ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ ដឹកនាំគណៈប្រតិភូចុះពិនិត្យស្ថានភាពនៃការឆ្លើយតបនឹងមេរោគអេដស៍ និងជំងឺអេដស៍នៅខេត្តក្រចេះ និង ខេត្តមណ្ឌលគីរី
ដើម្បីលើកកំពស់ និង ពង្រឹងការប្រយុទ្ធប្រឆាំង ទប់ស្កាត់ការឆ្លងមេរោគអេដស៍ ថែមទៀត និងក្នុងគោលបំណងស្វែងយល់ដល់ទីកន្លែង អំពីស្ថានភាពបច្ចុប្បន្ននៃការរាលដាលមេរោគអេដស៍ ការឆ្លើយតបនៅថ្នាក់ក្រោមជាតិ និង ចំណុចប្រឈមនានាព្រមទាំងការបញ្រ្ជាបនូវការឆ្លើយតបនឹងមេរោគអេដស៍ ក្នុងផែនការអភិវឌ្ឍថ្នាក់ជាតិ និង ថ្នាក់ក្រោមជាតិ កាលពីថ្ងៃទី១០-១១ខែឧសភា ឆ្នាំ២០១៥ ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ បានដឹកនាំគណៈប្រតិភូចុះពិនិត្យស្ថានភាពនៃការឆ្លើយតបនឹងមេរោគអេដស៍ និង ជំងឺអេដស៍នៅខេត្តក្រចេះ និង មណ្ឌលគីរីដែលអមដំណើរដោយថ្នាក់ដឹកនាំ និងមន្រ្តីអាជ្ញាធរមួយចំនួន ។
នៅវេលាម៉ោង ១០ព្រឹករសៀល ថ្ងៃទី១០ ឧសភា គណៈប្រតិភូបានជួបសំណេះសំណាលជាមួយអ្នកជំងឺអេដស៍ ដែលកំពុងសំរាកព្យាបាល និងបានធ្វើទស្សនៈកិច្ច ស្វែងយល់អំពីការផ្តល់សេវាសុខភាពដល់ទីកន្លែងពិនិត្យមើលសេវាព្យាបាលនៅមន្ទីរពេទ្យបង្អែកស្រុកស្នួលខេត្តក្រចេះ ដោយមានការចូលរួមពីអាជ្ញាធរមូលដ្ឋាន មន្រ្តីថ្នាក់ដឹកនាំមន្ទីរពេទ្យបង្អែក វេជ្ជបណ្ឌិត និង មន្ត្រីសុខាភិបាល និង បុគ្គលិកអង្គការដែលធ្វើការផ្ទាល់ជាមួយអ្នកជំងឺអេដស៍ ។ បន្ទាប់ពីការសាកសួរស្វែងយល់អំពីស្ថានភាពរស់នៅការទទួលយកសេវាព្យាបាល ការជួយជ្រោមជ្រែងពីសំណាក់ អាជ្ញាធរមូលដ្ឋាន និង អង្គការដែលធ្វើការងារផ្ទាល់ជាមួយអ្នកជំងឺអេដស៍ យើងអាចទទួលបាន នូវព័ត៌មានពិស្តា អំពីស្ថានភាព នៃការឆ្លងរាលដាល ការផ្តល់សេវាពិនិត្យឈាមរក មេរោគអេដស៍ស្ម័គ្រចិត្ត ការផ្តល់សេវាព្យាបាល ថែទាំ និងការគាំទ្រផ្លូវចិត្ត និងសង្គម ដល់ក្រុមបងប្អូនប្រជាពលរដ្ឋ ដែលបានរងគ្រោះ ឆ្លងមេរោគអេដស៍ និងទទួលការប៉ះ ពាល់ដោយសារមេរោគអេដស៍ ។
