National AIDS Authority

ចំនួនអ្នកទស្សនាគេហទំព័រ:

ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និងជាប្រធានគណៈកម្មាធិការសម្របសម្រួលមូលនិធិសាកលប្រចាំកម្ពុជា អញ្ជើញចូលរួមក្នុងអង្គសិក្ខាសាលានៃគណៈកម្មាធិការសម្របសម្រួលមូលនិធិសាកលប្រចាំកម្ពុជា

កាលពីថ្ងៃទី២៥ដល់ថ្ងៃទី២៦ខែឧសភាឆ្នាំ២០១៥កន្លងទៅនេះនៅសណ្ឋាគារកំពតឌីយាម៉ង់ ក្រុងកំពត ខេត្តកំពត ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និងជាប្រធានគណៈកម្មាធិការសម្របសម្រួលមូលនិធិសាកលប្រចាំកម្ពុជា (CCC) បានអញ្ជើញចូលរួមក្នុងអង្គសិក្ខាសាលារបស់គណៈកម្មាធិការសម្របសម្រួលមូលនិធិសាកលប្រចាំកម្ពុជា។

អញ្ជើញជាគណៈអធិបតីក្នុងឱកាសបើកអង្គសិក្ខសាលានោះមាន ឯកឧត្តម សូត្រ យា អភិបាលរងខេត្តកំពត និងជាប្រធានគណៈកម្មកាធិការអេដស៍ខេត្តកំពត លោកវេជ្ជបណ្ឌិត Dong Il Anh ប្រធានអង្គការសុខភាពពិភពលោកប្រចាំប្រទេសកម្ពុជា (WHO) និងជាអនុប្រធាន CCC លោក Daniel Dimick នាយកប្រតិបត្តិអង្គការ Health Poverty Action ជាអនុប្រធាន CCC និងការចូលរួមរបស់ ឯកឧត្តម លោកជំទាវ លោក លោកស្រី អ្នកនាងកញ្ញា ថ្នាក់ដឹកនាំ តំណាងស្ថាប័ន ក្រសួងនៃរាជរដ្ឋាភិបាលកម្ពុជា តំណាងដៃគូអភិវឌ្ឍនិងសង្គមស៊ីវិល និងជាពិសេស លោក លោកស្រី អ្នកនាងកញ្ញាជាតំណាងអ្នកផ្ទុកមេរោគអេដស៏ និងតំណាងប្រជាជនប្រឈមមុខខ្ពស់។

គោលបំណងចំបងនៃអង្គសិក្ខាសាលាគឺ ពិនិត្យឡើងវិញនូវជោគជ័យនិងលទ្ធផលសំរេចបាន កំណត់កត្តាដែលជំរុញអោយទទួលបានជោគជ័យដែលត្រូវប្រកាន់យកជាគោលសំរាប់ការអនុវត្តល្អៗ និង ស្វែងយល់អំពីបញ្ហាប្រឈមឧបសគ្គដែលបានជួបប្រទះ និងឫសគល់របស់បញ្ហាទាំងនោះ ដើម្បីរកដំណោះស្រាយនាពេលអនាគតសំរាប់បញ្ហាប្រឈមជាគន្លឹះនានា។ អង្គសិក្ខាសាលាបានពិនិត្យ និងពិគ្រោះពិភាក្សាលើ៖

លក្ខខណ្ឌសមស្របនិងបទដ្ឋានអប្បបរមា (Eligibility and Minimum Standard requirements) ក្នុងការលើកគំរោងកម្មវិធីស្នើសុំថវិកាជំនួយតាមទំរង់ផ្តល់ហិរញ្ញប្បទានមូលនិធិសកលថ្មី (New Funding Model)។
ការពិនិត្យមើលឡើងវិញនូវឯកសារអភិបាលកិច្ច និង គោលការណ៍ណែនាំក្នុងការទំនាក់ទំនងនិងផ្សព្វផ្សាយព័ត៌មាន (governance documents and Communication Plan)
ពិនិត្យមើលដំណើរការនៃការបោះឆ្នោតជ្រើសរើសតំណាងគណកម្មាធិការសម្របសម្រួលមូលនិធិសកល។

ក្នុងឱកាសបើកអង្គសិក្ខាសាលានោះឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និងជាប្រធានគណៈកម្មាធិការសម្របសម្រួលមូលនិធិសាកលប្រចាំកម្ពុជាក៏បានរំលឹកអង្គសិក្ខាសាលាថា តួនាទីរបស់គណៈកម្មាធិការសម្របសម្រួលមូលនិធិសកលគឺ (១) ធ្វើចលនាធនធាន (២)សំរបសំរួលគ្រប់គ្រងមូលនិធិជំនួយតាមគោលការណ៍មូលនិធិសកល (៣)ធានាប្រសិទ្ធភាពជំនួយ និង(៤)ធានាអោយមានភាពជឿជាក់ថា ថវិកាពិតជាយកទៅប្រើប្រាស់សមស្រប។ ដើម្បីបំពេញភារកិច្ចទាំងនេះ ក្នុងរយៈពេល១៨ខែកន្លងទៅនេះ យើងបានប្រជុំគណកម្មាធិការសម្របសម្រួលមូលនិធិសកល៦លើក (CCC meetings) ប្រជុំគណកម្មាការប្រតិបត្តិ (CCC Executive Committee) ១៧ លើកហើយគណកម្មាការប្រតិបត្តិបានសំរបសំរួលការចុះបេសកកម្មក្រុមការងារមូលនិធិសកល (GF HQ mission) ៨លើក។ ក្រុមការងារត្រួតពិនិត្យ (Oversight Committee) ប្រជុំ៨លើក ក្រុមកាងារនេះបានចុះស្វែងយល់ពីមូលដ្ឋាន៤លើក។ ក្រៅពីនោះនៅមានសិក្ខាសាលាសំរាប់ប្រជាជនគន្លឺះផងដែរ។ ជារួមកិច្ចប្រជុំទាំងនេះនិងកិច្ចប្រជុំគណកម្មការដឹកនាំទាំង ៤៤ខាងលើកិច្ចប្រជុំទាំងអស់មានប្រមាណ១០០លើក។ ជារួមប្រជុំ១លើកក្នុង១អាទិត្យ ក្នុងមួយឆ្នាំកន្លះកន្លងទៅ។

