ឯកឧត្តម អៀង មូលី ទេសរដ្ឋមន្រ្តី ទទួលបេសកកម្មពិសេស និង ជាប្រធានអាជ្ញាធរជាតិ ប្រយុទ្ធនឹងជំងឺអេដស៍ អញ្ជើញដឹកនាំកិច្ចប្រជុំការងារបច្ចេកទេសចំរុះរវាងរាជរដ្ឋាភិបាល និងដៃគូអភិវឌ្ឍន៍លើការងារប្រយុទ្ធនឹងជំងឺអេដស៍
នៅរសៀលថ្ងៃទី០១ ខែមេសា ឆ្នាំ២០១៥នេះ នៅទីស្នាក់ការអាជ្ញាធរជាតិប្រយុទ្ធនឹង ជំងឺអេដស៍ ឯកឧត្តម អៀង មូលី ទេសរដ្ឋមន្រ្តី ទទួលបេសកកម្មពិសេស និង ជាប្រធាន អាជ្ញាធរជាតិប្រយុទ្ធនឹងជំងឺអេដស៍ បានអញ្ជើញដឹកនាំកិច្ចប្រជុំការងារបច្ចេកទេសចំរុះ រវាងរាជរដ្ឋាភិបាល និងដៃគូអភិវឌ្ឍន៍លើការងារប្រយុទ្ធនឹងជំងឺអេដស៍ ក្នុងឋានៈជាសហប្រធាននៃ ក្រុមការងារបច្ចេកទេសនេះ។
អញ្ជើញចូលរួមនៅក្នុងកិច្ចប្រជុំមាន លោកស្រី Christina Lau ប្រធានផ្នែកជំងឺឆ្លង នៃការិយាល័យសុខភាពសាធារណៈ និងអប់រំនៃទីភ្នាក់ងារអភិវឌ្ឍន៍អន្តរជាតិ នៃសហរដ្ឋ អាមេរិក (USAID) មកពីស្ថានទូតអាមេរិកប្រចាំកម្ពុជា និងជាសហប្រធាននៃក្រុមការងារ បច្ចេកទេសចំរុះរវាងរាជរដ្ឋាភិបាល និងដៃគូអភិវឌ្ឍន៍លើការងារប្រយុទ្ធនឹងជំងឺអេដស៍ (Government-Donor Join technical working group on HIV/AIDS : GDJ-TWG on HIV/AIDS) ឯកឧត្តម អនុប្រធាន និងថ្នាក់ ដឹកនាំអាជ្ញាធរជាតិ ឯកឧត្តម លោកជំទាវ រដ្ឋលេខាធិការ មន្ត្រីជាន់ខ្ពស់ លោក លោកស្រី តំណាងនៃក្រសួង ស្ថាប័ននៃ រាជរដ្ឋាភិបាល ដៃគូអភិវឌ្ឍន៍ និងអង្គការមិនមែនរដ្ឋាភិបាល ពាក់ព័ន្ធនានាក្នុងនោះមាន ប្រធានអង្គការ UNAIDS ប្រចាំនៅកម្ពុជា ដែលជាដៃគូសហការ ក្នុងការប្រយុទ្ធនឹងការឆ្លង រាលដាលនៃមេរោគអេដស៍នៅកម្ពុជា។
របៀបវរៈនៃកិច្ចប្រជុំមាន៖
- បច្ចុប្បន្នភាពនៃលទ្ធផលការងារបន្ទាប់ពីកិច្ចប្រជុំកាលពីថ្ងៃទី ២២ខែមករាឆ្នាំ ២០១៥ និងបន្តពិនិត្យមើលការអនុវត្តផែនការការងាររបស់ក្រុមការងារបច្ចេកទេសចំរុះ។
- ការកែសំរួលសមាជិកភាព តួនាទីភារកិច្ចរបស់ក្រុមការងារ បច្ចេកទេសចំរុះ
- ការពិនិត្យវឌ្ឍនភាព និងពិភាក្សា អំពីសូចនាករតាមដានវាយតំលៃរួមគ្នា (Join monitoring indicators)
- ពិនិត្យពិភាក្សាអំពីតំរូវការនិងការសំរបសំរួលយ៉ាងដូចម្តេចដើម្បីអនុវត្តផែនការយុទ្ធសាស្រ្តទី៤ សំរាប់រយៈពេល៥ឆ្នាំខាងមុខ (ក្រុមការងារបច្ចេកទេសចំរុះ និង អនុក្រុម ការងារបច្ចេកទេសចំរុះ ជំរើសចំនួន៤ដែលត្រូវបានផ្តល់អនុសាសន៍ដោយលោក Mike Custance។
បន្ទាប់ពីបានផ្លាស់ប្តូរមតិគ្នាយ៉ាងយូរ អង្គប្រជុំបានសម្រេចរៀបចំឯកសារសម្រាប់ ក្រុមប្រឹក្សាអភិវឌ្ឍន៏កម្ពុជា នៅមុនថ្ងៃទី ១០ មេសា ខាងមុខ។ អង្គប្រជុំនឹងពិនិត្យលំអិតអំពី អនុគណកម្មាធិការបច្ចេកទេស នៅពេលទទួលបានយុទ្ធសាស្ត្រជាតិប្រឆាំងនឹងជំងឺអេដស៍ លើកទី៤ ដែលនឹងត្រូវបញ្ចប់នៅខែឧសភានេះ។ អង្គប្រជុំសម្រេចថា និងជួបគ្នាជាថ្មីនៅខែ មិថុនា ២០១៥។ អង្គប្រជុំបានបញ្ចប់ក្រោមបរិយាកាសរីករាយ និងសហប្រតិបត្តិការល្អរវាង រាជរដ្ឋាភិបាល និងដៃគូអភិវឌ្ឍន៍ក្នុងការប្រយុទ្ធប្រឆាំងនិងជំងឺអេដស៍។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