បន្ទាប់មក ឯ.ឧ. ទេសរដ្ឋមន្រ្តី ប្រធានអាជ្ញាធរជាតិប្រយុទ្ធនឹងជំងឺអេដស៍ និង គណៈ ប្រតិភូអមដំណើរបានចុះពិនិត្យ និង សាកសួរសុខទុក្ខអ្នកជំងឺអេដស៍ដែលកំពុងសម្រាក ព្យាបាល នៅមន្ទីរពេទ្យបង្អែកខេត្ត ដោយនាំយកនូវថវិកាមួយចំនួនទៅចែកជូនដើម្បី សម្រាលនូវការលំបាករបស់ពួកគាត់ ។
នារសៀលថ្ងៃទី១០ ឧសភា គណៈប្រតិភូនៃអាជ្ញាធរជាតិប្រយុទ្ធនឹងជំងឺអេដស៍ បានអញ្ជើញទៅពិនិត្យ ទីតាំងផ្តល់សេវាកំសាន្តសប្បាយ នៅស្រុកកែវសីមា និងជួប ស្វែងយល់អំពីដំណើការងារផ្តល់សេវាសុខភាព របស់មណ្ឌលសុខភាពអូអាម ខេត្តមណ្ឌលគីរី ដោយមានការចូលរួម និងមានកិច្ចសហការល្អពីសំណាក់មន្រ្តីអាជ្ញាធរមូលដ្ឋាន មន្រ្តីសុខាភិបាលនៃមណ្ឌលសុខភាព និង ម្ចាស់ទីតាំងផ្តល់សេវាកម្សាន្ត និងមន្រ្តីអង្គការក្រៅរដ្ឋាភិបាល។
ចំណែកនៅព្រឹកថ្ងៃទី១១ ខែឧសភា ឯកឧត្តមទេសរដ្ឋមន្រ្តី និងថ្នាក់ដឹកនាំបាន អញ្ជើញទៅពិនិត្យដោយផ្ទាល់ និង ស្វែងយល់អំពីការជ្រួតជ្រាបព័ត៌មានអប់រំស្តីពីការឆ្លងមេរោគអេដស៍ និងការបង្ការ ដែលបងប្អូនជនជាតិភាគតិចបានដឹង និងទទួលការអប់រំសុខភាពនានា អំពីជំងឺអេដស៍ និងការថែទាំសុខភាពបន្តពូជ។
នាព្រឹកថ្ងៃដដែល ឯ.ឧ. ទេសរដ្ឋមន្រ្តី និងគណៈប្រតិភូបានអញ្ជើញទៅពិនិត្យទីតាំងផ្តល់សេវាកំសាន្តសប្បាយមួយចំនួនទៀត ដែលស្ថិតនៅក្នុងក្រុងសែនមនោរម្យ ខេត្តមណ្ឌលគីរី និងពិនិត្យមើលយុទ្ធនាការ បង្ការការឆ្លងមេរោគអេដស៍បន្ថែមទៀត។
ក្នុងវេលារសៀលថ្ងៃទី១១ ខែ ឧសភា ឯកឧត្តម ទេសរដ្ឋមន្រ្តី និងគណៈប្រតិភូបានដឹកនាំការប្រជុំគណៈកម្មាធិការប្រយុទ្ធ នឹងអេដស៍ខេត្តមណ្ដលគិរី ដោយមានការចូលរួមពីថ្នាក់ដឹកនាំ និងមន្រ្តីអាជ្ញាធរ លោកស្រីអភិបាលរងខេត្តមណ្ឌលគីរី ដែលជាប្រធានគណៈកម្មាធិការប្រយុទ្ធនឹងជំងឺអេដស៍ខេត្ត ថ្នាក់ដឹកនាំមន្ទីរសុខាភិបាលខេត្ត និង អង្គការក្រៅរដ្ឋាភិបាលនានា ដែលធ្វើការជាមួយអ្នក ជំងឺអេដស៍ និង ប្រជាជនដែលរងការប៉ះពាល់នៅក្នុងខេត្តមណ្ឌលគីរី ។
