ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និងជាប្រធានគណៈកម្មាធិការសម្របសម្រួលមូលនិធិសកលនៅកម្ពុជា បានជួបពិភាក្សាការងារជាមួយគណៈប្រតិភូរបស់មូលនិធិសកល
នាព្រឹកថ្ងៃទី០៣ ខែមិថុនា ឆ្នាំ២០១៥ នៅទីស្នាក់ការកណ្តាលអាជ្ញាធរជាតិប្រយុទ្ធនឹងជំងឺអេដស៍ ឯកឧត្តមទេសរដ្ឋមន្ត្រី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និងជាប្រធានគណៈកម្មាធិការសម្របសម្រួលមូលនិធិសកលប្រទេសកម្ពុជា បានអញ្ជើញជួបពិភាក្សាការងារជាមួយគណៈប្រតិភូជាន់ខ្ពស់របស់មូលនិធិសកលមកពីទីស្នាក់ការកណ្តាលក្រុងហ្សឺណែវប្រទេសស្វីស ដែលដឹកនាំដោយលោក Luca Occhini ប្រធានគ្រប់គ្រងជាន់ខ្ពស់មូលនិធិសកលសំរាប់តំបន់អាស៊ីអាគ្នេយ៍ និងលោកស្រី Nicole Delaney។
ឯកឧត្តមទេសរដ្ឋមន្រ្តី និងគណៈប្រតិភូ បានពិភាក្សាការងារគ្រប់គ្រងសម្របសម្រួលមូលនិធិនៃគំរោងកម្មវិធីមូលនិធិសកលរបស់កម្ពុជា និង ជាពិសេសផ្តោតលើកិច្ចការសំខាន់ៗមួយចំនួនរួមមាន៖
- និរន្តរភាពរយៈពេលវែងនៃការផ្តល់ហិរញ្ញប្បទានរបស់មូលនិធិសកលសំរាប់ធនធានមនុស្ស
- និរន្តរភាពរយៈពេលវែងនៃការផ្តល់ហិរញ្ញប្បទានរបស់មូលនិធិសកល និង ការពង្រឹងប្រព័ន្ធគ្រប់គ្រងសំភារៈ មធ្យោបាយនៃគំរោងកម្មវិធីផ្តល់ ហិរញ្ញប្បទានដោយមូលនិធិសកល
- និងបញ្ហាសេសសល់មួយចំនួនដែលកំពុងស្ថិតនៅក្រោមចំណាត់ការ របស់រាជរដ្ឋាភិបាល ។
ជាកិច្ចឆ្លើយតបទៅនឹងបញ្ហាដែលគណៈប្រតិភូមូលនិធិសកលបានលើកឡើងក្នុងរបៀបវរៈនៃកិច្ចពិភាក្សា ឯកឧត្តមទេសរដ្ឋមន្រ្តី បានមានប្រសាសថា ក្នុងនាមឯកឧត្តមជាអ្នកទទួលខុសត្រូវក្នុងជួររាជរដ្ឋាភិបាល ឯកឧត្តមសូមទទួលយក គាំទ្រ និងចូលរួមសហការអនុវត្តលើចំណុចឯកភាពគ្នារវាងរបស់មូលនិធិសកលនិងរាជរដ្ឋាភិបាលកម្ពុជា ដើម្បីធានានិរន្តរភាពនៃការអនុវត្តគំរោងកម្មវិធី ប្រយុទ្ធប្រឆាំងនឹងជំងឺអេដស៍ របេង និង គ្រុនចាញ់ ព្រោះទាំងនេះ ជាទិសដៅអាទិភាពដែលរាជរដ្ឋាភិបាលកម្ពុជា អាជ្ញាធរជាតិប្រយុទ្ធនឹងជំងឺអេដស៍ ក្រសួងសុខាភិបាល និងស្ថាប័នពាក់ព័ន្ធ បានដាក់ចេញនូវគោលនយោបាយកាត់បន្ថយអាត្រាឈឺ អាត្រាស្លាប់ ភាពក្រីក្រដោយសារជំងឺទាំងនេះ និងលើកកំពស់សុខមាលភាពប្រជាជនកម្ពុជា ជីវភាពរស់នៅរបស់ពួកគាត់អោយបានកាន់តែប្រសើរឡើងជាលំដាប់។ ជាឧទាហរណ៍ជាក់ស្តែង រាជរដ្ឋាភិបាលកម្ពុជាបានកំណត់ថវិកាជាតិប្រមាណ ១លានដុល្លាសហរដ្ឋអាមេរិក សំរាប់២០១៥ ចំណែក២០១៦ ទឹកប្រាក់ ១.២លាន និង ២០១៧ ថវិកា ១.៥ លាន ចូលរួមចំណែកបន្ថែមទៀតលើខ្ទង់ចំណាយប្រចាំឆ្នាំលើវិស័យសុខាភិបាលសំរាប់ទិញឱសថប្រឆាំងមេរោគអេដស៍ ជួយផ្គត់ផ្គង់ដល់កម្មវិធីជាតិក្រសួងសុខាភិបាល ដើម្បីព្យាបាលអ្នកជំងឺអេដស៍។
ឯកឧត្តមទេសរដ្ឋមន្ត្រី ក្នុងនាមរាជរដ្ឋាភិបាលកម្ពុជា បានថ្លែងអំណរគុណចំពោះមូលនិធិសកល ដែលបានផ្តល់ថវិកាជួយប្រទេសកម្ពុជាក្នុងការប្រយុទ្ធនឹងជំងឺទាំងបី គឺ របេង គ្រុនចាញ់ និងជំងឺអេដស៍ ព្រមទាំងជួយពង្រឹងប្រព័ន្ធសុខាភិបាលនៅកម្ពុជា។ ដោយបានទទួលសិទ្ធប្រទានពីសម្តេចតេជោនាយករដ្ឋមន្រ្តី អោយចុះហត្ថលេខាជាមួយមូលនិធិសកលលើកិច្ចព្រមព្រៀងក្របខ័ណ្ឌ (Framework agreement) ឯកឧត្តមទេសរដ្ឋមន្រ្តីនឹងជួយអោយការអនុវត្តគំរោងហិរញ្ញប្បទានរបស់មូលនិធិសកល ដែលមានស្ថាប័នរដ្ឋជាអ្នកទទួល ផ្ទាល់អោយគោរពអោយបានហ្មត់ចត់ នូវលិខិតបទដ្ឋាន ស្តីពីហិរញ្ញប្បទានរបស់មូលនិធិសកល។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
