National AIDS Authority

ចំនួនអ្នកទស្សនាគេហទំព័រ:

ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ ដឹកនាំគណៈប្រតិភូចុះពិនិត្យស្ថានភាពនៃការឆ្លើយតបនឹងមេរោគអេដស៍ និង ជំងឺអេដស៍ នៅខេត្តព្រះសីហនុ

នៅក្នុងគោលបំណងស្វែងយល់ពី ស្ថានភាពបច្ចុប្បន្ននៃការរាលដាលមេរោគអេដស៍ ការ ឆ្លើយតបនៅថ្នាក់ក្រោមជាតិ និង ចំណុចប្រឈមនានា ព្រមទាំងការបញ្រ្ជាបនូវការឆ្លើយ តបនឹងមេរោគអេដស៍ ក្នុងផែនការអភិវឌ្ឍថ្នាក់ជាតិ និង ថ្នាក់ក្រោមជាតិ កាលពីថ្ងៃទី១៣-១៤ ខែតុលា ឆ្នាំ២០១៤ ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹង ជំងឺអេដស៍ បានដឹកនាំគណៈប្រតិភូចុះពិនិត្យស្ថានភាពនៃការឆ្លើយតប នឹងមេរោគអេដស៍ និង ជំងឺអេដស៍នៅខេត្តព្រះសីហនុ ដែលអមដំណើរដោយថ្នាក់ដឹកនាំ មន្រ្តី និង បុគ្គលិក អាជ្ញាធរមួយចំនួន ។

នៅវេលាម៉ោង ២រសៀល ថ្ងៃទី១៣ តុលា គណៈប្រតិភូបានជួបសំណេះសំណាលជាមួយអ្នកជំងឺអេដស៍ ដែលរងគ្រោះធ្ងន់ធ្ងរតាមមូលដ្ឋាន នៅមន្ទីរពេទ្យបង្អែកស្រុកព្រៃនប់ ឃុំវាលរេញ ដោយមានការចូលរួមពីអាជ្ញាធរមូលដ្ឋាន មន្រ្តីសុខាភិបាលស្រុក និង បុគ្គលិកអង្គការដែលធ្វើការផ្ទាល់ ជាមួយអ្នកជំងឺអេដស៍ ។ បន្ទាប់ពីការសាកសួរស្វែងយល់ អំពីស្ថានភាពរស់នៅ ការទទួលយកសេវាព្យាបាល ការជួយជ្រោមជ្រែងពីសំណាក់ អាជ្ញាធរមូលដ្ឋាន និង អង្គការដែលធ្វើការងារផ្ទាល់ជាមួយអ្នកជំងឺអេដស៍ យើងអាចធ្វើការ សន្និដ្ឋានបានអំពីស្ថានភាពជាក់ស្តែងនៅមូលដ្ឋាន ដែលខុសប្លែកពីអ្វីដែលបានលើកឡើង នៅក្នុងរបាយការណ៍ ។

គណៈប្រតិភូបានបន្តដំណើរទៅពិនិត្យការធ្វើតេស្តឈាមនៅម្រាមដៃ ដោយស្ម័គ្រចិត្ត នៅ តាមមណ្ឌលសេវាកម្សាន្តក្នុងក្រុងព្រះសីហនុ នៅក្នុងសង្កាត់៤ និង សង្កាត់៣ ដែលធ្វើ ឡើងដោយអង្គការក្រៅរដ្ឋាភិបាល ដោយមានកិច្ចសហការល្អពីអាជ្ញាធរ មន្រ្តីសុខាភិបាល និង ម្ចាស់មណ្ឌលផ្តល់សេវាកម្សាន្ត ។

នាព្រឹកថ្ងៃទី១៤ ខែតុលា ឯ.ឧ. ទេសរដ្ឋមន្រ្តី បានដឹកនាំការប្រជុំគណៈកម្មាធិការប្រយុទ្ធ នឹងអេដស៍ខេត្តព្រះសីហនុ ដោយមានការចូលរួមពីថ្នាក់ដឹកនាំ និងមន្រ្តីអាជ្ញាធរ លោកស្រី អភិបាលរងខេត្តព្រះសីហនុ ដែលជាប្រធានគណៈកម្មាធិការប្រយុទ្ធនឹងជំងឺអេដស៍ខេត្ត ថ្នាក់ដឹកនាំមន្ទីរសុខាភិបាលខេត្ត និង អង្គការក្រៅរដ្ឋាភិបាលនានា ដែលធ្វើការជាមួយអ្នក ជំងឺអេដស៍ និង ប្រជាជនដែលរងផលប៉ះពាល់នៅក្នុងខេត្តព្រះសីហនុ ។