បន្ទាប់ពីស្តាប់មតិស្វាគមន៍ និង ស្តាប់បទបង្ហាញពីស្ថានភាពនៃការឆ្លើយតបនឹងអេដស៍ក្នុងខេត្តពីសំណាក់តំណាងលេខាធិការដ្ឋានអេដស៍ខេត្ត តំណាងអង្គការក្រៅរដ្ឋាភិបាលដែល ធ្វើការជាមួយអ្នកជំងឺអេដស៍រួចមក ឯកឧត្តមទេសរដ្ឋមន្រ្តី បានគូសបញ្ជាក់ពីជោគជ័យក្នុងការ ប្រយុទ្ធនឹងជំងឺអេដស៍ដែលកម្ពុជាបានធ្វើឱ្យសម្រេចកន្លងមករហូតដល់មានការទទួលស្គាល់ និងកោតសរសើរជាអន្តរជាតិ។ ដោយឡែក ឯ.ឧ.ទេសរដ្ឋមន្រ្តី ក៏បានសម្តែងនូវការកោតសរសើរចំពោះអាជ្ញាធរខេត្ត មន្រ្តីសុខាភិបាល និងអង្គការនានាក្នុងខេត្តមណ្ឌលគីរី ជាខេត្តដាច់ស្រយាល មានការរីកចំរើនខ្លាំង និង ឆាប់រហ័ស មានលំហូរចូលក្រុមកម្មករដែលបំពេញការងារ ក្នុងវិស័យសាងសង់ កសិដ្ឋាន កសិកម្ម ឧស្សាហកម្មផ្សេងៗ រុករករ៉ែ និងការរីកដុះដាលនៃទីតាំងផ្តល់ សេវាកំសាន្តសប្បាយ ដែលប្រឈមមុខខ្លាំងនឹងការរីករាលដាលមេរោគអេដស៍/ជំងឺអេដស៍ និងការរៀបចំគំនិតផ្តួចផ្តើម កិច្ចខិតខំប្រឹងប្រែង បង្ការទប់ស្កាត់ការហូរចូលនៃ មេរោគអេដស៍មកក្នុងខេត្តអោយបានជាអតិបរមា និងបានទទួលជោគជ័យ និង រួមចំណែកកាត់បន្ថយអត្រាឆ្លងថ្មីគួរឱ្យកត់សម្គាល់ ។
ដោយមានការព្រួយបារម្ភចំពោះរលកទី២ នៃការរីករាលដាលមេរោគអេដស៍/ជំងឺអេដស៍ តាមរយៈការធ្វេសប្រហែសជាមួយនឹងជោគជ័យ និង ការខ្វះព័ត៌មានក្នុងការបង្ការការចម្លងរោគក្នុងចំណោមយុវវ័យ ឯ.ឧ. ទេសរដ្ឋមន្រ្តីបានផ្តល់ជាអនុសាសន៍ឱ្យ គណៈកម្មាការប្រយុទ្ធនឹងជំងឺអេដស៍ខេត្ត ដែលរួមមានអាជ្ញាធរគ្រប់លំដាប់ថ្នាក់ មន្ទីរសុខា ភិបាល និង អង្គការក្រៅរដ្ឋាភិបាលនានា បន្តសកម្មភាពឱ្យកាន់តែសកម្ម ដូចជាការអប់រំសុខភាព និង ពន្យល់ណែនាំក្នុងការទប់ស្កាត់ការរីករាលដាលមេរោគអេដស៍ ដូចជាការលើកទឹកចិត្ត ឱ្យមានការប្រើប្រាស់ស្រោមអនាម័យឱ្យបានទូលំទូលាយ ១០០%។ អង្គប្រជុំបានបញ្ចប់នៅវេលាម៉ោង ៤៖៣០ល្ងាច។
គណៈប្រតិភូបានបញ្ចប់បេសកកម្ម ដោយទទួលបាននូវលទ្ធផលជាវិជ្ជមាននៅក្នុងការស្វែងយល់អំពីស្ថានភាពបច្ចុប្បន្ននៃការរាលដាលមេរោគអេដស៍ ដែលជាព័ត៌មានជាក់ស្តែងក្នុងរៀបចំផែនការឆ្លើយតបនឹងមេរោគអេដស៍/ជំងឺអេដស៍ នៅថ្នាក់ជាតិ និង ថា្នក់ក្រោមជាតិ ដើម្បីឈានទៅសម្រេចតាមយុទ្ធសាស្រ្ត៧ចំណុចរបស់រាជរដ្ឋាភិបាល និង គោលដៅ ៣.០ នៃការប្រយុទ្ធនឹងជំងឺអេដស៍គឺ គ្មានការឆ្លងថ្មី គ្មានការរើសអើង និង គ្មានការស្លាប់ដោយសារជំងឺអេដស៍ ។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
