National AIDS Authority

ចំនួនអ្នកទស្សនាគេហទំព័រ:

ឯ.ឧ. ទេសរដ្ឋមន្រ្តី អៀង មូលី អញ្ជើញជាអធិបតីក្នុងកិច្ចប្រជុំពេញអង្គរបស់ អាជ្ញាធរជាតិប្រយុទ្ធនឹងជំងឺអេដស៍លើកទី២ ប្រចាំឆ្នាំ២០១៤

នាព្រឹកថ្ងៃទី២១ តុលា ២០១៤ នៅទីស្តីការគណៈរដ្ឋមន្រ្តី ឯ.ឧ.ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានអញ្ជើញជាអធិបតីនៅក្នុងកិច្ចប្រជុំពេញអង្គរបស់ អាជ្ញាធរជាតិប្រយុទ្ធនឹងជំងឺអេដស៍ លើកទី២ ប្រចាំឆ្នាំ២០១៤ ដោយមានការចូលរួមពី ឯកឧត្តម លោកជំទាវជាអនុប្រធាន អគ្គលេខាធិការ អគ្គលេខាធិការរងអាជ្ញាធរ និង ឯកឧត្តម លោកជំទាវ ជារដ្ឋលេខាធិការ អនុរដ្ឋលេខាធិការ និង អស់លោក លោកស្រី ដែលជាប្រធាន ព្រមទាំងអ្នក តំណាងគណៈកម្មាធិការអេដស៍នៅតាមក្រសួង រដ្ឋលេខាធិការដ្ឋាន រាជធានី ខេត្ត ក្រុងនៅទូទាំង ព្រះរាជាណាចក្រកម្ពុជា មន្រ្តី និង បុគ្គលិក តាមស្ថាប័ន និង អង្គការក្រៅរដ្ឋាភិបាលដែលពាក់ព័ន្ធ ប្រមាណជា ១៥០នាក់ ។

របៀបវារៈនៃកិច្ចប្រជុំនេះរួមមាន ៖

សុន្ទរកថាបើកកិច្ចប្រជុំដោយ ឯ.ឧ.ទេសរដ្ឋមន្រ្តី ប្រធានអាជ្ញាធរជាតិប្រយុទ្ធនឹងជំងឺ អេដស៍ (អ.ជ.ប.ជ.អ)
ការអានសេចក្ដីសម្រេចលេខ ១២២ សសរ របស់រាជរដ្ឋាភិបាល ចុះថ្ងៃទី៨ ខែសីហា ឆ្នាំ២០១៤ ស្ដីពីការតែងតាំងសមាសភាពអាជ្ញាធរជាតិប្រយុទ្ធនឹងជំងឺអេដស៍ដោយ ឯកឧត្ដមវេជ្ជ.តែង គន្ធី អគ្គលេខាធិការអ.ជ.ប.ជ.អ
ការធ្វើបទបង្ហាញការពិភាក្សានិងអនុម័តលើ“ទម្រង់នៃការបង្កើតគម្រោងផែនការ យុទ្ធសាស្ដ្រជាតិទូលំទូលាយ និង ជាពហុវិស័យ ឆ្លើយតបនឹងការរាលដាលមេរោគ អេដស៍ និង ជំងឺអេដស៍ លើកទី៤ ឆ្នាំ ២០១៥-២០២០” ដោយ ឯកឧត្ដមវេជ្ជ. ទា ផលា អនុប្រធានអ.ជ.ប.ជ.អ
ការធ្វើបទបង្ហាញការពិភាក្សានិង អនុមត័លើ“បច្ចុប្បន្នភាពនៃការរៀបចំសំណើ គម្រោង មូលនិធិសកលConcept note for GFATM”ដោយឯកឧត្ដមវេជ្ជ. ទា ផលា អនុប្រធាន អ.ជ.ប.ជ.អ
ការធ្វើបទបង្ហាញស្ដីពី “របាយការណ៍នៃការឆ្លើយតបមេរោគអេដស៍និងជងឺអេដស៍ជាសកលGARRP”ដោយ ឯកឧត្ដមវេជ្ជ. ហោ ប៊ុនឡេង អគ្គលេខាធិការរងអ.ជ.ប.ជ.អ
ប្រសាសន៍បិទកិច្ចប្រជុំដោយឯ.ឧ.ទេសរដ្ឋមន្រ្តីប្រធានអ.ជ.ប.ជ.អ

