ឯ.ឧ. ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ អញ្ជើញជាអធិបតីក្នុងវេទិកាសាធារណៈ នៅឃុំចចិប និងឃុំទួលសាលា ស្រុកបរសេដ្ឋ ខេត្តកំពង់ស្ពឺ
នាព្រឹកថ្ងៃទី៤ ខែមិថុនា ឆ្នាំ២០១៥ ឯ.ឧ. ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និង ជាអនុប្រធានក្រុមការងារថ្នាក់ជាតិចុះជួយខេត្តកំពង់ស្ពឺ បានអញ្ជើញជាអធិបតីក្នុងវេទិកាសាធារណៈនៅឃុំស្វាយចចិប និង ឃុំទួលសាលា ស្រុកបរសេដ្ឋ ខេត្តកំពង់ស្ពឺ ដោយមានការចូលរួមពីថ្នាក់ដឹកនាំអាជ្ញាធរជាតិប្រយុទ្ធនឹងជំងឺអេដស៍ អនុរដ្ឋ- លេខាធិការក្រសួងធនធានទឹក មន្ទីរពាក់ព័ន្ធក្នុងខេត្ត អាជ្ញាធរមូលដ្ឋាន កម្លាំងប្រដាប់អាវុធ និង ប្រជាពលរដ្ឋប្រមាណ ២៧៦ នាក់ ។
បន្ទាប់ពីសម្តែងនូវការស្វាគមន៍ និង ថ្លែងអំណរគុណចំពោះ អាជ្ញាធរមូលដ្ឋានគ្រប់ លំដាប់ថ្នាក់ កងកម្លាំងប្រដាប់អាវុធ និង ប្រជាពលរដ្ឋរួចមក ឯ.ឧ.ទេសរដ្ឋមន្រ្តី បានគូសបញ្ជាក់ពីសារៈសំខាន់នៃវេទិកាសាធារណៈដែលកំពុងធ្វើនាពេលនេះ ដែលជានយោបាយ ថ្នាក់ជាតិរបស់រាជរដ្ឋាភិបាលសម្រាប់នីតិកាលទី៥នៃរដ្ឋសភា ក្នុងការចូលរួមដោះស្រាយ បញ្ហានានារបស់ប្រជាជនដល់មូលដ្ឋាន ។ បន្ទាប់មកឯ.ឧ. ទេសរដ្ឋមន្រ្តីបានជូនវេទិកាទៅ ប្រជាពលរដ្ឋក្នុងការលើកឡើងពីបញ្ហានានាដែលជួបប្រទះ និង សំណូមពរនានាបើមាន ។
ប្រជាពលរដ្ឋទាំងពីរឃុំ គឺឃុំស្វាយចចិបនិងឃុំទួលសាលាបានលើកសំណួរមួយចំនួនពាក់ព័ន្ធនិងជីវភាពរស់នៅរបស់ គាត់ដើម្បីសុំអោយឯកឧត្តមទេសរដ្ឋមន្ត្រីជួយដោះស្រាយមានជាអាទិ៍៖
1. កង្វះទឹកស្អាត
2. កង្វះប្រព័ន្ធស្រោចស្រព្វ
3. បញ្ហាប័ណ្ណគ្រួសារ
4. សំណើរសុំអោយមានភ្លើងអគ្គីសនី
5. បញ្ហាអត្តសញ្ញាណប័ណ្ណ
6. សុវត្ថិភាពចរាចរណ៍
ក្រោយពីស្តាប់សំណួរទាំងនោះមក ឯកឧត្តមទេសរដ្ឋមន្ត្រីបានជូនវេទិកាទៅលោកប្រធានមន្ទីរពាក់ព័ន្ធដូចជា៖ មន្ទីរធនធានទឹក រ៉ែនិងថាមពល អភិបាលស្រុក អធិការនគរបាលស្រុកនិងមេឃុំឆ្លើយបំភ្លឺ និងបកស្រាយអំពីការងារដែលកំពុងអនុវត្ត ក៏ដូចជាគំរោងកម្មវិធីសម្រាប់ឆ្នាំបន្តបន្ទាប់។
ឯ.ឧ. ទេសរដ្ឋមន្ត្រី បានណែនាំអោយអាជ្ញាធរដែនដីនិងមន្ត្រីមានសមត្ថកិច្ចគ្រប់លំដាប់ថ្នាក់ អោយខិតខំយកចិត្តទុកដាក់ បំពេញភារកិច្ចបំរើប្រជាពលរដ្ឋអោយមានប្រសិទ្ធភាពខ្ពស់ និងផ្តល់ជូនសេវាសាធារណៈក្នុងថានៈជាអ្នកបម្រើប្រជាពលរដ្ឋ។
ឯ.ឧ. ទេសរដ្ឋមន្រ្តី ក្នុងឋានៈជាប្រធានអាជ្ញាធរជាតិប្រយុទ្ធនឹងជំងឺ អេដស៍បានផ្តាំផ្ញើឱ្យប្រជាជនទាំងអស់យកចិត្តទុកដាក់ក្នុងការការពារខ្លួនពីជំងឺអេដស៍ និង បាននាំយកនូវអំណោយមួយចំនួនចែកជូនប្រជាជន ហើយបានសន្យាថានឹងខិតខំដោះស្រាយនូវបញ្ហា និងសំណូមពរនានាដែលប្រជាជននៅមូលដ្ឋានស្រុកបរសេដ្ឋបានលើកឡើងខាងលើ ។
អង្គវេទិកាបានបញ្ចប់ទៅដោយបរិយាកាសស្និទ្ធស្នាល និង រីករាយក្រៃលែង ។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
