ឯកឧត្តម អៀង មូលី ទេសរដ្ឋមន្រ្តីទទួលបន្ទុកបេសកកម្មពិសេស និង ជាប្រធានអាជ្ញាធរជាតិប្រយុទ្ធនឹងជំងឺអេដស៍ ទទួលជួបពិភាក្សាការងារជាមួយគណៈប្រតិភូមូលនិធិប្រធានាធិបតីសហរដ្ឋអាមេរិក សំរាប់គំរោងសកម្មភាពបន្ទាន់ប្រយុទ្ធនឹងជំងឺអេដស៍ (ផេបហ្វា)
នារសៀលថ្ងៃទី១៣ ខែកក្កដា ឆ្នាំ២០១៥ នៅទីស្នាក់ការកណ្តាល អាជ្ញាធរជាតិប្រយុទ្ធនឹងជំងឺអេដស៍ ឯកឧត្តមទេសរដ្ឋមន្រ្តី អៀង មូលី ទទួលបន្ទុកបេសកកម្មពិសេស និងជាប្រធានអាជ្ញាធរជាតិប្រយុទ្ធនឹងជំងឺអេដស៍ អមដោយមន្រ្តីថ្នាក់ដឹកនាំជាន់ខ្ពស់អាជ្ញាធរជាតិបានទទួលជួបពិភាក្សាការងារជាមួយគណៈប្រតិភូមូលនិធិប្រធានាធិបតីសហរដ្ឋអាមេរិក សំរាប់គំរោងសកម្មភាពបន្ទាន់ប្រយុទ្ធនឹងជំងឺអេដស៍ផេបហ្វា(PEPFAR: President’s Emergency Plan for AIDS relief) ។
ក្រុមគណៈប្រតិភូសហរដ្ឋអាមេរិកនេះ រួមមានសមាសភាពមកពី៖
- ស្ថាប័នសហរដ្ឋអាមេរិកសំរបសំរួលប្រយុទ្ធនឹងជំងឺអេដស៍សកល (Global AIDS Coordinator)
- មជ្ឈមណ្ឌលសហរដ្ឋអាមេរិក ប្រយុទ្ធ និងការពារជំងឺ (US CDC: Center for Disease Control and Prevention) និង
- ទីភ្នាក់ងារអភិវឌ្ឍន៍អន្តរជាតិសហរដ្ឋអាមេរិក (USAIDS: US Agency for International Development)
គោលបំណងរបស់គណៈប្រតិភូសហរដ្ឋអាមេរិក អញ្ជើញមកបំពេញ ទស្សនៈកិច្ចពេលនេះគឺ ពិគ្រោះពិភាក្សាជាមួយរាជរដ្ឋាភិបាលកម្ពុជា និងភាគីពាក់ព័ន្ធអំពីចក្ខុវិស័យ និងតម្រូវការចំបងៗ សំរាប់និរន្តភាពក្នុងការប្រយុទ្ធ និងការឆ្លើយតបទៅនឹងជំងឺអេដស៍សំរាប់រយៈពេលវែងនៅប្រទេសកម្ពុជា។ ឯកឧត្តមទេសរដ្ឋមន្រ្តី បានជំរាបជូនគណៈប្រតិភូសហរដ្ឋអាមេរិកអំពីកិច្ចខិតខំប្រឹងប្រែងរបស់រាជរដ្ឋាភិបាលកម្ពុជាក្នុងការដឹកនាំ សំរបសំរួល ពហុវិស័យប្រយុទ្ធនឹងឆ្លើយតបទៅនឹងជំងឺអេដស៍នៅកម្ពុជាដោយលើកទិសដៅគោលនយោបាយ ផែនការយុទ្ឌសាស្រ្តជាតិ គំរោងសកម្មភាពពហុវិស័យ របស់ប្រទេសអោយបានសមស្របជាមួយបន្ទុកបញ្ហា ធនធានដែលមាន និងបរិបទសកលក្នុងការប្រយុទ្ធនិងឆ្លើយតបទៅនឹងជំងឺអេដស៍។ ជាលទ្ធផល យើងបានទទួលជោគជ័យ និងការកោតសរសើរពីអង្គការសហប្រជាជាតិ សំរាប់ជោគជ័យ និងលទ្ធផលដ៏ត្រចះ ត្រចង់ដែលកម្ពុជាសំរេចបាន។ រវាងឆ្នាំ២០១១ ដល់ឆ្នាំ ២០១៤ ករណីថ្មីដែល បានឆ្លងមេរោគអេដស៍ បានធ្លាក់ចុះពីចំនួន ១០៥៥ នាក់ មកនៅត្រឹម ៦៩៤នាក់ ខណៈអ្នកស្លាប់ដោយជំងឺអេដស៍បានថយចុះពី ៣០១០ មកនៅត្រឹម ២៧៨៣ នាក់។ ហើយអត្រាប្រ៉េវាឡង់អ្នករស់នៅជាមួយមេរោគអេដស៍ក្នុងចំណោមប្រជាពលរដ្ឋអាយុពី១៥ ទៅ៤៩ឆ្នាំ បានថយចុះប្រមាណពី០.៨១% មកនៅត្រឹម ០.៧៦% ។
រាជរដ្ឋាភិបាលបានអនុម័តផ្តល់កញ្ចប់ថវិការ ប្រមាណ ៣.៧ លានដុល្លាសហរដ្ឋអាមេរិក សំរាប់ឆ្នាំ ២០១៥ ដល់ ២០១៧ ចូលរួមជាមួយមូលនិធិសកល ដើម្បីទិញឱសថប្រឆាំងមេរោគអេដស៍ ផ្គត់ផ្គង់ជូនក្រសួងសុខាភិបាល សំរាប់ផ្តល់សេវាព្យាបាលអ្នកជំងឺអេដស៍នៅកម្ពុជា។ ឯកឧត្តមទេសរដ្ឋមន្រ្តី បានសំនូមពរដល់ភាគីសហរដ្ឋអាមេរិក ជួយ ឧបត្ថម្ភគាំទ្រដល់ការអភិវឌ្ឍ និងពង្រឹងកិច្ចសហប្រតិបត្តិការជាមួយអាជ្ញាធរជាតិប្រយុទ្ធនឹងជំងឺអេដស៍ ដែលជាស្ថាប័នរាជរដ្ឋាភិបាលដែលមានតួនាទី ភារកិច្ចសំរបសំរួលពហុវិស័យប្រយុទ្ធ និងឆ្លើយតបទៅនឹងជំងឺអេស៍ ប្រកបដោយនិរន្តភាព និង ប្រសិទ្ធភាពយូរអង្វែង។ ការចំណាយធនធានហិរញ្ញវត្ថុ ដ៏ច្រើនសន្ធឹកសន្ធាប់ បើទោះជាមានប្រសិទ្ធភាព ក៏មិនអាចធានាសំរាប់រយៈពេលវែងបានឡើយ មានតែប្រព័ន្ធសម្របសម្រួលអចិន្រ្តៃទេ ដែលអាចប្រយុទ្ធនឹងការឆ្លង និង ឆ្លើយតបទៅនឹងជំងឺអេដស៍ និងឈានទៅលុបបំបាត់ការឆ្លងរាលដាលបានជាស្ថាពរបាន។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
