀបវារៈសំខាន់ៗចំនួន៤ គឺ៖
- ស្តាប់របាយការណ៍វឌ្ឍនភាពរបស់អគ្គលេខាធិការដ្ឋាន
- ស្តាប់របាយការណ៍ស្តីពីការត្រៀមរៀបចំធ្វើម្ចាស់ផ្ទះ ICAAP13 នៅឆ្នាំ២០១៧
- របាយការណ៍ស្តីពីការអនុវត្តកម្មវិធីមូលនិធិសកល
- របាយការណ៍ស្តីពីការត្រៀមរៀបចំប្រជុំគោលនយោបាយ និងការរៀបចំទិវា១ធ្នូ និង
- បញ្ហាផ្សេងៗ ។
ឯកឧត្តមទេសរដ្ឋមន្ត្រី អៀង មូលី ទទួលបន្ទុកបេសកកម្មពិសេសនៃរាជរដ្ឋាភិបាលកម្ពុជា និងជាប្រធានអាជ្ញាធរជាតិប្រយុទ្ធនឹងជម្ងឺអេដស៍ បានសំដែងការកោតសរសើរដល់កិច្ចខិតខំប្រឹងប្រែងបំពេញការងារក្នុងការប្រយុទ្ធប្រឆាំងនិងជម្ងឺអេដស៍។ ឯកឧត្តមទេសរដ្ឋមន្ត្រីប្រធាន ក៏បានលើកទឹកចិត្ត ដល់ថ្នាក់ដឹកនាំអាជ្ញាធរជាតិប្រយុទ្ធនឹងជម្ងឺអេដស៍ មានការរក្សាសាមគ្គីភាពផ្ទៃក្នុង, រក្សាខ្ជាប់ខ្ជួននូវសីលធម៌ និងសេចក្តីថ្លៃថ្នូរក្នុងជីវិតការងារ និងជីវិតប្រចាំថ្ងៃ ។ ល។ ទាក់ទងនឹងការដាក់បេក្ខភាពធ្វើជាម្ចាស់ផ្ទះនៃកិច្ចប្រជុំICAAPលើកទី១៣ នៅឆ្នាំ២០១៧ ឯកឧត្តម ទេសរដ្ឋមន្ត្រី ប្រធាន ក៏បានផ្តល់អនុសាសន៍បន្ថែមថា ថ្នាក់ដឹកនាំអាជ្ញាធរជាតិប្រយុទ្ធនឹងជម្ងឺអេដស៍ គប្បីត្រៀមរូបភាពទីតាំងសាលប្រជុំ ហេដ្ឋារចនាសម្ព័ន្ធដឹកជញ្ជូន ព័ត៌មានវិទ្យា ពិភាក្សាជាមួយក្រសួងពាក់ ព័ន្ធ ដើម្បីសិក្សាសកម្មភាពក្រៅICAAP និងជាមួយអង្គការជាតិ និងអន្តរជាតិ ដើម្បីបំពេញឯកសារចាំបាច់នានា ព្រមទាំងសិក្សាលទ្ធភាពបំរុងទុកទីតាំងសាលប្រជុំ សណ្ឋាគារ ក្នុងករណីដែលបេក្ខភាព របស់កម្ពុជាទទួលបានជោគជ័យ ។
លើសពីនេះទៀត ឯកឧត្តមទេសរដ្ឋមន្ត្រី ប្រធានអាជ្ញាធរជាតិប្រយុទ្ធនឹងជម្ងឺអេដស៍ នៅបានផ្តល់ អនុសាសន៍នូវចំណុចមួយចំនួន ដែលពាក់ព័ន្ធដល់ការឃោសនាផ្សព្វផ្សាយពីជម្ងឺអេដស៍ និងស្រោម អនាម័យ ក្នងទិវាបុណ្យអុំទូក និងទិវាប្រយុទ្ធប្រឆាំងនឹងជម្ងឺអេដស៍ជាសកលនៅថ្ងៃទី១ធ្នូ នាពេលខាងមុខនេះ ៕
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
