ឯ.ឧ. ទេសរដ្ឋមន្រ្តី អៀង មូលី អញ្ជើញជាអធិបតីក្នុងកិច្ចប្រជុំលើកទី៧២ នៃគណៈកម្មាធិការសម្របសម្រួលមូលនិធិសកលប្រចាំកម្ពុជា
នាវេលាម៉ោង ២រសៀល ថ្ងៃទី១៧ ខែសីហា ឆ្នាំ២០១៥ នៅទីស្នាក់ការកណ្តាលអាជ្ញាធរជាតិប្រយុទ្ធនឹងជំងឺអេដស៍ មានរៀបចំកិច្ចប្រជុំលើកទី ៧២ របស់គណៈកម្មាធិការសម្របសម្រួលមូលនិធិសកលប្រចាំកម្ពុជា (CCC) ក្រោមអធិបតីភាពរបស់ ឯ.ឧ. ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍ និងជាប្រធានគណៈកម្មាធិការសម្របសម្រួលមូលនិធិសកលប្រចាំកម្ពុជា។
សមាសភាពចូលរួមក្នុងកិច្ចប្រជុំនេះរួមមាន៖
- សមាជិកគណៈកម្មាធិការប្រតិបត្តិរបស់គណៈកម្មាធិការសម្របសម្រួលមូលនិធិសាកលប្រចាំប្រទេស (CCC)
- អ្នកតំណាងមកពី ក្រសួងពាក់ព័ន្ធនៃរាជរដ្ឋាភិបាលកម្ពុជា
- តំណាងអង្គការសហប្រជាជាតិមកពី WHO, UNAIDS.
- ដៃគូអភិវឌ្ឍន៍ដែលមាន តំណាងស្ថានទូតបារាំង អាល្លឺម៉ង់ និង សហរដ្ឋអាមេរិក
- សង្គមស៊ីវិលដែលមាន អង្គការក្រៅរដ្ឋាភិបាលពាក់ព័ន្ធនឹងការប្រយុទ្ធនឹងជំងឺអេដស៍ របេង គ្រុនចាញ់ គ្រឹះស្ថានឧត្តមសិក្សា និង វិស័យឯកជន។
កិច្ចប្រជុំបានផ្តោតលើរបៀបវារៈរួមមាន៖
- ពិនិត្យនិងអនុម័តកំណត់ហេតុអង្គប្រជុំលើកទី៧១ និងប្រកាសទំនាស់ផលប្រយោជន៍ដែលអាចមានរបស់សមាជិកទាក់ទងទៅនឹងរបៀបវារៈនីមួយៗ
- អភិបាលកិច្ច និងសមាជិកភាព៖
- ជ្រើសរើសជំនួសតំណាងអង្គការមិនមែនរដ្ឋាភិបាលជាតិ
- អនុម័តសៀវភៅអភិបាលកិច្ចកែប្រែថ្មីចុងក្រោយ
- របាយការណ៍របស់គណៈកម្មការអភិបាលកិច្ច៖
- បច្ចុប្បន្នភាពនៃការចុះហត្ថលេខាផ្តល់គំរោងជំនួយមូលនិធិសកលសំរាប់កម្មវិធីប្រយុទ្ធជំងឺអេដស៍ គ្រុនចាញ់ និងពង្រឹងប្រព័ន្ធសុខាភិបាល ក្រោមទំរង់ ហិរញ្ញប្បទានថ្មី
- ស្ថានភាពនៃការអនុវត្ត និងលទ្ធផលគំរោងសំខាន់ដែលសំរេចបាន
- ការលើកលែងពន្ធសំរាប់គំរោងមូលនិធិសកល
- គំរោងទស្សនៈកិច្ចរបស់គណៈកម្មការអភិបាលកិច្ច
- ណែនាំទីប្រឹក្សាបច្ចេកទេសសំរាប់ការងាររៀបចំយន្តការបញ្ឈប់ការផ្តល់ប្រាក់លើកទឹកចិត្តដល់មន្រ្តីរដ្ឋាភិបាលពីគំរោងកម្មវិធីមូលនិធិសកល
- សេចក្តីសង្ខេបលទ្ធផលពិគ្រោះថ្នាក់ជាតិពីឯកសារបង្ហាញទស្សនៈទានចំនួន៤ (ទស្សនៈវិស័យ)
- របាយការណ៍សកម្មភាព និងបច្ចុប្បន្នភាព អំពីក្រុមប្រជាជនដែលរងការប៉ះពាល់ ជាងខ្លាំងជាងគេ
ឯកឧត្តមទេសរដ្ឋមន្ត្រីប្រធានអង្គប្រជុំបានរំលឹកថាចាប់តាំងពីឆ្នាំ២០០៣រហូតមកដល់ពេលនេះមូលនិធិសកលបានផ្តល់ជំនួយដល់កម្ពុជាយើងប្រមាណ៥០០លានដុល្លាអាមេរិកក្នុងនោះចំនួនពាក់កណ្តាលបានទៅផ្នែកកម្មវិធីជម្ងឺអេដស៍ ។ ជំនួយនេះបានជួយ សម្រាលបន្ទុករាជរដ្ឋាភិបាលបានមួយផ្នែកយ៉ាងធំនិងចូលរួមចំណែកឲ្យការប្រយុទ្ធនឹងជម្ងឺឆ្លងនៅកម្ពុជាយើងបានទទួលជោគជ័យគួរជាទីមោទនៈ ។
ឯកឧត្តមបានសំដែងការកោតសរសើរដល់ក្រុមសហគមន៍ដែលរងគ្រោះ និង ដែលរងផលប៉ះពាល់ដែលបានចូលរួមផ្តល់មតិដើម្បីឲ្យការរៀបចំកម្មវិធីការពារ និង ព្យាបាលបានត្រឹមត្រូវនិងចំគោលដៅ។ ឯកឧត្តមទេសរដ្ឋមន្ត្រីបានសំដែងអំណរគុណ ដល់តំណាងក្រសួងពាក់ព័ន្ធ ដៃគូអភិវឌ្ឍន៍ តំណាងអង្គការសហប្រជាជាតិ ដែលបានចូលរួមមតិធ្វើឲ្យអង្គប្រជុំប្រព្រឹត្តទៅដោយរលូន។
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