នៅក្នុងសុន្ទរកថាបើកកិច្ចប្រជុំ ឯ.ឧ. ទេសរដ្ឋមន្រ្តីបានមានប្រសាសន៍សង្កត់ធ្ងន់លើគោល នយោបាយ ៧ចំណុចរបស់រាជរដ្ឋាភិបាលក្នុងការប្រយុទ្ធនឹងមេរោគអេដស៍ អំពីការឯកភាពជា គោលការណ៍ពីរាជរដ្ឋាភិបាលក្នុងការផ្ញើរបាយការណ៍ស្តីពី វឌ្ឍនភាពនៃការឆ្លើយតបនឹងមេរោគ អេដស៍ និង ជំងឺអេដស៍ជូនអង្គការសហប្រជាជាតិ និង ការដាក់បេក្ខភាពកម្ពុជាធ្វើជាម្ចាស់ផ្ទះក្នុង ការរៀបចំសមាជអន្តរជាតិស្តីពីជំងឺអេដស៍ នៅអាស៊ី និង ប៉ាស៊ីហ្វិក លើកទី១៣ (ICAAP13: 13th International Congress on AIDS in Asia and the Pacific)នៅរាជធានីភ្នំពេញ នៅឆ្នាំ២០១៧ ។ នៅក្នុងនោះ ឯ.ឧ.ប្រធានក៏បានជម្រាបជូនអង្គប្រជុំអំពី ការយល់ដឹងថ្មីៗដែលបានមកពីការចុះ ពិនិត្យការឆ្លើយតបនឹងជំងឺអេដស៍នៅមូលដ្ឋាន ក្នុងខេត្តតាកែវ និង ខេត្តព្រះសីហនុ ដើម្បីជាការ ត្រិះរិះពិចារណាក្នុងការប្រយុទ្ធនឹងជំងឺអេដស៍ឱ្យកាន់តែមានប្រសិទ្ធភាព ។ ដោយមានការអនុញ្ញាត ពីឯ.ឧ.ប្រធាន ឯ.ឧ. តែង គន្ធី ឯ.ឧ. ទា ផលា ឯ.ឧ. ហោ ប៊ុនឡេង និង បានឡើងអាន និង ធ្វើបទបង្ហាញលើរបៀបវារៈទី២, ៣, ៤ និង ៥ ។

ឯ.ឧ.ទេសរដ្ឋមន្រ្តីបានមានប្រសាសន៍បិទកិច្ចប្រជុំ ដោយថ្លែងកោតសរសើរចំពោះការខិតខំ ប្រឹងប្រែងរបស់ស្ថាប័នពាក់ព័ន្ធ គ្រប់ក្រសួង ថ្នាក់ជាតិ ថ្នាក់ក្រោមជាតិ ដៃគូអភិវឌ្ឍន៍ អង្គការក្រៅ រដ្ឋាភិបាល សង្គមស៊ីវិល រួមទាំងប្រជាជនដែលរងផលប៉ះពាល់ដោយជំងឺអេដស៍ដែលបានរួមដៃគ្នា ក្នុងការប្រយុទ្ធនឹងជំងឺអេដស៍រហូតបានជោគជ័យគួរឱ្យកត់សម្គាល់ នាំឱ្យអត្រាឆ្លងធ្លាក់ចុះក្រោម ១០០០ នាក់ក្នុងមួយឆ្នាំ និង ត្រឹមអត្រា ០,៤% នៅឆ្នាំ២០១៤ ។ ឯ.ឧ.ទេសរដ្ឋមន្រ្តីក៏បានលើកទឹក ចិត្តដល់អ្នកផ្តល់សេវាព្យាបាល សេវាថែទាំ សេវាសង្គមកិច្ច បន្តផ្តល់សេវាដល់អ្នកផ្ទុកមេរោគ អេដស៍ ឱ្យបានទៀងទាត់ និង ប្រកបដោយប្រសិទ្ធភាព ជំរុញការធ្វើតេស្តឈាម ដោយបូកផ្សំ ជាមួយការអប់រំអំពីសុវត្ថិភាពក្នុងការរួមភេទឱ្យរឹតតែទូលំទូលាយ បង្កើនការទប់ស្កាត់រលកទី២ នៃ ការឆ្លងមេរោគអេដស៍ ជាពិសេសលើយុវវ័យ កម្មការ កម្មការិនី ជនចំណាកស្រុក និង លើកទឹកចិត្ត ដល់គ្រប់ស្ថាប័នពាក់ព័ន្ធឱ្យយកចិត្តទុកដាក់សិក្សាស្វែងយល់ពីគម្លាតរវាងអ្នកដែលត្រូវទទួលសេវា ព្យាបាល និង អ្នកកំពុងទទួលការព្យាបាល ។

ឯ.ឧ.ទេសរដ្ឋមន្រ្តីក៏បានថ្លែងអំណរគុណចំពោះវត្តមាន សមាជិក សមាជិកាទាំងអស់ និង ប្រកាសបិទកិច្ចប្រជុំពេញអង្គនៅម៉ោង ១១៖៣០ ព្រឹក ព្រមទាំងបានអញ្ជើញអ្នកចូលរួមទាំងអស់ ពិសាអាហារសាមគ្គី ។ សម្រាប់ឯកសារនៃកិច្ចប្រជុំ (សន្ទរកថា បទបង្ហាញផ្សេងៗ...) សូមចុច ត្រង់នេះ...។

កម្រងរូបភាពនៃកិច្ចប្រជុំ៖

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច