National AIDS Authority

ចំនួនអ្នកទស្សនាគេហទំព័រ:

កិច្ចប្រជុំប្រចាំខែវិច្ឆិការបស់ថ្នាក់ដឹកនាំ អាជ្ញាធរជាតិប្រយុទ្ធនឹងជំងឺអេដស៍

អាជ្ញាធរជាតិប្រយុទ្ធនឹងជំងឺអេដស៍បានបើកកិច្ចប្រជុំថ្នាក់ដឹកនាំ ប្រចាំខែវិច្ឆិកា កាលពីព្រឹកថ្ងៃច័ន្ទ ទី១០ ខែវិច្ឆិកា ឆ្នាំ២០១៤ ។ កិច្ចប្រជុំនេះធ្វើឡើងក្រោមអធិបតីភាពរបស់ ឯកឧត្តម អៀង មូលី ទេសរដ្ឋមន្ត្រីទទួលបន្ទុកបេសកកម្មពិសេសនៃរាជរដ្ឋាភិបាលកម្ពុជា និងជាប្រធានអាជ្ញាធរជាតិប្រយុទ្ធនឹងជំងឺអេដស៍ នៅទីស្នាក់ការនៃអាជ្ញាធរជាតិប្រយុទ្ធនឹងជំងឺ អេដស៍ ក្នុងរាជធានីភ្នំពេញ ។ អញ្ជើញចូលរួមក្នុងកិច្ចប្រជុំនេះ រួមមានឯកឧត្តម លោកជំទាវអនុប្រធាន អគ្គលេខាធិការ អគ្គលេខាធិការរង ប្រធាន និងអនុប្រធាននាយកដ្ឋានទាំងអស់របស់អាជ្ញាធរជាតិប្រយុទ្ធនឹងជម្ងឺអេដស៍ ព្រមទាំងលោកជំទាវ អគ្គនាយកបច្ចេកទេសសុខាភិបាល តំណាងឯកឧត្តម ម៉ម ប៊ុនហេង អនុប្រធានទី១អាជ្ញាធរ ។

កិច្ចប្រជុំបានផ្តោតលើរបៀបវារៈសំខាន់ៗចំនួន៤ គឺ ៖

របាយការណ៍វឌ្ឍនភាពរបស់អគ្គលេខាធិការដ្ឋាន
របាយការណ៍ស្តីពីការត្រៀមរៀបចំបុណ្យ១ ធ្នូ ឆ្នាំ២០១៤
របាយការណ៍ស្តីពីការអនុវត្តកម្មវិធីមូលនិធិសកល
បញ្ហាផ្សេងៗ ។

ក្រោយពីស្តាប់របាយការណ៍អគ្គលេខាធិការដ្ឋានដែលថ្លែងដោយឯ.ឧ. វេជ្ជ. តែង គន្ធី រួចមក ឯ.ឧ. ទេសរដ្ឋមន្រ្តីបានអញ្ជើញឱ្យ ឯ.ឧ. ស៊ឹម គឹមសាន ធ្វើសេចក្តីរាយការណ៍ពីដំណើរការរៀបចំការប្រគំតន្រ្តីរបស់អាជ្ញាធរ នៅក្នុងព្រះរាជពិធីបុណ្យអុំទូក អកអំបុក បណ្តែត ប្រទីប និង សំពះព្រះខែដែលទើបកន្លងទៅថ្មីៗនេះ និង ការត្រៀមរៀបចំសម្រាប់កម្មវិធីទិវាអេដស៍នៅថ្ងៃទី១ធ្នូ ។ បន្ទាប់មក លោកវេជ្ជ. រស់ សីលវ៉ាត់និង ឯ.ឧ. វេជ្ជ. ទា ផលា បានរាយការណ៍ពីការងារចុះស្វែងយល់អំពីជំងឺអេដស៍មូលដ្ឋាន និង ការអនុវត្តកម្មវិធីមូលនិធិសកល ។ ឯ.ឧ. វេជ្ជ. ទា ផលា បានលើកឡើងថា ការកាត់បន្ថយថវិកា និង បញ្ហាមួយចំនួនដែលកើតឡើងដោយសារក្រឹតក្រម និង វិធានរបស់មូលនិធិសកល នាំឱ្យមានការប៉ះពាល់ដល់ការអនុវត្តគម្រោងកម្មវិធី ។