ឯកឧត្តមទេសរដ្ឋមន្រ្តី ក៏បានក្រើនរំលឹកអង្គសិក្ខាសាលាដែរថា ជំនួយមូលនិធិសកលកាន់តែថយចុះជាលំដាប់ ដូចនេះយើងត្រូវពង្រឹងភាពជាម្ចាស់ដោយសង្កត់ធ្ងន់លើការងារបច្ចេកទេសគឺប្រសិទ្ធភាព និងប្រសិទ្ធផល និងជាពិសេសការងារគណនេយ្យភាពគឺការធានាអោយមានភាពជឿជាក់ថាថវិកាពិតជាយកទៅប្រើប្រាស់សមស្រប (Fiscal credibility)។ ជាមួយកិច្ចពិភាក្សាចម្រុះថ្នាក់ជាតិ (Country Dialogue) និងវេទិកានានា យើងទាំងអស់គ្នានឹងអាចស្តាប់ស្វែងយល់តាមរយៈការសំដែងឡើងរបស់អ្នកជំងឺនិងប្រជាជនប្រឈមមុខខ្ពស់ជាគន្លឺះសំរាប់ជោគជ័យបច្ចេកទេសនិងការធានាបាននូវគណនេយ្យភាពសង្គម។ ដូចនេះអង្គសិក្ខាសាលានេះ ជាវេទិកា និង ជាឱកាស ដែលយើងត្រូវនិយាយចេញ និង ត្រូវស្តាប់អោយយល់ទើបយើងអាចដោះស្រាយបញ្ហាបានមិនមែនស្តាប់សំរាប់ដោះសារនោះឡើយ។

បន្ទាប់ពីបានដំណើរការតាមរបៀបវរៈលំអិតដែលបានកំណត់សំរាប់រយៈពេល២ថ្ងៃរួចមក ឯកឧត្តមទេសរដ្ឋមន្រ្តី ប្រធានគណៈកម្មាធិការសម្របសម្រួលមូលនិធិសកលប្រចាំកម្ពុជា ក៏បានថ្លែងបិទអង្គសិក្ខាសាលា ជាមួយមោទនភាព ដែលអង្គសិក្ខាសាលាបានសំរេចជោគជ័យស្របតាមគោលដៅ វត្ថុបំណងដែលបានគ្រោងទុក និងបានផ្តល់ឱវាទអោយលេខាធិការដ្ឋាននៃ គណៈកម្មាធិការសម្របសម្រួលមូលនិធិសកលប្រចាំកម្ពុជា ចងក្រងនូវលទ្ធផលនេះ ជាឯកសារយោង និងបែងចែកជូនដល់សមាជិកសមាជិកា និងផ្នែកពាក់ព័ន្ធ សំរាប់សំរបសំរួលការងារជាបន្តទៀត។

ជាចុងក្រោយ ឯកឧត្តមទេសរដ្ឋមន្រ្តី ក៏បានថ្លែងអំណរគុណយ៉ាងជ្រាលជ្រៅដល់សមាជិកសមាជិកា នៃគណៈកម្មាធិការសម្របសម្រួលមូលនិធិសកលប្រចាំកម្ពុជា ឯកឧត្តម លោកជំទាវ លោក លោកស្រី អ្នកនាងកញ្ញា ថ្នាក់ដឹកនាំ តំណាងស្ថាប័ន ក្រសួងនៃរាជរដ្ឋាភិបាលកម្ពុជា តំណាងដៃគូអភិវឌ្ឍនិងសង្គមស៊ីវិល និង ជាពិសេស លោក លោកស្រី អ្នកនាងកញ្ញាជាតំណាងអ្នកផ្ទុកមេរោគអេដស៏ និងតំណាងប្រជាជនប្រឈមមុខខ្ពស់ ដែលបានចំណាយពេលវេលាដ៏មានតំលៃ និងបានចូលរួមចំណែកយ៉ាងសកម្ម ក្នុងកិច្ចប្រជុំពិគ្រោះ ពិភាក្សា ផ្លាស់ប្តូរយោបល់ និងសំរេចរួមគ្នាដើម្បីទទួលបានជោគជ័យរួមគ្នាបន្តទៀតក្នុងការសំរបសំរួលមូលនិធិសកលប្រយុទ្ធប្រឆាំងនឹងជំងឺអេដស៍ របេង និងគ្រុនចាញ់នៅព្រះរាជាណាចក្រកម្ពុជា។



សិក្ខាសាលានៃគណៈកម្មាធិការសម្របសម្រួលមូលនិធិសាកលប្រចាំកម្ពុជា (ផ្សព្វផ្សាយដោយទូរទស្សន៍ជាតិកម្ពុជា)

រូបភាពនៃកិច្ចប្រជុំ៖

សកម្មភាពរបស់ អ.ជ.ប.ជ.អ នៅលើប្រព័ន្ធផ្សព្វផ្សាយ

សារអេឡិចត្រូនិច