បន្ទាប់ពីស្តាប់មតិស្វាគមន៍ និង ស្តាប់បទបង្ហាញពីស្ថានភាពនៃការឆ្លើយតបនឹងអេដស៍ក្នុង ខេត្តពីសំណាក់តំណាងលេខាធិការដ្ឋានអេដស៍ខេត្ត តំណាងអង្គការក្រៅរដ្ឋាភិបាលដែល ធ្វើការជាមួយអ្នកជំងឺអេដស៍រួចមក ឯ.ឧ. ទេសរដ្ឋមន្រ្តីបានគូសបញ្ជាក់ពីជោគជ័យក្នុងការ ប្រយុទ្ធនឹងជំងឺអេដស៍ដែលកម្ពុជាបានធ្វើឱ្យសម្រេចកន្លងមក រហូតដល់មានការទទួល ស្គាល់ និង កោតសរសើរជាអន្តរជាតិ ។ ដោយឡែក ឯ.ឧ. ទេសរដ្ឋមន្រ្តីក៏បានសម្តែងនូវ ការកោតសរសើរចំពោះអាជ្ញាធរខេត្ត មន្រ្តីសុខាភិបាល និង អង្គការនានាក្នុងខេត្តព្រះ សីហនុ ជាខេត្តប្រឈមមុខខ្លាំងនឹងការរីករាលដាលមេរោគអេដស៍/ជំងឺអេដស៍ ដែលខិតខំ ធ្វើការងារទទួលបានជោគជ័យ និង រួមចំណែកកាត់បន្ថយអត្រាឆ្លងថ្មីគួរឱ្យកត់សម្គាល់ ។

ដោយមានការព្រួយបារម្ភចំពោះ រលកទី២ នៃការរីករាលដាលមេរោគអេដស៍/ ជំងឺអេដស៍ តាមរយៈការធ្វេសប្រហែសជាមួយនឹងជោគជ័យ និង ការខ្វះព័ត៌មានក្នុងការ បង្ការការចម្លងរោគក្នុងចំណោមយុវវ័យ ឯ.ឧ. ទេសរដ្ឋមន្រ្តីបានផ្តល់ជាអនុសាសន៍ឱ្យ គណៈកម្មាការប្រយុទ្ធនឹងជំងឺអេដស៍ខេត្ត ដែលរួមមានអាជ្ញាធរគ្រប់លំដាប់ថ្នាក់ មន្ទីរសុខា ភិបាល និង អង្គការក្រៅរដ្ឋាភិបាលនានា បន្តសកម្មភាពឱ្យកាន់តែសកម្មដូចជា ការអប់រំ និង ពន្យល់ណែនាំក្នុងការទប់ស្កាត់ការរីករាលដាលមេរោគអេដស៍ ដូចជាការលើកទឹកចិត្ត ឱ្យមានការប្រើប្រាស់ស្រោមអនាម័យឱ្យបានទូលំទូលាយ ។ អង្គប្រជុំបានបញ្ចប់នៅម៉ោង ១១៖០០ ព្រឹក ។

បន្ទាប់មក ឯ.ឧ. ទេសរដ្ឋមន្រ្តី ប្រធានអាជ្ញាធរជាតិប្រយុទ្ធនឹងជំងឺអេដស៍ និង គណៈ ប្រតិភូអមដំណើរបានចុះពិនិត្យ និង សាកសួរសុខទុក្ខអ្នកជំងឺអេដស៍ដែលកំពុងសម្រាក ព្យាបាល នៅមន្ទីរពេទ្យបង្អែកខេត្ត ដោយនាំយកនូវថវិកាមួយចំនួនទៅចែកជូនដើម្បី សម្រាលនូវការលំបាករបស់ពួកគាត់ ។
នៅក្នុងដំណើរត្រឡប់មកភ្នំពេញវិញ គណៈប្រតិភូបានទៅពិនិត្យស្ថានភាពជាក់ ស្តែង និង សាកសួរសុខទុក្ខគ្រួសាររងផលប៉ះពាល់ដោយសារជំងឺអេដស៍ ដែលទទួលបាន សេវាគាំទ្រនៅតាមមូលដ្ឋាននៅក្នុងឃុំសំរុង ស្រុកព្រៃនប់ ។

គណៈប្រតិភូបានបញ្ចប់បេសកកម្ម ដោយទទួលបាននូវលទ្ធផលជាវិជ្ជមាននៅក្នុង ការស្វែងយល់អំពីស្ថានភាពបច្ចុប្បន្ននៃការរាលដាលមេរោគអេដស៍ ដែលជាព័ត៌មានជាក់ ស្តែងក្នុងរៀបចំផែនការឆ្លើយតបនឹងមេរោគអេដស៍/ជំងឺអេដស៍ នៅថ្នាក់ជាតិ និង ថា្នក់ ក្រោមជាតិ ដើម្បីឈានទៅសម្រេចតាមយុទ្ធសាស្រ្ត៧ចំណុចរបស់រាជរដ្ឋាភិបាល និង គោលដៅ ៣.០ នៃការប្រយុទ្ធនឹងជំងឺអេដស៍ គឺ គ្មានការឆ្លងថ្មី គ្មានការរើសអើង និង គ្មានការស្លាប់ដោយសារជំងឺអេដស៍ ។



ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ ដឹកនាំគណៈប្រតិភូចុះពិនិត្យស្ថានភាពនៃការឆ្លើយតបនឹងមេរោគអេដស៍ និង ជំងឺអេដស៍ នៅខេត្តព្រះសីហនុ

កម្រងរូបភាពគណៈប្រតិភូចុះពិនិត្យស្ថានភាពនៃការឆ្លើយតបនឹងមេរោគអេដស៍ និង ជំងឺអេដស៍ នៅខេត្តព្រះសីហនុ៖

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច