ឯកឧត្តមទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេសដ៍ ជួបពិភាក្សាការងារជាមួយគណៈប្រតិភូមូលនិធិសកល
នារសៀលថ្ងៃទី ២៨ ខែតុលា ឆ្នាំ២០១៥ នៅទីស្នាក់ការកណ្តាលអាជ្ញាធរជាតិប្រយុទ្ធនឹងជំងឺអេដស៍ ឯ.ឧ.ទេសរដ្ឋមន្រ្តី អៀង មូលី ប្រធានអាជ្ញាធរជាតិប្រយុទ្ធនឹងជំងឺអេដស៍បានជួបពិភាក្សាការងារជាមួយគណៈប្រតិភូជាន់ខ្ពស់មូលនិធិសកលដែលដឹកនាំដោយលោក Mark Edington ប្រធានផ្នែកគ្រប់គ្រងជំនួយឥតសំណងរបស់មូលនិធិសកល។ ចូលរួមក្នុងជំនួបពិភាក្សានោះមាន ឯ.ឧ. ទា ផលា អនុប្រធានអាជ្ញាធរជាតិប្រយុទ្ធនឹងជំងឺអេដស៍លោកស្រី Nicole Delaney អ្នកគ្រប់គ្រងមូលនិធិជាន់ខ្ពស់ក្រុមប្រទេសអាស៊ីខាងត្បូង និង អាស៊ីបូព៌ា របស់មូលនិធិសកល និងលោក Jan de Jong ភ្នាក់ងារមូលនិធិក្នុងស្រុក ។ ឯកឧត្តមទេសរដ្ឋមន្រ្តី ក្នុងនាមរាជរដ្ឋាភិបាល បានសម្តែងការស្វាគមន៍ចំពោះគណៈប្រតិភូ និងថ្លែងអំណរគុណចំពោះមូលនិធិសកល ដែលបានផ្តល់ជំនួយដល់កម្ពុជាអស់រយៈពេលជាង១០ឆ្នាំកន្លងមក ។ ក្នុងនោះ នៅឆ្នាំ២០១៥-២០១៧ មូលនិធិសកលបានយល់ព្រមផ្តល់ជំនួយប្រមាណ ៩៣លានដុល្លារសហរដ្ឋអាមេរិកបន្ថែមទៀតដល់កម្ពុជាដើម្បីប្រយុទ្ធនឹងជំងឺអេដស៍ របេង គ្រុនចាញ់ និងពង្រឹងប្រព័ន្ធសុខាភិបាល ។ ឯកឧត្តមទេសរដ្ឋមន្រ្តីបានជម្រាបជូនដៃគូសន្ទនាថា រាជរដ្ឋាភិបាលកម្ពុជាគាំទ្រចំពោះការបន្តផ្តល់ ជំនួយពីមូលនិធិសកល ។ ឯកឧត្តមក៏សម្តែងនូវអំណរគុណចំពោះមូលនិធិសកលដែលយកចិត្ត ទុកដាក់ក្នុងការលើកនូវសំណើផ្សេងៗ ដើម្បីឱ្យរាជរដ្ឋាភិបាលមានជម្រើសក្នុងការពិនិត្យ និងទទួលយកមកអនុវត្ត ។ រាជរដ្ឋាភិបាលត្រៀមខ្លួនជានិច្ចសហការជាមួយមូលនិធិសកល ដើម្បីឱ្យ ការអនុវត្តកម្មវិធីមូលនិធិសកលប្រកបដោយតម្លាភាព និងគណនេយ្យភាព ។ គណៈប្រតិភូមូលនិធិសកលបានសម្តែងនូវការពេញចិត្ត និងកោតសរសើរចំពោះកិច្ចខិតខំប្រឹង ប្រែងរបស់ឯកឧត្តមទេសរដ្ឋមន្រ្តីក្នុងឋានៈជាប្រធានគណៈកម្មាធិការសម្របសម្រួលជំនួយមូលនិធិសកលប្រចាំកម្ពុជា (CCC) ក្នុងការជួយឱ្យមានការពិគ្រោះយោបល់ ស្វែងរកដំណោះស្រាយលើបញ្ហាមួយ ចំនួនជាមួយរាជរដ្ឋាភិបាល ជាមួយដៃគូអភិវឌ្ឍន៍ និងជាមួយសង្គមស៊ីវិល ។ គូសន្ទនាបានមូលមតិគ្នាថា ការអនុវត្តប្រកបដោយតម្លាភាព និងគណនេយ្យភាពអាចជាកត្តាធ្វើឱ្យមូលនិធិសកលបន្តផ្តល់ជំនួយដល់កម្ពុជាទៅមុខទៀត នៅក្រោយឆ្នាំ២០១៧ ។ កិច្ចប្រជុំបានបញ្ចប់ទៅក្រោមបរិយាកាសរីករាយ និងស្និទ្ធស្នាល ។
"រូបភាពថតក្នុងកិច្ចប្រជុំ"
info@naaa.gov.kh
+855 (0)23 885 129
+855 (0)23 885 279
ភាសាខ្មែរ
English