ឯ.ឧ. ទេសរដ្ឋមន្រ្តីបានលើកឡើងពីរលកទី២ នៃការរីករាលដាលជំងឺអេដស៍ និង ផ្តល់ជា អនុសាសន៍ឱ្យថ្នាក់ដឹកនាំអាជ្ញាធរធ្វើការសិក្សាស្រាវជ្រាវពី ទិន្នន័យខុសគ្នារវាងចំនួនអ្នក ជំងឺអេដស៍ និង អ្នកមកទទួលថ្នាំព្យាបាល ព្រមទាំងអំពីអ្នកជំងឺអេដស៍ដែលមិននៅក្នុង ប្រព័ន្ធ ។

លោកជំទាវ ឱ វណ្ណឌីន តំណាងឯកឧត្តមអនុប្រធានទី១អាជ្ញាធរបានថ្លែងគាំទ្រចំពោះការព្រួយបារម្ភអំពីរលកទី២ និង យុទ្ធសាស្រ្តអាជ្ញាធរដែលបានដាក់ចេញកន្លងមក ។

ឯកឧត្តមទេសរដ្ឋមន្ត្រី បានសម្តែងនូវការកោតសរសើរដល់កិច្ចខិតខំប្រឹងប្រែងបំពេញការងារកន្លងមកដូចជា ការរៀបចំកិច្ចប្រជុំពេញអង្គ និង សន្និបាតប្រចាំឆ្នាំ ព្រមទាំងកម្មវិធីប្រគំតន្រ្តីក្នុងព្រះរាជពិធីបុណ្យអុំទូក អកអំបុក បណ្តែតប្រទីប និង សំពះព្រះខែកន្លងមក ។ ឯ.ឧ ក៏បានលើកទឹកចិត្តដល់ថ្នាក់ដឹកនាំអាជ្ញាធរជាតិប្រយុទ្ធនឹងជំងឺអេដស៍ ឱ្យប្រកាន់នូវវិន័យការងារ ពង្រឹងសាមគ្គីភាព និង ឯកភាពផ្ទៃក្នុង បង្កើនប្រសិទ្ធភាពការងារ និង ជៀសវាង រាល់សកម្មភាពអវិជ្ជមានដែលនាំឱ្យស្ថាប័នធ្លាក់ឱនថយ ។

លើសពីនេះទៀត ឯកឧត្តមទេសរដ្ឋមន្ត្រី ប្រធានអាជ្ញាធរជាតិប្រយុទ្ធនឹងជំងឺអេដស៍ នៅបានផ្តល់អនុសាសន៍ឱ្យថ្នាក់ដឹកនាំ បង្កើនស្វែងយល់ពីស្ថានភាពជាក់ស្តែងនៃការប្រយុទ្ធនឹងជំងឺអេដស៍នៅតាមមូលដ្ឋាន ដោយ ស្វែងយល់ពីស្ថានភាពអ្នកជំងឺអេដស៍ ស្ថានភាពអ្នកជំងឺនៅក្រៅប្រព័ន្ធ ពិនិត្យការងារទាក់ទងនឹងយុវវ័យ កម្មករ កម្មការិនី និង ជនចំណាក ស្រុក ព្រមទាំងកំណត់ឱ្យបានស៊ីជម្រៅនូវគោលការណ៍ប្រតិបត្តិក្នុងគោលនយោបាយភូមិឃុំមានសុវត្ថិភាព ។

រូបភាពនៃកិច្ចប្រជុំ៖

ឯកសារសម្រាប់ទាញយក

ចំណងជើង	ទំហំ	ការទាញយកឯកសារ
របាយការណ៏ប្រជុំប្រចាំខែរបស់ថ្នាក់ដឹកនាំអាជ្ញាធរជាតិប្រយុទ្ធនឹងជំងឺអេដស៍ (ប្រចាំខែ វិច្ឆិកា ២០១៤)	0.25 MB

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច

កិច្ចប្រជុំប្រចាំខែវិច្ឆិការបស់ថ្នាក់ដឹកនាំ អាជ្ញាធរជាតិប្រយុទ្ធនឹងជំងឺអេដស៍