ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ អញ្ជើញចុះពិនិត្យការងារប្រយុទ្ធនិងឆ្លើយតបទៅនឹងមេរោគអេដស៍/ជំងឺអេដស៍នៅខេត្តកំពត
នារសៀលថ្ងៃទី២៦ ខែឧសភា ឆ្នាំ២០១៥ ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍បានអញ្ជើញចុះពិនិត្យការងារប្រយុទ្ធនិងឆ្លើយតបទៅនឹងជំងឺអេដស៍នៅខេត្តកំពត។ ឯកឧត្តមទេសរដ្ឋមន្រ្តីនិងគណៈប្រតិភូបានអញ្ជើញទៅសួរសុខទុក្ខកុមារកំព្រានិងពិនិត្យមើលមជ្ឈមណ្ឌលកុមារកំព្រាអេសប៉េកាដើម្បីពិនិត្យមើលចំណុចប្រឈមក្នុងការការផ្តល់ចង្កោមសកម្មភាពអតិបរិមាដល់កុមារកំព្រាដែលរងគ្រោះដោយជំងឺអេដស៍និងស្តាប់មើលសំណូមពរពីភាគីពាក់ព័ន្ធនានា។ ជាបន្ទាប់ទៀតឯកឧត្តមទេសរដ្ឋមន្រ្តីបានអញ្ជើញពិនិត្យមើលការអប់រំសុខភាពអន្តរាគមន៍បង្ការការឆ្លងមេរោគអេដស៍នៅតាមទីតាំងផ្តល់សេវាកំសាន្តសប្បាយមួយចំនួននៅក្នុងខេត្ត។ បន្ទាប់មកទៀតបានអញ្ជើញសំណេះសំណាលសួរសុខទុក្ខក្រុមគ្រួសារបងប្អូនប្រជាពលរដ្ឋដែលបានឆ្លងនិងបានទទួលរងផលប៉ះពាល់ដោយមេរោគអេដស៍នៅឃុំត្រើយកោះដើម្បីដឹងសុខទុក្ខប្រវត្តិនៃការឆ្លងមេរោគអេដស៍ផលប៉ះពាល់និងការទទួលសេវាថែទាំព្យាបាលសុខភាពប្រចាំថ្ងៃនិងការគាំទ្រសង្គមនានាដែលបងប្អូនបានទទួលពីគំរោងកម្មវិធីឆ្លើយតបទៅនឹងមេរោគអេដស៍នៅក្នុងមូលដ្ឋានរស់នៅរបស់បងប្អូន។
នៅព្រឹកថ្ងៃទី២៧ ខែឧសភា ឆ្នាំ២០១៥ ឯកឧត្តមទេសរដ្ឋមន្រ្តី បានអញ្ជើញជួបប្រជុំជាមួយគណៈកម្មាធិការអេដស៍ខេត្តកំពតដោយមានវត្តមាន ឯកឧត្តម សូត្រ យា អភិបាលរងខេត្តនិងជាប្រធានគណៈកម្មាធិការអេដស៍ខេត្ត លោកវេជ្ជបណ្ឌិត ញា ប៊ុនថន នាយកមន្ទីរសុខាភិបាលខេត្ត អង្គការក្រៅរដ្ឋាភិបាល និង ដៃគូអភិវឌ្ឍបំពេញការងារផ្នែកប្រយុទ្ធនឹងជំងឺអេដស៍និងសុខភាពបន្តពូជដើម្បីស្តាប់របាយការណ៍របស់មន្ទីរសុខាភិបាលខេត្តកំពតស្តាប់មតិយោបល់របស់ដៃគូពាក់ព័ន្ធលើ៖អន្តរាគមន៍បង្ការការរាលដាលជំងឺអេដស៍ខេត្តកំពតការផ្តល់និងទទួលសេវាព្យាបាលជំងឺអេដស៍កន្លងមកនិងផ្តល់អនុសាសាន៍ក្នុងការឆ្លើយតបនឹងជំងឺអេដស៍ក្នុងខេត្តកំពត។
នៅទីបញ្ចប់នៃកិច្ចប្រជុំជាមួយគណៈកម្មាធិការអេដស៍ខេត្តឯកឧត្តមទេសរដ្ឋមន្រ្តីក៏បានថ្លែងអំណរគុណដល់ឯកឧត្តមអភិបាលរងខេត្តលោកនាយកមន្ទីរសុខាភិបាលលោកស្រីជាសមាជិកសមាជិកាគណៈកម្មការអេដស៍ខេត្តដៃគូអភិវឌ្ឍអង្គការក្រៅរដ្ឋាភិបាលបណ្តាញអ្នករស់នៅជាមួយមេរោគអេដស៍បងប្អូនប្រជាពលរដ្ឋដែលប្រឈមនឹងការឆ្លងរាលដាលមេរោគអេដស៍ទាំងអស់ដែលបានចូលរួមចំណែកបំពេញភារកិច្ចក្នុងការងារទប់ស្កាត់ការឆ្លងរាលដាលនៃមេរោគអេដស៍និងចូលរួមឆ្លើយតបទៅនឹងផលប៉ះពាល់ដោយមេរោគអេដស៍ ដែលជាអន្តរាគមន៍គាំទ្រយ៉ាងសំខាន់សំរាប់ការងារប្រយុទ្ធនឹងជំងឺអេដស៍របស់យើងសំរាប់ឆ្នាំបន្តបន្ទាប់នៅគ្រាដែលជំនួយហិរញ្ញវត្ថុពីខាងក្រៅកាន់តែថយចុះយើងចាំបាច់ត្រូវតែទទួលខុសត្រូវដោយខ្លួនឯងនូវបន្ទុកចំណាយថែទាំសុខភាពនិងសង្គមដ៏ធ្ងន់ធ្ងរនេះជាបណ្តើៗដូចជាក្នុងឆ្នាំ២០១៥នេះ រាជរដ្ឋាភិបាលនឹងចំណាយ១លានដុល្លាអាមេរិករួមចំណែកឧបត្ថម្ភទិញឱសថប្រឆាំងមេរោគអេដស៍ព្យាបាលអ្នកដែលកំពុងរស់នៅជាមួយមេរោគអេដស៍។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
